دخل علينا كام حالة عادية ، ملبوسين ومربوطين وموهومين لحد ما دخل علينا حالة من أغرب الحالات اللى شفتها والحالة الوحيدة اللى أتعلمت منها ،لان صاحبها شخص غير عادى!
دخل علينا شاب بيتحرك على كرسى متحرك وبتزوقه ست كبيرة فى السن , الست الكبيرة سألت على أبويا فقولتلها :
- أبويا بعافية ياحاجة وأنا اللى ماسك مكانه موقتا.
أتفاجئت بالشاب بيقول :
- أمال فين نصير ؟!!
قولتله بأستغراب :
- أيه ده !؟ أنت تعرف نصير ؟
قالى :
- أعرف نصير وأبن القاف!!
قولتله بأندهاش :
- وكمان تعرف أبن القاف !!!
قالى :
- وتصدق أنى ما أعرفش أبوك أصلا ؟
حاولت أسأل قرين الشاب عن معلومات , رفض تماما يدينى أى معلومة, قرينه عنيف جدا وكان هيهجم عليا كمان!
الشاب بص للست الكبيرة اللى كانت بتزق كرسيه وقالها :
- أستنينى يا أمى بره الخيمة.
هزت رأسها وخرجت بره الخيمة.
قالى :
- متحاوش تسأل قرينى مش هيفيدك بآى حاجة , خلى كلامك معايا أنا بس .
قولتله :
- طيب واحدة واحدة وفهمنى , تعرف أبن القاف ونصير أزاى ؟!
قالى :
- أعرفك بنفسى الأول .. أنا أسمى عيد وأنت أسمك أيه ؟
قولتله :
- مارو .. قصدى ماهر.
قالى :
- فرصة سعيدة يامارو .
أتلفت حواليه بطريقة غريبة وكمل كلامه وقال :
- أبن القاف ونصير جم عندى من حوالى كام شهر علشان يتواصلوا مع قرين جدك ناير .
حكولى أن أبوك الساحر نور ناير أتلعن على هيئة حيوان مفترس ,ومبقاش بيفرق بين العدو والصديق , وكانوا عايزينى أتواصل مع قرين جدك علشان أسأله عن العلاج , بس للأسف فشلت لآن جدك كان حاجب قرينه قبل مايموت .
قولتله :
- هو أنت !! .. نصير حكالى على الحوار ده قبل كده وقالى انك بتعرف تتواصل مع قرين أى حد مات , ده بجد؟!
عيد قالى :
- أها للأسف حقيقة، فى الأول كان الموضوع مرهق بالنسبة ليا جدا، لانهم كانوا بيسكنوا جسدى وبيلبسونى.
بس قدرت أتواصل معاهم وأقضى حوائجهم من غير مايلبسونى , اللى مات مقتول وعايز يدل على اللى قتله , واللى جثته مختفية ومحدش يعرف مكانها ,واللى عنده رسالة عايز يوصلها لأهله , وغيره وغيره.
