Days of Counting Camellia (Hiatus)

[6] Why she can't bloom

Check Zawgyi version below ⬇️

#Unicode

ကျေးလက် စားသောက်ဆိုင်ငယ်တစ်ခုသည် နေ့လည်စာစားချိန်မို့ သိုက်သိုက်မြိုက်မြိုက်ရှိလှ၏ ။
Xavia နှင့် Raven နယ်စပ်၌ တည်ရှိကာ နေရာဒေသအနှံ့မှလာသော တရားမဝင်အရောင်းအဝယ်သမားများ ကျင်လယ်ရာဒေသဖြစ်၍ ဆိုင်ထဲတွင် ဘာသာစကားပေါင်းစုံဖြင့် ညံညံဆူနေသည် ။

ထိုအထဲ၌ ဝါးစိမ်းဖြင့်ပြုလုပ်ထားသော စားပွဲဝိုင်းတစ်ခုတွင် ‌‌ခေါင်းမှ‌ခြေအဆုံးအဝတ်နက်ဖြင့်ဖုံးအုပ်ထားသော လူသုံးယောက်ထိုင်နေသည် ။

ထိုသူသုံးယောက်သည် ဆိုင်ထဲဝင်လာကတည်းက အခြားသူများလို အချင်းချင်းစကားစမြည်ပြောခြင်းမပြု ။ စားသောက်ဖွယ်များကိုသာ မှာပြီး ငြိမ်သက်စွာနေသည် ။

ထိုယောင်္ကျားသုံးယောက်တို့သည် ဘယ်လိုကြည့်ကြည့် သံသယဖြစ်စရာအလွန်ကောင်းနေ၏ ။ သို့သော် ဤနေရာ၌ မည်သူကမှအရေးမစိုက် ။ နေ့စဉ်နေ့တိုင်း ဝရမ်းပြေး၊ သူခိုးကြမ်းပိုးအပြင် ကြေးစားလူသတ်ဂိုဏ်းများ ၊ မှောင်ခိုသမားများကိုပင် တွေ့နိုင်သည် ။

ဤနေရာသို့ရောက်လာသော လူတိုင်းတွင် လျှိ့ဝှက်ချက်ကိုယ်စီ အသီးသီးရှိကြသည် ။ ဒါကြောင့် မသင်္ကာစရာများတွေ့လျှင်‌တောင် လစ်လျှုရှုကာနေကြရသည် မဟုတ်ပါလား ။

သို့သော် မျက်လုံးတစ်စုံတို့သည် ထိုသုံးယောက်ဝိုင်းဆီကနေ အကြည့်မခွာ ။
စားပွဲထိုးမလေးသည် အနှီလျှို့ဝှက်သောယောင်္ကျားသုံးယောက်ထဲမှ စားပွဲထိတ်တွင်ထိုင်နေသော ယောင်္ကျား၏ မျက်နှာကို မကြာခဏခိုးခိုးကြည့်၏ ။

မျက်နှာတစ်ဝက်သာမြင်နေရသော်လည်း သမင်လည်ပြန်ကြည့်ရသည့် လျှို့ဝှက်နက်နဲသောအလှတရားတို့ ထိုယောင်္ကျားတွင်ရှိသည် ။ ကြွေသားပမာဖြူကြည်သောအသားအရည်သည် ဝတ်ရုံအောက်အနည်းငယ်လှောင်နေတာမို့ ချွေးစများတင်နေသည် ။ ထင်းရှင်းသော သွေးနီရောင်နှုတ်ခမ်းလွှာသည် ပြည့်ဝဖောင်းအိကာ ၊ လက်ဖက်ရည်ကြမ်းကိုသောက်သုံးစဉ်က ကျန်ခဲ့သော စိုစွတ်မှုလေးဖြင့် ဆွဲမက်စရာ ကောင်းလွန်းနေသည် ။