اسكريبت
- انتى فين
_ فى الكلية فى حاجة ولا اية
- انا قريب منها خليكى انا جيلك
قفل قبل ما اكمل كلامى عمر يبقى ابن عمى بس كل البعد عنى احنا تقريبا من سن بعض بس عمرنا ما فكرنا نكلم بعض او نبقى زى ولاد العم اللى بشوفهم فانوا يتصل بيا ويقولى انوا جايلى يبقى فى مصيبة
_ فى اية يا عمر
- اركبى
_ نعم
- بقولك اركبى فى حاجة لازم تشوفيها
ركب وانا مش فاهمة فى اية بس ركبت اصل انا متأكدة ان عمر مش هيأذينى احساس جويا بيقول كدا !!وصلنا كافية كدا ودخلنا وانا مش فاهمة فى اية بس ماشية ورا عمر ؟!لقيتة بيشاورلى على حاجة ببص لقيتة خطيبى يوسف ومعاة بنت اتصدمت ومكنتش عارفة اعمل اية رحت قربت منهم وسمعت يوسف وهو بيقولها انوا بيحبها وميقدرش يستغنى عنها محسيتش بنفسى غير وانا بقلع دبلتة من ايدى وبحطها على الطربيزة قدامهم ولما عملت كدا خدو بالهم منى واضح انهم كانوا منسجمين جدا مع بعض لدرجة مخدوش بالهم انى واقفة ؟!
_ كويس انى لقيتك هنا كنت لسة هتصل بيك عشان تاخد حجتك ودبلتك
: حياة اسمعينى
* هى دى بقى حياة
بصتلها كانت بتقولها بسخرية
* كويس يا بيبى انها جت منها اساسا انت مش كنت لسة بتقولى انك مغصوب عليها مامتك اللى عاوزها ليك وانت مش بتحبها اصلا
انا ويوسف اتخطبنا صالونات مامتة شافتنى مرة فى فرح وبعد كدا اتقدمولى وقعدنا فى رؤية شرعية وبعد كدا اتخطبنا بس لا انا مش هسمح لحد انوا يهين كرامتى
_ ايوة اصل انا عمرى ما هسمح ان حد يقلل كرامتى ويبقى يعرف عليا واحدة مش كمان خاطب لا سورى انا عندى كرامة مش زى ناس نو كرامة
* قصدك اية يعنى
قربت منى وكانت عاوزة تضربنى بس اللى وقف قدامها ومنعها عمر انا اصلا نسيت انوا موجود كان واقف يسمع الحوار كلة جيت امشى راح يوسف حاول يمسكنى بس عمر منعة وضربة بالبوكس فى وشة مشيت وسبتهم وحسيت ان عمر ماشى ورايا فضلت ماشية لغايت اما وقفت على الكورنيش ولقيت عمر وقف جمبى
- كنتى بتحبية
بصتلة وبصيت قدامى تانى للبحر
_ اكدب عليك لو قولت اة ! انا اتخطبتلة عشان كلام امى انى خلاص فى اخر سنة فى الجامعة ولسة متخطبتش وهعنس ونظرة المجتمع وحاجات كتير كدا انا قولت ممكن لما نتجوز احبة اصلى سمعت ان الحب الحقيقى بيبقى بعد الجواز
سكتنا انا وهو حسيت انوا مش عارف يقولى اية بس حسيت انوا فرحان لا لا مستحيل وهو هيفرح لية ؟!!
_ هو انا وحشة
- لا طبعا انتى احلى واحدة فى عينى
هو قال كلامة مرة واحدة وبعفوية بس انا قلبى دق فى اللحظة دى !!
_ طب هو لية خانى
- عشان مقدرش الجوهرة اللى معاة
كان بيكلم بعصبية كبيرة !!
_ انت حبيت قبل كدا
- ايوة ولسة بحبها لغايت دلوقتى وهحبها طول عمرى
انا لية اضايقت زعلت انا مزعلتش لما شوفت وعرفت ان يوسف بيخونى مزعلتش ومفرقش معايا انا ممكن اضيقت انو يكون خطيبى ويروح يخونى كرامتى اتجرحت بس دلوقتى حاسة انى قلبى اتكسر!!!!
كان لسة هيكمل كلامة بس تلفونى رن وكانت ماما
+ انتى فين واية الكلام اللى يوسف بيقولة دا
_ بيقول اية
+ بيقول انوا شافك فى كافية مع ولد ولما جة يكلمك الولد اللى معاكى ضربة
اتصدمت وصلت الحقارة بية انتوا يتمهمنى
- فى اية
_ يوسف راح لأهلى وقالهم ان انا اللى كنت بخونة ولما واجهنى انت ضربتة
عمر اتعصب جدا وخدنى ركبنا عربيتة وروحنا البيت وجيت اطلع لاقيتة طالع معايا
_ انت رايح فين
- هتفهمى دلوقتى
طلع بيتنا فعلا وخبط فتح بابا وكان موجود جوة يوسف و اول ما شاف عمر قام
: هو دا الولد اللى. شوفتوا معاها
بابا رد علية وقالة انوا ابن عمى اتصدمت مالازم يتصدم عمر محضرش خطوبتى ولا اتقابل هو ويوسف قبل كدا فابتالى يوسف ميعرفوش عمر وقف قدام يوسف واتكلم بعصبية شديدة جداا يمكن اول مرة اشوف عمر متعصب كدا
- انا هسيبك تمشى دلوقتى بس اقسم باللة لو قربتلها او حتى فكرت انك تقربلها لهيكون اخر يوم فى عمرك
يوسف خاف من عمر ومشى فعلا وقتها بابا طلب من عمر انوا يفهموا فى اية
_ مفيش يا عمى دا انسان خاين وحياة شافتة مع بنت وبالصدفة كنت هناك انا فاوقفت معاها
معرفش لية كذب لية مقالش انوا هو اللى ودانى لهناك بس متكلمتش سبتوا هو اللى يكلم ساعتها بابا شكرة وعمر مشى ومفوقتش غير بعد ما مشى وبابا بيقولى ان كل شئ نصيب واحسن ان ربنا كشف حقيقتة بدرى فضلت طول الليل افكر عمر اللى ساعدنى عشان اكشفة وهو اللى وقف معايا دلوقتى وقتها افتكرت وانا صغيرة لما كان اقرب حد ليا هو عمر كنت لما بقع اول واحد بيسندنى عمر بس من ساعت وفاة مامتة وعمر اتغير. بقى شخص تانى اتعرف على شلة سوء بقى سهر برة طول الليل وشرب سجاير وبيكلم بنات وساعتها مامتى خافت عليا منة وبعدتنى عنة يمكن انى اوافق وابعد عنة فى اكتر وقت هو محتجنى فية لان ماما خافت عليا دا ضعف شخصية منى بس انا مش عاوزة ابعد عنة بالعكس انا بحب عمر من زمان من انا طفلة بس لما اتغير بعدت بس لازم اقف جمبة هو اللى منع وقوعى فى شخص زى يوسف وانا همنع وقوعة او هرفعة من اللى هو فية
_ الو عمر بقولك انا مستنياك فى كافيتريا الجامعة
قفلت بسرعة لانى عارفة ان عمر مش هيرضى ممكن من اسباب اللى خلتنى ابعد عنة انوا هو كمان بعد عمر وهو فى الثانوية جة اخر شهر وذاكر كويس ودخل كلية تجارة عمر شاطر جدا لو كان ذاكر بجد من اول السنة ممكن كان دخل طب
- نعم عاوزة اية
_ دية معاملة تعامل بيها بنت عمك
- حيااة اخلصى عاوزة اية
_ هو انت ازاى عرفت ان يوسف بيخونى
لاقيتة اتعصب ووشة احمر
- بطلى بقى سيرة سى زفت دا ثم انا رحت الكافية دا بالصدفة فالقيتة فاتصلت بيكى قولتلك
_ وانت عرفتوا منين وانت اساسا محضرتش خطوبتى
- شوفتة فى مرة كان ماشى معاكى فاعرفت ان دا اللى اتخطبتيلة
لاقيتة زى اللى زعل لما قال اخر جملة حاولت اغير الحوار
_ وانت اية اللى وداك الكافية دا بتاع مرتبطين اوعى تكون مرتبط من وريا
لقيت عمر اتوتر جداا ففهمت انوا فعلا كان هناك مع بنت وساعتها قررت انى صح فعلا لازم اغيرة وهبدأ من اول البنات والسجاير لاقيت فى ايدة سجارة كان بيطلعها عشان يشربها شديتها من ايدة ورمتها
- اية اللى انتى عملتية دا انتى مجنونة
نبرة صوتة كانت عالية وتخوف بس انا مخوفتش احساس جويا حسيسنى بالأمان
_ محدش قالك قبل كدا ان السجاير حرام وكمان اساسا مضرة بالصحة ثم تعالى هنا مامتك طول عمرها بتكرة السجاير ازاى انت بقى بعد ما ربنا يرحمها انت تشربها بكل هدوء
لاقيتة هدى ولاقيت فى نظراتة حزن عمر كان اقرب حد لمامتة عشان كدا لما ماتت اتكسر وضاع بس انا هنا من هسيبة وهرجعة عمر القديم
_ بااللى انت بتعملة فى نفسك دا متوقع مامتك هتبقى مبسوطة لا طبعا
- وانتى عاوزة اية
_ تتغير وترجع عمر القديم عمر اللى مكنش بيفوت صلاة اللى كان بينصح الناس ان السجاير حرام اللى عمرة ماكلم بنت
- لية
_ عشان مامتك تبقى مبسوطة وهى فى تربتها عشان نفسك عشان حياتك و ................وعشانى
بصلى ولاقيت عيونة لمعت وردت بكل اصرار
- هتغير يا حياة هتغير بس انتى خليكى جمبى
_ وانا عمرى ما هسيبك
فعلا عمر بعدها اتغير بطل سجاير وساب كل البنات اللى كان بيكلمهم حتى شلتة السوء بعد عنها وبداء ينتظم فى الصلاة طبعا متغيرش كدا مرة واحدة اتغير بالتدريج وانا كنت معاة بكل خطوة بيمشيها ولما بلاقية ممكن يرجع اللى كان فية تانى كنت بقوية واخلية يكمل وقدر يلاقى شغل مع انة كان لسة بيدرس فى اخر سنة فى الكلية وانهاردة يوم التخرج بتاعنا احنا الاتنين
_انا مبسوطة جدا واخيرا اتخرجنا ومش هنذاكر تانى
- انا بحبك
بصتلة بصدمة راح هو كمل
- انا بحبك من يوم ما وعيت على الدنيا لما كنا ديما مع بعض ومنفترقش لما كان حد يضايقك وكنت انا اضربة وتقعدى تقولى عليا همجى وكنت اصلحك بشوكلاتة لغايت وفاة امى وانا اتغيرت كل حاجة فيا بس حبك الحاجة الوحيدة جوايا اللى متغيرتش لما عرفت انك هتتخطبى حسيت انى اتكسرت اكن امى ماتت تانى بس ربنا وقفنى وحصل اللى حصل وسبتية تقبلى يا حياة تكونى شريكة حياتى ونصى الحلو والجزء اللى فيا ديما بيشجعنى على طاعة ربنا
بصتلة وحسيت بدموعى على خدى ورديت علية وانا ببص فى عنية
_ اقبل طبعا
"لنا لقاء يوما ما .........."
#اسراء_ايمن
#كاتبة_المستقبل
