MALI ✓ | Paperback

TUSUN 2

Mali 2
Keranjai jari: Mawar Sharon

"It takes a strong man to accept somebody else's children and step up to the plate another man left on the table." -Ray Johnson-

🌺Alma Shine🌺

Tikau pulai ngagai pengingat Alma Shine...

“Nama pengawa nuan lu?”

“Marinate sayap manuk kena manggang lemai legi.”

Huh! Aku bedemuh ninga saut Lineker. Taritku siti bangku, duduk nunga Lineker ke benung kiruh nyendiaka perengka kena manggang. Bisi dua bisin sayap manuk, jani enggau sosej. Nyepi rekung aus angkatku, sekali aku ngerebakka freezer penuh enggau ai bir. Enda memunyiku. Japaiku butul ai kekola tuangku dalam gelas. Irup.

“Kati baka pala nuan saritu, bisi baik gik?” Purus, siumku lengan Lineker.

“Tetengut mih nya tang nyau baik gik udah empa aku Panadol.”

“Ke klinik tua lemai legi ka?”

Ninga aku nyebut klinik Lineker nguing merening aku. Raup iya muaku. “Sakit mimit aja kapa ka ke klinik. Bai ngirup pamoga gerai mih iya legi.”

“Nih! Kumbai enda munuh ai pamoga nya. Peda mua nuan nya takut aku meda balat amat kembai.” Bebekup gamal Lineker. Ngelamatu ngirup mih iya tang kesekalitu berupai lain mua Lineker. Nya atiku irau.

“Ka enda kembai, nadai ngelaungka lemai manggang. Udu makai utai tunu, ngirup bir, nadai becheck.” ko entua induku nyampuk.

“Tau diajar nuan anak nuan tu indai. Jaku aku enda ngasi ba iya.” Setanah tua indai ngelaban Lineker.

“Anang nganu sulu, anang nganu indai, kasihka nyawa. Eh indai, ni Son bisi talipun?” Alu kalih iya kebukai utai sebut. Nya aku geram amat meda Lineker.

“Nadai. Sapit nuan nya pedis pala gik indai ngaduka iya. Kitai deka ngintu ari Krismas diri sebilik, kini ke iya nyu melancong.” panjai munchung mulut indai muchau.

“Legi Ker nguji talipun asuh iya baru. Kada enda nitihka indu Pilipin Son ke Sabah kin dih indai?”

“Eh! Indu Pilipin nama nya, gila enggau Son ke dadak nya!!” ko indai nimbal Lineker.

Bisi endar pengawa Peterson nya kin. Aku tuchum aja enggai ngachau randau dua iku menyanak nya. Lebuh aku berati, tiap kali pulai, nadai kala betemu enggau ipar tuaiku ke benama Peterson aku. Kursus mih, melancong mih. Aruh ya lakiku Lineker udu muchau lelenggauka abang sapit iya.

xxx

Tembu meresi dapur, aku muat gari. Lineker tinduk bekuruh nunga tv. Tv kekuchau kediri nadai orang meda. Buntau bekau demalam. Nyau ngalihka pagi baru sida Lineker badu ngirup. Aku pan ngenudukka diri ngerimbai Lineker. Tipanku gari. Uh! Uh! Dingaku Lineker bedemuh. Mula ya aku enda ibuh. Udah nya bedemuh baru ga iya, inggar gik ari tadi. Ninga utai tak lelain, berumban aku angkat. Pangkuku pala Lineker. Tempik-tempikku kuyu iya ngambika iya dani.

“Sayang, dani! Nama pengawa nuan munyi tu!?” Mata Lineker pejam. Genggamku jari iya. Maya nya aku ke meda, darah Lineker niki ke pala, berupai dipeda laban iya burak. Lain tu, ko atiku din. “Indai ooo indai!! Apai, tulung!!”

“Nama nya nama!!?” ko indai sedanah nyaut ari tingkat atas. Seduai iya apai gegesah ngelawa tua Lineker ba bilik besai. “Lapa nuan jang, dini nuan pedis?” ko indai nanya.

“Sayang dani!!” Airmata aku sepa udah labuh.

“Salah tu indai wai. Aram bai ke sepital jang tu.” ko apai. Besaup kami tiga ngangkatka Lineker tama kereta.