حلقة15
رواية وتيني💗
للكاتبة Takwa Ali
___________________
إقتباسي
{عينًاكيِ خٌلِقَتْ لٍتُخْبِرْنىِ انّ لاِ جمّالْ بَعْدهَا❤❤}
___________________
مروا كم يوم ومزال يوومين ع مشية البحر واسبوع ع سفر ريماس وياسين
عندي اني وياسين اليوم عازمة عمتي وافنان وسام وعمي ع الغدي
كنت ف كوجينه نطيب درت كسكسي ب البصلة ومبطن وبوريك الجبدة وسلاطة ومسير ومحشي
ياسين: خش عليا الله يبارك الله يبارك مرتي حره وقعمز ع كرسي
اني: نقرض ف سلاطة سلمك وشن معناها حره
ياسين: معناها ناشطه او فالحه زي ماتقولو وياكل ف زيتون
اني: به يلي قلت كلمة كويسة ف حقي
ياسين: ضحك انتي تعرفي شنو انتي بنسبة ليا وني قتلك نبدا مش ياسين لو مخليتك تعشقيني وغمزلي
اني: تلفتت وجهي احمر تو نشوفوا من يخلي تاني يعشقه يا أستاذ
ياسين: به وصبا نا توا نغسل وبنعدي شور العيادة عندي كم حاله وبعدها بنعدي شور هلي ونجي هنا تبي شي من برا
اني: مسحت يدي اصبر شوي فتحت دولاب اممم نبي كنينكس ونبي مشروب وجيب معاك عصير طبيعي فراولة ومنجا وشكلاته ترافل
ياسين: بس
اني: اي🙂
ياسين:تكتبي يلي قلتيه هضا كلا في ورقة ولا دزيه ليا مسج مش حنذكرا هذا كلا نا
وطلع
اني: هدا غير هو يلي سألني شن نبي كتبت شن نبي وبعتهولة وكملت حوستي ف الكوجينه وتيت كل مواعين يلي بنقدم فيهم
جت ساعه 2وكملت كل شي وتيت طاولة الأكل لبست سروال قماش واسع لونه سكري وسورية عنابية ووشاح بيج ف سكري ودرت مكياج خفيف
__________
ياسين
نا: عديت شور العيادة ليا فترة هاملها
نا: هناء (المساعدة) كم حالة عندي للكشف اليوم
هناء: 4دكتور كشف و2مرور
نا: تمام بعد 10دقايق دخليلي
دخلت المكتب ولبست مريول وقمعزت ونراجع ف الحالة نين طق الباب
هناء: دكتور جت الحاله ندخلها
نا: تمام
ودخلت حاله ورا حاله نين تميتهم وعديت شور المرور وطلعت شور هلي
نا: ها يا امي نا ف طريق ره وتوا روحكم
امي: نرجوا فيك قتلك
