MALI ✓ | Paperback

TUSUN 1

Mali 1
Keranjai jari: Mawar Sharon

"It takes a strong man to accept somebody else's children and step up to the plate another man left on the table." –Ray Johnson-

🌺Peterson🌺

“Ooo chak, ka nuan nulung aku? Nyin, nulung aku nyaga sida nyin enggau manah au.”

“Sapa?” ko aku nanya Lineker. Aku pan musinka tubuh malik asuh utai ti ditunjukka Lineker nya tadi. Pedaku indai, apai enggau Alma Shine.

“Indai enggau apai lakka aku mih nyaga. Shine nya bini nuan, nuan mih ka nyaga enggai nyadi nyerah ngagai aku. Ukai Shine nya anak manuk dih peneka ati meri asuh aku.” Tak nyelai ulah Lineker pedaku. Diatu baru aku beratika mua Lineker pucat amat baka ke nadai darah.

“Jaga nuan mih!” majak ga Lineker nyebut jaku nya. “Nyah, tu ibun memanah.” Enda ngadang Lineker narit jari aku. Maya nya aku bisi ngasaika utai lelain. Tak celap asai jari Lineker. Pereningku ke baruh, Lineker benung melurutka tinckin kawin seduai iya Alma Shine. Udah iya melurutka tinchin nya engkah iya ba atas tapak jariku.

“Anang bebangka nuan Ker! Eh nadai kami ka. Pasukka baru nya. Enda ringat Shine ko nuan enti iya meda.” Jukka aku jari Lineker tang genggam Lineker kuat amat. Ambi iya tinchin nya rasukka iya ba tunjuk manis aku. Tuchum Lineker.

“Ngam amat nya dih chak.” ko Lineker.

“Tuyu arr! Enggai kami dianu Shine legi. Nyah ambi pulai baru nya!” ko aku merak Lineker. Lineker enda ibuh. Meda aku kekusil deka muka tinchin nya iya pan bejalai melakangka aku. Bebelanda anak mit aku ngagai Lineker. Pautku tandan bau Lineker. Malik iya asuh aku. Maya nya mih aku perasanka mua Lineker bebali perenching. Mua iya beresi nadai agi gotye. Kemaya Lineker muai ragum iya? “Sakit nuan?” ko aku ga nanya nyepi jari Lineker majak celap nyau baka igi ais.

Lineker enda nyaut. Iya majakka bejalai. Laju Lineker bejalai pedaku nyau enda ulih titih. Bebelanda baru ga aku nitihka singkang Lineker. Aku belanda, iya semina bejalai tang iya lebih laju nyentukka aku nyau bepeluh terusur nitihka Lineker. Tetiba enda nemu bakani tua iya terengkah ba siti padang. Besai padang nya pedaku. Ba tengah padang bisi tangga. Lineker niki tangga nya. Lebuh aku datai ba senentang bungai ke bechura kuning nya sepiku kaki aku bebali berat baka pemerat batu bertan-tan.

“Ka mupuk aku chak.” ko Lineker. Maya nya mih aku beratika tangga burak ka dipeda aku nya tadi nemu nya remang. Alit atiku meda Lineker ulih berindik atas remang.

“Kini ke nuan? Aku ka mih enggau.”

“Empai maya nuan enggau. Ingat utaika pesan aku tadi.” Makin lama makin jauh Lineker niki ke langit dibai remang ke baka tangga nya tadi.

“Lineker pulai kitu nuan!! Shine nya bini nuan, nuan mih nyaga. Lineker ooo Lineker!!” Rerauh aku baka orang gila nengkadahka langit meda Lineker lesap dibai remang niki ke langit. Ohh nama mih utai ke benung nyadi tu, ko atiku din mucau sereta ringat kediri.

Ari bebali tampak setampak. Perenching mata panas nyau ngasuh aku silau. Ayung aku ngena jari. Jaku kepenudi dinga aku ka ditinggalka Lineker sebedau ayas iya tenggelam dalam penebal remang ianya, “Beri mih iya penyayau lebih gik ari penyayau ka kala diberi aku ngelamatu.”

“Lineker!!!!” ko aku nyerauh terus nyentukka dunya.

Huh.
Huh.
Huh.

Aku seseput, jatung dedegup kesal. Japaiku talipun, pukul 2.59am. Huh. Sekali tu aku betarit seput panjai, lepaska aku baru nya baru aku ngeraup mua enggau dua iti jari. Baju singlet burak ka nipis jempuk laban peluh.

Menua Kundasang, Sabah nyenyelap nya kati tau jempuk. Angkatku ari peninduk duduk ba puting katil. Bisi dua minit duduk aku angkat baru mansang nuju mija. Jengkauku insap enggau macis atas mija nyau aku pansut ke luar. Pintu asur (sliding door) dijukka aku ke tisi. Tungkun aku api macis, churku kia insap. Ya udah bulih insapku dedalam telan lalu luakka aku baru. Nya mih asap nya pansut nengah nyawa nengah idung.