الشايب

البارت الثامن

الشايب٢
البارت الثامن

الكل بص لجومانة ومستني ردها
جومانة بصت لفهد وضحكت:والمفروض بقا بعد ما اعترفت أن بتحبني أن احنا نتجوز واختارك صح
فهد:اه
جومانة:غلطان يا فهد انا مش تحت امرك وقت ما تبقى عايزني يبقى ماشي ووقت لما تختار هند يبقى ماشي
فهد:بس يا جومانة
جومانة قاطعته:انا هختار طارق
طارق فرح جدا وزق فهد بعيد وفهد وقف مصدوم والكل اتصدم من رد جومانة...طارق مسك الدبلة ولبسها لجومانة وفهد واقف بينهم ومش مصدق أن جومانة خلاص بقت خطيبة طارق!!
فارس بضيق: بجد انا مش فاهم هما بيعملوا كدا لية
فريدة:أنا متأكدة ان جومانة بتحب فهد
ريم:انا مش فاهمة هي بتكابر لية؟
سليم بهدوء:جومانة شخصيتها قوية ومش هتمشي تحت أمر حد جومانة مش هتخضع لراجل مش وقت ما يقول حاجة هتقول ماشي جومانة ليها كيانها الخاص ومش هتسمح لاي حد يهده
الكل سكت ومضايق من اللي بيحصل
مالك بضيق:انا مش فاهم اية اللي عجبها في طارق دا
مليكة:مش ممكن تكون بتحبه
مالك:لا جومانة مش بتحب طارق اختي واعرفها بس مش فاهم لية مختارتش فهد
مليكة سكتت ومالك بصلها واستغرب هي ازاي هادية وجميلة كدا هي دايما معا بس النهاردة اول مرة يشوفها بطريقة مختلفة
مالك:تعرفي انك احلى واحدة في الخطوبة
مليكة ابتسمت بكسوف:وانت كمان وسيم
مالك ابتسم وسكت....الخطوبة خلصت والكل مشي وجومانة طلعت اوضتها من غير ولا حرف ونامت
تاني يوم مالك كلم فارس وحدد معا ميعاد الخطوبة واتففه انها هتبقى الخميس اللي بعد اللي جاي
فات اسبوعين والكل مشغول بخطوبة مالك ومليكة والاتنين قربوا من بعض جدا وفهد من ساعة الخطوبة مشافش جومانة ودا مضايقها...جيه يوم الخطوبة والكل جهز ومالك كان قاعد هو ومليكة على الكوشة ومليكة كانت فرحانة جدا ان هي أخيرا قاعدة هي ومالك في كوشة واحدة بس كان نفسها يكون مالك بيحبها زي ما هي بتحبه...مالك كمان كان فرحان أن هو قاعد مع مليكة في كوشة واحدة ومستغرب جدا فرحته حاسس بحاجة غريبة مش عايز يسيب مليكة نفسه تكون جنبه كدا العمر كله كان نفسه أن النهاردة يبقى الفرح مش الخطوبة معقول هو حب مليكة!!
جومانة قاعدة جمب سليم وعينها بتدور على فهد لحد ما أخيرا شافته كان واحشها اوووي هيبته اللي دايما بيدخل بيها ضحكته وطريقه كلامه بس ملامحه باين عليها الزعل بس هو مينفعش يزعل هو موجود علشان يضحك وبس عينها كانت عليه وهو أخد باله منها وعينهم اتقابلت في نظرة طويلة وبعدين هي بصت الناحية التانية
سليم:بتكابري لية
جومانة:ها
سليم ابتسم:عارف انك بتحبي فهد يا جومانة بس مش عارف لية بتكابري
جومانة:مش شرط تكون كل قصة حب يبقى نهايتها جواز مش كل الناس محظوظة زيك انت وماما في ناس مكتوب عليها تحب من بعيد لبعيد
سليم:لو الحب مش نهايته جواز يبقى عُمره ما كان حب حقيقي يا جومانة الحقي يا بنتي قبل فوات الاوان
جومانة بصت الناحية التانية وسكتت ولقت طارق بيتصل وطلعت برا علشان ترد
جومانة:الو يا طارق
طارق:سوري يا حبيبتي مش هقدر اجي النهاردة عندي شغل
جومانة:لا عادي ولا يهمك انا هقفل علشان الخطوبة
طارق:ماشي يا حبيبتي
جومانة قفلت وفرحت أن طارق مش هيجي هي مش عارفة لية مش بتحب طارق برغم أن طارق بيحبها جدا اشمعنا فهد اللي بتحبه ومش قادرة تكرهه
فهد:واقفة برا لية
جومانة بصتله:عادي
فهد:خطيبك فين؟
جومانة استغربت من كلمة خطيبي كانت ناسية اصلا أن طارق خطيبها
جومانة:عنده شغل
فهد بتريقة:عنده شغل اممم
الاتنين سكته شوية
جومانة:ملامحك عليها الزعل انت زعلان لية مفيش حاجة تستاهل زعلك
فهد ضحك بتريقة:مفيش حاجة بتزعل اممم انا رحت خطبت واحدة طلعت مش بحبها طلع اعجاب وطلعت اختيار غلط ويوم ما حبيت بجد حبيبتي اتخطبت لواحد غيري!!لابسة في أيدها دبلة واحد غيري!!النهاردة كان مفروض انا وهي ايدنا في ايد بعض وفرحانين هي بعيدة عني عندك حق فعلا مفيش حاجة تزعل
جومانة كانت مضايقة جدا على حال فهد بس هو لازم يفهم أن هي مش تحت امره
جومانة:بعد اذنك
دخلت بسرعة جوا وهي مخنوقة من نفسها جدا كانت دايما تحلم هي ومليكة أن اليوم دا كل واحدة فيهم تكون مع حبيبها دلوقتي مليكة مع حبيبها بس فهد بعيد عنها
الخطوبة خلصت والكل روح بيته....فات اسبوعين ومليكة ومالك طول الوقت مع بعض وفهد دايما في الشغل وبيشغل نفسه على قد ما يقدر علشان ميفكرش في جومانة وجومانة منعزلة عن الكل وبتفكر في اللي هيحصل بعدين وفارس وريم فرحانين من علاقة مالك ومليكة اللي بقت قوية ومضايقين على حال فهد وفريدة بتدعي أن نهاية القصة تكون سعيدة وسليم مركز مع الكل وحاسس أن دي مش هتبقى نهاية القصة
في يوم مالك كان قاعد في الجنينة وماسك موبايله وفاتح صورة مليكة وبيبتسم
سليم:فاتح اية كدا
مالك قفل موبايل بسرعة:ها ولا حاجة
سليم ابتسم وقعد جمبه:شوفتك وانت فاتح صورة مليكة
مالك:طالما انت شوفت بتسال لية
سليم برخامة:رخامة بقا
مالك ابتسم وسكت
سليم:بتحبها
مالك:مش عارف بس انا بحب وجودها لما بنبقى خارجين ببقى عايز تروح معايا البيت بحب ضحكتها وهزارها وكسوفها مش بحب أشوفها زعلانة عندي استعداد افع نص عمري في سبيل أنها تضحك بحس بحاجات غريبة مكنتش بحسها مع داليدا
سليم ابتسم:احب اقولك انك بتحبها
مالك استغرب من كلام سليم هو بجد حب مليكة!طب امتى!ولية!مش مهم كل دا المهم أن هو بيحبها
سليم ابتسم وقام بس مالك وقفه
مالك:شكرا
سليم باستغراب:على اية
مالك وقف:شكرا انك اعتبرتني صاحبك مش ابنك شكرا انك كنت دايما سند ليا وبتدعمني في كل قراراتي وحاجات كتير انا محظوظ انك ابويا
سليم ابتسم وحضن مالك بحب:انا فخور بيك يابني
مالك ابتسم والاتنين طلعوا يناموا
تاني يوم طارق راح عند جومانة واخدها علشان يفطروا سوا وكان عمال يتكلم عن تجهيزات الفرح
طارق:ها اية رايك
جومانة:ها قولت حاجة
طارق:انا قولت حاجات مش حاجة
جومانة:سوري يا طارق سرحت شوية
طارق:أنتِ متحمسة زي ما انا متحمس للفرح يا جومانة
جومانة بصتله وبصت للسعادة اللي في عينه وحست أن اختبارها غلط وان هي كدا بتظلم نفسها والأهم من دا كله أنها بتظلم طارق
جومانة:طارق عايزة اتكلم معاك في موضوع
طارق:قولي
جومانة اخدت نفس عميق:بص انا عارفة انك بتحبني واوي كمان وانت انسان طيب وجدع ومفيش منك بس انا مش قادرة احبك مش هعرف اسعدك انت تستاهل واحدة تحبك وتسعدك وانا للاسف مش هعرف (قلعت الدبلة)انا اسفة يا طارق
طارق ابتسم بحزن:بتحبي؟
جومانة:مين؟
طارق:فهد
جومانة مردتش وبصت الناحية التانية
طارق:عارف انك بتحبي
جومانة:عرفت منين
طارق:من لامعة عينك لما تشوفي بنبقى قاعدين في مكان وبتبقي دايما سرحانة طول الخطوبة كانت عينك عليه كان نفسي اكون انا مكان فهد بس يلا مش مشكلة
جومانة:متزعلش يا طارق انا بجد
طارق قاطعها:مش زعلان يا جومانة دا في الأول والآخر نصيب واحنا ملناش نصيب في بعض وبعدين احنا هتفضل صحاب صح؟
جومانة ابتسمت:اكيد
طارق ابتسم وقعدوا سوا وبعدين مشيت وهي فرحانة شعور انها ظالمة طارق مشي أخيرا حاسة أن هي بقت خفيفة ومفيش حاجة مضايقها غير حاجة واحدة بس أن فهد بعيد عنها...ركبت عربيتها وفضلت تلف بيها وقررت تروح عند فهد
مالك الصبح صحي وراح كذا مشوار وبعدين رجع البيت وراح لبس بدلة ونزل وراح بيت فارس وفارس فتح
فارس:اية ياض الشياكة دي
مالك بغرور مصطنع:طول عمري شيك هو انا اسمي فارس
فارس:انت تطول اصلا تبقى فارس دا انا اللي معلمك
مالك ضحك:طيب يا حبيبي روح نادي مليكة
فارس:لية
مالك بهزار:وانت مالك دا اية الرخامة دي
فارس:طب يلا يا بابا معندناش بنات للجواز
مالك:بهزر يا عم الحج مالك
فارس:أيوة كدا اتعدل..هطلع انديها
فارس طلع ونادى مليكة وهي نزلت لمالك
مالك:اطلعي البسي
مليكة:لية
مالك:اطلعي بس
مليكة طلعت بسرعة ولبست ونزلت ومشيت هي ومالك وطول طريق بتسال مالك رايحين فين وهو مش عايز يقولها...الاتنين وصلوا وكان مطعم على النيل والاتنين دخله
مليكة باستغراب:فين الناس
مالك ابتسم:انا حاجز المطعم لينا احنا الاتنين بس
مليكة:لية
مالك:عادي يعني تعالي نقعد
مليكة ابتسمت وقعدوا هما الاتنين ومالك طلب الاكل وفضلوا يتكلموا الاتنين مع بعض
مليكة:بس اية السر في انك عامل كل دا؟
مالك:عايزة تعرفي لية
مليكة:اه
مالك بجدية:عايز النهاردة يكون يوم مميز
مليكة:لية مميز
مالك:لأن النهاردة هتبقى بداية حكايتنا يا مليكة.. انا بحبك وعايز اكمل معاكي باقي حياتي
مليكة فرحت جدا ان مالك حبها وكانت دايما تدعي ربنا أن مالك يحبها وربنا استجاب دعاءها ودلوقتي هي اكتر واحدة فرحانة
مليكة:ياااا انا الكلمة دي كنت مستنياها من زمان اوووي يا مالك أخيرا حبتني
مالك ابتسم:كنت غبي واعمى بس دلوقتي مفيش غير حبك في قلبي
مليكة: ربنا يخليك ليا
مالك:ويخليكي ليا
نروين عبدالمنصف