برنامج عاداتنا🇱🇾

غدامس

غدامس مدينة ليبية تقع قرب مثلث حدود ليبيا مع كل من تونس والجزائر في الجزء الغربي من البلاد علي خط عرض 30.08 شمالا وخط طول9.03 شرقا ، وترتفع عن مستوى سطح البحر 357 مترا وتبعد 543 كيلو مترا جنوب غرب العاصمة طرابلس

يبلغ عدد سكان غدامس حوالي 25 الف نسمه

معظمهم من الامازيغ
تقع جنوب الغرب للعاصمه طرابلس

تقع على حدود التونسية والجزائرية

مش مطلة للبحر

س 1- السكان الأصليين للمنطقة؟

سكان الاصليين من الامازيغ والطوارق
س 2-الاثار الموجودة او الاماكن السياحية؟

الاثار الموجودة : متحف غدامس ، عين الفرس تقع في المدينة القديمة ، قصر مقدول في  غرب سور المدينة ، بحيرة مجزم
س 3-العادات متاعهم في الاعراس ( العريس-العروسة)؟

العادات زي اي عرس ليبي لازم اللمات وسهرات لعند اخر الليل

المهم عندنا يوم يلبسو فيه الناس ( يعني البنات والنساوين المتزوجات جديد)  لبس الغدامسي يلتمو فيه الناس في الخيمة ويغنو  الاغاني الغدامسية وتكون العروسة لابسة الحولي البودري وقاعده في الخيمة ومغطينها لعند ما يجو اهل العريس ويلتمو اهل العروسة والعريس ويمشطولها نسمو فيه نحني ( امشض)

وبعدها يدخلوها لداخل حوشهم   مع صاحباتها ويباركولها الناس من غير الاغاني والرقص وما الا ذلك زي ماتعرفي

وبعدها يجي يوم الحنه تلبس فيه النساوين المتزوجه لبس الغدامسي او البدلة لكبيرة او الصغيرة ويغنو الاغاني الغدامسية 

وفي الليل يكون خاص للبنات يلتمو فيه ويقعدو في الخيمة مع العروسة وهيا تحني نسمو فيه نحني ( يوم الشاهي)

يغنو يرقصو البنات ويغيرو جوهم يعني مش ضروري اغاني غدامسية اي اغاني

هدا عند العروسة ☝

عند العريس عنده يوم  واحد وهوا يوم الحنه يحني العريس ويبدو في الغني ( نسمو فيه نحني ازبمبك)  هدا خاص بالرجالة  يرقصو فيه وهكي ويجي وقت يرقص فيه العريس مع زوز من صحابه وبعدها يدخل لداخل الحوش وميقعدش في الخيمة بعد ما يرقص

طبعا في يوم عند العروسة ( الغدي) تعزم اصاحباتها في حوش واكثر شي يكون في حوش بروحهم يعني

واهلها يعزمو ناسهم ومعارفهم ويتغدو مع بعضهم على روحهم

وعند العريس نفس الشي ( الوليمة )  يعزمو الرجال من اقاربهم وصحابهم وهكذا والعريس مع صحابه بروحه نفس الشي

طبعا العريس طول العرس يكون بروحه مع مع صحابه يسمو فيه ( حبس)  يعني يقعد العريس في حوش ميطلعش منه لعند يوم الدخول

يوم الدخول زي اي عرس تكون العروسة في المزين تجهز روحها

والعريس نفس الشي

وبعدها يجي وقت الزفة تدخل العروسة للخيمة في يلي يدخلها خوها ولا بوها ولا خالها  ولا عمها وفي يلي لا تدخل بروحها 

المهم تقعد في الكوشة وتصور مع العيلة وصاحباتها طبعا قبل هالشي وقبل ما تجي لعروسة للخيمة تكون مشت تصور مع العريس في اي حوش من اقاربهم

وبعدها يجي وقت يزفو لعروسة لراجلها في يلي يجي العريس ويرفع العروسة وفي يل لا

يعني يرفعها خوها ولابوها لي حوش راجلها لعند ما يجي العريس من الجامع

وفي يلي يجي العريس ويرفع العروسة لحوشهم

المهم في هداك الوقت تكون ام العريس تستنى العروسة حتى تستقبلها في حوشها  وبعدها خلاص ترجع ام العريس لحوشها ويدخلو العرسان لحوشهم .
س 4- عاداتكم يوم الجمعة في المنطقة ؟

عادات يوم الجمعه : اكثر العوائل يلتمو مع بعضهم في هادا اليوم ويتغدو مع بعضهم او يتعشو مع بعضهم او الزوز في يلي مخصص وجبه خاصة لي هدا اليوم وفي لي عادي يلتمو العيلة ويغيرو جوهم مع بعض وخلاص .
س 5-اكثر اكلة مشهورة عندهم؟

البازين
س 6-بي شني معروفين اهل المنطقة؟

جاوبو انتم المتابعين
س 7-اشهر انواع الزرع في المنطقة؟

النخيل
س 8-اسامي المنطقة قديما؟

سيداموس

كيدامي .....
س 9-اشهر شارع في المنطقة؟

الحقيقة منعرفش شن اشهر شارع يعني نحسهم زي بعض

شارع تفرفرة

وازيت

تنقزين

بن وليد
س10-اكثر شي متشددين اعليه المنطقة ؟

حريصين على العادات والتقاليد
____________________
الحق البنت انسيتها اسفة
الكاتبة: لولو حبيب♥️