MALI ✓ | Paperback

TUSUN 4

Mali 4
Keranjai jari: Mawar Sharon

"It takes a strong man to accept somebody else's children and step up to the plate another man left on the table." –Ray Johnson-

🌺Peterson🌺

Pintu wad kecemasan ditukangka orang. “Sapa laki Alma Shine?” Beguai aku mansang asuh lutur ka ngangau. Apai seduai indai entudi aku.

“Kati baka Shine?”

“Bisi gegaran mimit tang anang irau. Bini enggau anak nuan stabil. Telih ba pala iya mega udah diunsut ubat. Taja pia, malam tu iya kami tan ba wad. Nyema pagila nadai apa nama nyadi, baru iya dikemendarka pulai ke rumah.”

Berasai lantang atiku ninga penerang ari lutur Tian nya. “Lutur, ulih aku ngabas iya enda lama?”

“Ulih anang lama.”

“Terima kasih lutur.”

Tamaku agi wad kecemasan, gegining mataku ngiga Alma Shine. Kepemuas baru aku tepedaka iya benung duduk ba katil paling ujung. Alma Shine enda sedar ka penatai aku, benung tegenung panjai.

“Shine.”

Ninga aku ngangau iya nguing merening aku. Ari mua ke tusah diatu bebali gaga sereta besai tuchum diayanka Alma Shine. Iya entepaka dua jari minta berap. “Lineker, sayang amat-amat nuan nya?” Mata iya enda tetilap merening aku nganti aku nyaut.

Raupku mua Shine. “Son tu. Lineker udah parai, enda ingat nuan pia?”

“Hah!? Amat-amat udah parai iya pia?” Tetuyu pendiau Shine maya nya. Irau atiku meda.

“Au, amat.” Sepiku bereni idung ka nyabak. Ati aku pan siru baka Alma Shine. Iya lenyau laki ti dikesayau. Aku mega lenyau sapit ke ari kandung segulai. Lineker mih ke kaban, Lineker mih ke pangan. Bisi kaban bukai engka enda sebaka enggau sapit diri panjungka menyadi sedarah saum apai indai.

“Aku lelenggauka iya.” Beterutu aimata Alma Shine. Enda aku nemu bedayaka nya. Teduduk aku ba kaki katil. Bela nyabak tua iya.

“Wat.” Datai apai enggau indai, lutur Tian sekali.

xxx
🍁Luar ward kecemasan🍁

“Minta ampun tuan, kumbaiku nuan laki Alma Shine tadi.”

“Ukai lutur, niang laki iya menyadi sapit aku.”

“Patut mih Alma Shine balat tetekan. Nyadi baka ke udah dipadah aku tadi, malam tu iya ditanka kami ba wad. Kes iya akan kami rujuk ngagai pakar kaunseling. Irau laban emosi iya empai stabil. Utai tu ulih ngachau pengerai anak ke dalam kandung din.”

“Terima kasih lutur.”

“Sama-sama.”

Sempat ga aku tadi ninggalka lumur talipun ba staff nas Leah ngasuh misisku nyema bisi apa nama. Leah nya sama sekula enggau kenduai niang suba. Laki iya kabanku.

xxx

“Tumu amat nuan dani Wat.”

“Bisi miting legi sekula ka buka.”

“Pia.” Indai nyengau utaika dipanduk aku sebedau duduk. “Seari-ari kitak miting legi?”

“Meda gaya, engka enda asaiku.”

“Meda nuan bebekalka mayuh kontena.”

“Ni?”

“Nya arr. Kapa mantaika kontena ngemayuh nya dih?”

“Ooo ukai tu. Aku ka ngetu ba sepital legi nganjungka Shine pemakai.”

“Iya bisi misis nuan tadi?”