برنامج عاداتنا🇱🇾

شحات

مدينة تاريخية اسسها الاغريق في الجبل الاخضر في اقصي شمال شرق ليبيا وتبعد عن مدينة البيضاء بحوالي 10 كم

تعد من اغني المدن الاثرية في الجبل الاخضر، واقدم مدينة اغريقية اسست في ليبيا

وعدد سكانها في 2004

^43.376^ نسمة

س 1- السكان الأصليين للمنطقة؟

قبيلة الحاسي
س 2-الاثار الموجودة او الاماكن السياحية؟

اكيد ومعروفين اثار شحات موجودين في المنصورة
س 3-العادات متاعهم في الاعراس ( العريس-العروسة)؟

اول يوم العصبان عند هل العريس

وبعدها التفريشه ايجن قريبات العروس يفرشن حوشها

وبعدها السياق يجو هل العريس لهل العروس بتموين وسبق وذكرته في واحد من اكتاباتي وفي اليوم هضا العروس اتحني

وبعدها التطريفه عشاء عائلي عند هل العريس وفي الليل بككل يقدمو حلويات وموااالح وعصأئر ونفس الشي عند هل العروس لكن تختلف بلمة البنات

وبعدها يوم عادي عشاء عائلي و مرات في اليوم هضا اتكون تطريفه العروس

ويجوها هل العريس بعد العشاء بلكسوة وهضا انسمو فيه الرمو

وبعد الفرح

و هذين عاداتنا بكككككككككل اختصار
س 4- عاداتكم يوم الجمعة في المنطقة ؟

مفيش حاجة معينه فيه أنه اغلب العائلات يلتمن عند عيت جدهم وانديرو في سوق خضره في نص المدينه واحسن حاجة انه ايجونا السياااح من ككككل مكان في اليوم هضا
س 5-اكثر اكلة مشهورة عندهم؟

اﻷبراك ( المحشي احني انقولو هكي الطرابلسية وعنده اسم تاني ضولمة )الكسكسو الرز المبوخ
س 6-بي شني معروفين اهل المنطقة؟

مش نحنا الي نقررو الناس الي تقرر بس نا انشوف فيهم أحسن واطيب واعقل ناس

واني انشوف فيهم اطيب ناس والكرم اني امشيت وشبحت الكرم الي عندهم كيف

ربي يحفظهم♥️
س 7-اشهر انواع الزرع في المنطقة؟

مفيش حاجة معينه ككل حاجة نزرعو فيها ﻷن زي ماتعرفي المدينه خضره اي شي ينزرع
س 8-اسامي المنطقة قديما؟

قورين ا^ باليونانية^
س 9-اشهر شارع في المنطقة؟

الشارع الرئيسي ،وشباب الجبل ،السنافر، والسلااام، شارع الجزيرة، الكتيبة
س10-قصة قصيرة صارت قبل في المنطقة ودارت ضجة كبيرة؟

قصه مالهش فترة راجل لقا مراته مع واحد في الحوش وكلم خوتها وجا واحد منهم  وقتلها وهذي سببت حزن في جميع أنحاء المدينه
س 11-اكثر شي متشددين اعليه المنطقة ؟

مافيش حاجة معينه متشددين عليها زيهم زي أي ليبي أو أي شرقي يغارو على صباياهم أكثر حاجة

________________________
شكرا ويتي صديقتي الحلوة
JiwanALshrq016