Days of Counting Camellia (Hiatus)

[13] The Deadly Simulation

Check Zawgyi version below ⬇️

#Unicode

နားရွက်ဖြားတွင် ရုတ်တရက်ခံစားလိုက်ရသော အေးစက်စက်အထိအတွေ့ကြောင့် မျက်လုံးကိုဖြတ်ခနဲဖွင့်ကြည့်လိုက်တော့ Afa အား ငုံ့မိုးကြည့်နေသော မျက်ဝန်းနက်‌တို့နှင့်ထိတ်တိုက်တွေ့သည် ။
Afa သည်ညက ရှင်ဘုရင်၏အမိန့်တော်အတိုင်း ပုံပြင်စာအုပ်ကိုဖတ်နေရင်း သတိမထားမိပဲအိပ်ပျော်သွားခဲ့တာဖြစ်သည် ။
ယခု ကျွန်မလေးသည် သလွန်ဘေးသားမွှေးကောဇောပေါ်၌ ကုပ်ကွေးကာလှဲလျောင်းလျက်သား ။

Afa ဘယ်နေရာမှာအိပ်သလဲက အရေးမဟုတ်ပါ ။ ပြဿနာမှာ အရှင်သခင်၏ ခွင့်ပြုချက်မပါပဲ အိပ်စက်မိခြင်းဖြစ်လေသည် ။

' ခွင့်ပြုမှအိပ် ၊ ခွင့်ပြုမှစား ' တဲ့ ။
ဒါဟာ အရှင့်ရဲ့အိပ်ဆောင်မှာခစားရတဲ့ကျွန်ငယ်အတွက် တစ်ခုတည်းသောစည်းမျဉ်းပဲဖြစ်၏ ။
သူ၏အမိန့်မပါပဲ ကိုယ့်သဘောနဲ့ကိုယ်ဘာမှလုပ်ခွင့်မရှိ ။
အိပ်ဆောင်စောင့် အစေခံယောင်္ကျား၏မှာကြားချက်များကို ပြန်လည်ကြားယောင်မိသည် ။

ကျွန်မလေးသည် သေချာသိနေခဲ့သည် ။
သခင်ဖြစ်သူသည် သူမကိုအပြစ်တွေပေးတော့မည် ။

သို့သော် . . .

သူ၏တန်ဖိုးထားရပါသောပုံပြင်စာအုပ်ကိုပင် ခေါင်းအုံးကာ ကျကျနနလှဲလျောင်းနေသော Afa အား သူသည်အနားမှာငြိမ်သက်စွာထိုင်ကြည့်နေလေသည် ။
သူ့ရဲ့လက်ချောင်းများက Afa ရဲ့နားရွက်ဖြားကို ခပ်ဖွဖွလေးဖိကိုင်ထား၏ ။
နက်မှောင်သောအကြည့်တွေထဲ ဆန်းဆန်းပြားပြားအရာတွေကိန်းဝတ်နေသဖြင့် စူးစမ်းမိတဲ့ကျွန်ငယ်သည် အကြည့်မလွှဲနိုင် ။
ထိုအခိုက်တန့်လေးတွင် အရာရာဟာနှေးကွေးသွားသလို ၊ သူ့ရဲ့အသေးစိတ်ကိုကအစ Afa မြင်နိုင်သည် ။
ရုတ်တရက်အကြည့်ချင်း‌တိုက်ဆိုင်သွားချိန် ပြူးကျယ်သွားသောမျက်ဆံနက်ကြီးများ ၊ ပွင့်ဟသွားတဲ့နှုတ်ခမ်းလွှာ ၊ လျှို့ဝှက်ချက်တွေကို အချိန်မှီပုတ်ခတ်ကာကောက်သိမ်းလိုက်တဲ့ မျက်တောင်ရှည်တို့ . . . ။

Ash : " . . .သခင်ရှေ့မှာ သက်တောင့်သက်သာလှဲနေရဲတယ်‌ပေါ့လေ အရိုအသေတန်လိုက်တာ . . . "