اليوم متجمعين ببيت جدي ،عمي سعيد وعائلته راجعين للعراق بعد غياب عشر سنين ( كانو مسافرين للبنان من عشر سنين ) مجتمعات عماتي وعمامي العصر ، الدنيا عصر ساعة ب٥ وهم جيتهم ساعة سبعة ، الكل متحضرين ومنتظرينهم بفارغ الصبر
.
.
.
.
ساعة بالسبعة وقفت سيارة مقابيل بابنا ونزلوا منها عمي وزوجته واولاده وسام عمره ١٧ وليث عمره ١٢ وبناته رؤى عمرها ١٨ سرى عمرها ١٤ ، سلمنا عليهم وبوسناهم وباسونا😂 تفاجئت ب وسام مد ايده يريد يسلم 😅 من الصدمة مديت ايدي وسلمت بس كولش انزعجت ، عدنا ميصير البنت تسلم بيديها ولو بابا شايفني ما رح يرتاح الا يرزلني😶 بس زوجة عمي حميد انتبهت وغمزتلي ، كولش ضحت منها .
.
.
.
.
.اشرحلكم عن الشخصيات المؤثرة بالقصة
رنا اسمي ١٧ سنة عمري ، بسيطة جدا شكلي عادي وما اهتم بنفسي دراستي اهم شي بحياتي ، من فترة توفت والدتي وبابا تزوج وحدة ثانية هي متهتملنا هواية تبقى عدنا اسبوع تروح لأهلها شهر ، بابا محامي وعندي ثنين اخوة وسيم ١٩ سنة ومروان ١٤ واخت وحدة زينب اربع سنين مدللتنا وفرح العائلة 💙
نرجع للقصة 🤗
بعد ما سلمنا عليهم وكعدنا بالصالة وتناقشوا عن حياتهم هناك بصورة عامة والموجودين كل واحد يشرح لعمي وين صار بدراسته لو شغلة وكذا ... (سوالف نتناقش بيها من نلتقي بواحد بعد فترة فهمتوني اكيد 😁)
گمنا احنا البنات وزوجات عمي حظرنا السفرة وكعدنا اكلنا بعدها فرشنا رجال عائلتنا ينامون بسرعة والنسوان دخلن بفراشهن بش ظلن يحجون ، أما نحنا طلعنا للحديقة مستلمين ولاد عمي رؤى وسرى وليث كاعدين بالصدر ونحنا حواليهم ونسألهم عن حياتهم بلبنان ، لبسهم يختلف عننا شوية ويلمعون 😂😂 عاد رؤى طلعت لابتوبها بيه صورهم هناك وشلون عندهم أصدقاء عائلة ويطلعون وياهم سفرات وكذا وابن عمي مصور الف صورة وية وحدة ع اساس حبيبته وكان رح يخطبها بس اضطر يتركها لأن لازم يرجع وية اهله للعراق ، نحنا بس نضحك نحسهم طالعين من مسلسل لبناني😂 وفرحانين عليهم صح رؤى أكبر مني بسنة بس طفولتنا كلها سوا وكولش سعيدة برجعتها ، بالنسبة لوسام مبين عليه مراهقته صعبة😂 عصبي وما ينجرع وما قبل يگعد ويانة اخذ كم شاب من شباب العائلة وطلعوا يفرفرون بالمنطقة ويدخنون🙄 ، بقينا كم يوم ببيت جدو بعدين كل واحد راح لبيته عندي عماتي بمحافظات ثانية ، ونحنا رجعنا لبيتنا بس هو مو كولش بعيد من بيت جدي ، بابا يخاف عليهم فاخذنا بيت قريب عليهم حتين بس يحتاجون شي نحنا قريبين عليهم ، زوجة ابوية هالفترة ببيتنا تعرف اكو طلعات وسفرات لازم تبقى تتونس😂😂😂
واني اسوي شغلي واروح لبيت جدو حتى اشوف رؤى وسرى وليوثي كولش احبهم واحس كل ايام طفولتي الحلوة رجعت برجعتهم نبقى بالساعات نسولف ونلعب وعمو سعيد اشترى سيارة وبعده ممستقر ع شغل يركبنا بالسيارة ويفررنا ويشتريلنا اكلات ويرجعنا للبيت 💙😍 تقربت المدرسة وبابا اضطر ينقل شغله لمحافظه ثانية وجدي وجدتي اخذناهم ويانه جدتي صح جبيرة بالعمر بس كولش تحبنا وتخاف علينا وادارينا هواية فاخذناهم ويانة وبيت عمي هم راحوا لمحافظة ثانية بيها اهل زوجته وهو اجرلهم بيت وبعد فترة عافهم وراح لماليزيا
بدأنا الدوام واني مدرسة جديدة ما اعرف بيها احد ضايجة كولش ، هاي زوجة ابوية راحت لاهلها وما تجينا بعد على مزاجها ومنا جدتي مريضة لازم اني الي اهتم بالبيت واني دراستي كولش مهمة عندي 😐😐 بعد تقريبا شهرين رجعت من المدرسة اشوف ابن عمي وسام عدنا فرحت ع بالي كلهم جايين دخلت عند جدتي اسألها فهمتني بس هو جاي لأن متعارك ويه امه وما يقبل يگعد وياهم ، ما اهتميت رحت حظرت السفرة وكعدنا نتغدى كملنا هم دخلوا للصالة وانا بقيت ارتب بالمطبخ وانتظر الچاي ، صبيت ورحت للصالة كاعدين وسيم ومروان وبصفهم وسيم شايل زينب بحظنه يشوف رسماتها ومن الجهة الثانية جدتي كاعدة تتابع مسلسل الاوراق المتساقطة ، اخذوا چایاتهم واني كعدت بصف جدتي هي متسمع زين وكل شوية تسألني شنو يگولون عاد تجي مقاطع حب وغرام 🤣🤣 خجلت كمت عفتهم رحت اقرى بليل اجى بابا وكعد وية وسام و بقوا يتناقشون طلع هاي مو اول مرة يتعاركون هو وامه وعركاتهم على أمور تافهه
المهم هو ديفهم بابا بعد وياها ما يگدر يبقى بمكان واحد ويريد يروح ياجر بيت ومن هالكلام ، هنا جدو هم كاعد من سمعه يحجي بايجار عصب وگاله اني عايش وانت تدور بيت بوحدك ما اريد اسمع ولا كلمة ومن اليوم حالك حال وسيم تكعد ويانة بابا هم نفس تفكير جدو لأن بابا يحب اولاد اخوانه واخواته عاد وسام ضل عدنا وصار فرد من العائلة 🤗👏،
طبعا كولش اخجل منه وما نحجي باليوم كلمتين اني خجولة ومو اجتماعية بس هو ما شاء الله حشاش درجة أولى ويضحكنا طول الوقت ويلاعب زينب هواية الحمدلله احسه شال حمل عني قبل جانت تلزك بيه ومتخليني اكمل شغله الا بطلوع الروح ضل أسبوعين تقريبا عدنا بعدها بابا سأله
بابا : عمو لا تفهمني غلط بس انت ما عندك دوام
وسام : بلي اني نقلت اوراقي وداومت شهر بمدرسة (اسم المدرسة ) بس هسه بعيدة صارت عليه ما اكدر اداوم
بابا: يا عمو حرام تضيع مستقبلك من خلافاتكم انت وامك باجر تروح تجيب اوراقك وتنقل لمدرسة وسيم القديمة
وفعلا نقل وسام أوراقه وصار يداوم ويانة نوبات الصبح يوصلني وسيم وهو يجي ويانة قريب المدرسة يعوفوني ويرحون ما اكللكم البنات بس يشوفوهم شلون يموعن 😂😂 طبعا بحياتهم ما شايفات هيج ولد حلوين وخلوقين، وسام ذكي بس ابدا ما يدرس يمكن يعاند اهله ويفكر اذا رسب يزعجهم وهو ما يفكر أنه بهالشي رح يدمر مستقبله ، مرة بابا جره من أذنه حتى يدرس وحتى مدرسين خصوصي لزمله وخطية هو متغير عليه المنهج والأساتذة هنا ميشرحون من قلبهم واني نابغة بالعربي 😂😂 مرة عنده امتحان عربي واجى يسأل بابا كم سؤال وبابا ناسي العربي ووسيم ميقبل يشرح اله يكول يكفيني قهر دراستي(وسيم يدرس طب اسنان مرحلة أولى ) عاد بابا صاحني شوفي بابا تعرفين هذا هنا ليش الإعراب بهلطريقة وهو المفروض بهالطريقة ، عاد اني وسؤلوني اعراب ببغاء وافتح 😂
كملت اباوعلهم فاكين عيونهم يباوعولي كتلهم
رنا : ها شبيكم
بابا : بنتي ما شاء الله ذكرتيني باستاذ وعد الله كان فيلسوف بالقواعد😂😂😂😂
رنا : اي بابا خشلتني☺😂 (ناسية وسام ويانة )
وسام : رنوش حبابة اشرحيلي باقي المواضييع ما اريد ارسب
رنا : ها لا مو عندي دراسة 😶
بابا : بنتي انتي لو تضلين تدرسين باليوم ٢٠ ساعة هم متشبعين دراسه كلها ساعتين درسيه وروحي كملي دراستج
ما اكوللكم شصار بيه ختنكت اني طبعا اساعد اولاد عماتي وحتى الي بعمري بس ذولاك متعودة عليهم من الصغر ، أما وسام من احنا وصغار ماكو بيننا كلام ابدا
كعدنا بالصالة بديت اشرحله اول عشر دقايق اتأتء😂😂
وسام : جاية تعلميني قواعد لو شلون الفظ الاحرف 😏
رنا : شتقصد 😶
وسام : شبيج بابا صار ساعة انتظرج تشرحين😂 مو تكول قبل نص ساعة مثل الببغاء تشرحين الإعراب
رنا : (ضجت لأن اني معروفه بشطارتي وكيف اوصل المادة لاغبى واحد ) اني ما ارتاح من اشرح لواحد ما اعرفه 😏 شوية بس اتعود على وجودك وشوف شلون اشرح
وسام : يعني ارسب هالمرة بسبب انو متعرفيني🙄
رنا : (من كال هيج ضجت) لااا مترسب اسمك صار درست عندي والله اذا ترسب و احد يسمع اموت من قهري ، خلص رايحة اسويلي نسكافيه واجي نبدي بجد
وسام : لعد قبل شوي جنا نشاقى 😉
رنا : باوعتله صفح ورحت
وسام : ويه حليب وبدون سكر
رنا : (لوحدي بالمطبخ ) استغفرك ربي فوكاها يتآمر
كملت وكعدنا اشرحله وانا اتخيله واحد من اولاد عمتي
بعد ساعتين
وسام : ما شاء الله عليج ولا استاذ عربي والله
رنا : شكرا ان شاء الله ترفع راسي بالامتحان ☺
وسام : شنو طموحج
رنا : ما اعرف اني ادرس وبس ما افكر بشي ثاني
وسام : واضح هالشي
رنا: شنو قصدك ؟ (سألته واني اعرف قصده ع شكلي انزعجت منه وقبل لا يحجي ) اني لازم اروح أراجع رياضيات وانت راجع الي كتبته الك قبل لا تنام
وسام : حاضر استاذة رنا 😄
رنا : تصبح ع خير
وسام : وانتي من اهل الخير
بعد يومين رجعت من الدوام اشوفهم يتناقشون واصواتهم واصلة للشارع ، دخلت الصالة
رنا : السلام عليكم، هاي شبيكم اليجي من برا يحسبكم تتعاركون
وسام : داحجيلهم عن درجتي بالقواعد وشطارة معلمتي
رنا : سألته بفضول شكد ؟
وسام : ٢٠ /٢٥
رنا : (كولش فرحت حسيت بفخر ) الحمدلله طبعا انت ذكي لو تركز بالدراسة تطلع الأول
رحت احضر السفرة لأن بعد شوية يرجع وسيم وليث اصلا مسائي دوامه وبابا يرجع المغرب ما يتغدى ويانة ، حضرت الصحون اشوف وسام اجى أخذهم وبعد شوية رجع اخذ الخبز والكلاصات (حبيت مساعدته😍☺ ) بس ما حجيت شي ، بعد ما كملنا اكل جدي وجدتي راحو يتفرجون تلفزيون
بقينا اني وهو وزينب ، هو حجه
وسام : رنوش حبابة عندي واجب قواعد ممكن تحليه الي
رنا: واني اكول ليش ساعدتني بالمطبخ😏😏 ما احله
وسام: حبابة بس هالمرة 🙏
رنا : اشرحلكياه وانت تعلم تحل بوحدك 🙄
وسام : ماشي امري لله
واستمرت باقي الايام نفس الروتين إلى ان صار ليلة العيد ، تجمعوا عماتي وعمامي عندنا، حسيت وسام ضايج ، تعودنا عالوحدة ولو يجي احد يزورنا اكثر شي نفرين وكم ساعة ويرحون😂😂 هالمرة لا يبقون كم يوم لا والنوب امه موجودة وهو زعلان وياها بس الي صار زين هو انو عمي هم جاي من ماليزيا حتى يعيد ويانة ، خلص اول يوم بالسلام والكلام والشقة والسبح وتحضير للفطور (يوم عرفة صايمين كلنا تقريبا )
ثاني يوم الصبح جتي زوجة بابا (اسمها سميرة اذكرها باسمها بالرواية اسهل 🙄) كولش اختنكت من شفتها صار لها كم شهر مختفية وحتى اليوم جاية بعد الضهر، تضمن ماكو تنظيف وطبخ ، ضلينا نستقبل الجيران ونودعهم العصر حسينا بملل فقررنا نطلع نلعب بالحديقة انقسمنا لكروبيين عندي ابن عمتي حمود (احمد ) بعمري اني وهو مثل الصديقات😂😂 الشاب الوحيد الي ميانة وياه وما اخجل منه ابدا ، اني وهو بنفس الكروب اما وسام صار من الكروب الثاني ، عاد اني هم حمود وياية ومختارة كل الاحبهم واللعبة الي دنلعبها اكثر لعبة احبها ومنا ضايجة على رجعة سميرة المفاجئة طلعت ضوجتي كلها باللعبة واضحك كأنو هاي ضحكاتي الأخيرة 😂😂😂 واخر شي فريقنا ربح ، عاد شوية وصاحونا النسوان نروح نساعدهم بالعشا، دخلت المطبخ عمتي سليمة كالتلي جيبي جداحة من الرياجيل الي بالمطبخ متشتغل ، طلعت من المطبخ شفت وسام
رنا : وسام انطيني جداحتك
وسام : ما عندي 😏
شفت حمود ، كتله حمود اريد جداحتك خالتي سليمة تريد تفتح الطباخ والجداحة متشتغل الي بالمطبخ
حمود : تدللين عيوني ، هاج اخذيها ، بس لا تكوليلهم من عندي ، يروح ابوية يعرف واترزل😂
رنا : فديتك ، لا خلص ما احجي شي 😂
وسام : فديتك😏
والى هنا ينتهي البارت الأول ، شنو رأيكم بالمقدمة ؟
