الحفلة بدت تاني والناس بدو يتجهو للدايرة المستلمينها شباب وبنات عيلة العين… ألين شغالة ترقص مع ران وامجد، فهد واقف وبصفق انس واقف قدام شهد وماسك يدينها وبرقصها نسرين واقفين جنبها وبصفقو.. علي كدا الحفلة انتهت انس واقف جنب شهد ومحاوط اكتافها بيدو وباقي الشباب مجتمعين حولهم..
امجد وهو بعاين لالين بقعر عينو: والله في وحدة كدا طلعت قااااطعة الليلة
ألين لكزتو في بطنو بكوعها:الله خلقني قاطعة صح ي احمد؟
احمد: صحين ي قلبي
الكل ضحك
فهد: لا بالجد دا منو الصمم ليكم الفساتين دي؟
دانة: نسرين اختارت القصة والقماش وانا اخترت اللون
ألين: وانا اخترت التسريحة
امجد: هسي دي تسريحة؟ بلاي عبارة عن باندة مسكتو بيها شعركم ..غايتو ألين عولقتكم
ألين: اصلا انت العرفك شنو بالفاشون؟
امجد ضحك بسخرية: م اسمها فاشون اسمها "عوارة بنات" ورفع اصباعو حركة علامتي التنصيص ديك
الاولاد ضحكو ،انس: اوافقك الرأي
فهد: كلامك صح
امجد عاين لاحمد نظام اها وانت؟
احمد: معااك ي اصلي
ألين ضيقت عيونها:مششششم جنس تخلف في الدنيا دي
ران: اساسا الم بعرف الموضة بقول عليها.. قلدت صوت امجد.. عوارة بنات
دانة ضحكت: خليهم خليهم الموضة دي اكبر من مستوي استيعابهم
امجد جرا ليها نور
شهد: اصلا قليل من الرجال بفهمو في الفاشون وكدا
انس: امممم… ورامي واحد من القليلين دي صح؟
شهد ضحكت: اكيد
… المهم اتونسو كدا بعدها طلعو كل زول مشا علي بيتو عدا دانة ونسرين مشو مع شهد بعد وصلو ومسحو الميك آب واستحمو وكدا رامي دقا ل شهد انبطحت في السرير وقبلت علي الحيطة وبدت تخلط ..دانة رقدت جنبها وهي بتفكر في امجد وتصرفاتو معاها.. م قادرة تحدد لو لسا بحبها ولا نساها.. يمكن بحبها بس بكابر او يمكن نسا حبهم لأنو العملتو ليهو زمان م هيين اتنهدت وشالت تلفونها عشان تطلع من المود فتحت النت.. جاها اشعار في الفيس "امجد عبدو قام باضافة منشور جديد" دخلت طوالي لقتو رافع صورة يدينهم الجبيل وكاتب" عشقتها عمراً وغدرتني ساعة... انتظرتها دهراً وخذلتني ساعة... اعطيتها قلبي لتجعله فتاتاً... سقيتها حباً وولها لتطعن ايسر صدري بخنجر الفراق المسموم.. تمنيتها ربيعاً وعفصت بي شتاءً قارصاً" غمضت عيونها بألم وهي بتنهد علي حالتهم بتحبو وبحبها بس مرات الجرح بكون اكبر من الحب اتذكرت اول يوم اعترف ليها بحبو ليها…
في المطار.. امجد 15سنة: دانة انا بحبك عارفة يعني شنو بحبك؟
دانة 13 سنة ضحكت: يعني شنو؟
امجد: يعني لمن اكبر واشتغل ح اجي اعرسك
نزلت راسها ،امجد: يلا انتو هسي مسافرين بس اول ما تصلي ح ادق ليك
دانة رجعت تبكي ،امجد: م تبكي ياخ مش انتي حبيبتي؟
دانة اشرت ليهو براسها نظام اي وقالت: بس ح اشتاق ليكم
امجد: وانا كمان ح اشتاق ليك بس اوعدك كل يوم ح اتصل عليك
دانة عاينت ليهو بعيون دامعة:وعد؟
امجد مسح ليها دموعها:وعد…
ابتسمت وهي بتتذكر انو وفا بوعدو بالرغم من انو لسا شافع غمضتت عيونها وهي بتتنهد بحسرة علي حب عمرها الضيعتو ب يدها ب تهورها…
في مكان آخر… كان قاعد في كراسي الجنينة ورافع كرعينو في التربيزة قدامو وتاكل راسو في الكرسي لورا وبعاين للسما....بحبها واشتاق ليها بس برضو زعلان منها ومتضايق من تصرفها الاخير موجوع من الطريقة الهجرتو بيها كل ما يتذكر الحصل ليهو بعدها قلبو بقسى ولما يتذكر ايامهم سوا برجع يحن.. نفسو يرجع معاها زي زمان نفسو يدق ليها تلفون ويحكي ليها عن احداث يومو زي ما كان بعمل زمان… بس كمان م قادر ينسي العملتو والعذاب الاتعذبو بسبب تهورها اتذكر........
يوم كانو ناس دانة راجعين دبي وهي وامجد قاعدين في الطوطحانية الفي الجنينة وهي بتبكي
امجد 17:خلاص ي جن نفسك ح يكتم بالبكا
دانة14:امجد ليه م حاسي بي؟ تاني م ح اقدر اشوفك ولا امسك يدك ولا اتنوس معاك زي هسي
امجد ضحك: حبيبي ي ناس.. بس اوعدك م ح اخليك تشتاقي لي بعدين انا كل يوم بتكلم معاك اسكايب
دانة ارتمت في حضنو: من هسي مشتاقة ليك
ضحك وهو برفع عيونو للسما عشان يمنع دموعو م تنزل ربت علي ضهرها بحنية وقضو باقي يومهم داك كلو هي تبكي وهو يحنس فيها مع انو حالتو م افضل من حالتها….
عاين للطوطحانية المختوتة علي بعد امتار منو ابتسم ليها ..ابتسم للحظات الجميلة الجمعتهم فيها بس كمان اتذكر آخر ذكرى اتذكر كيغ رددت ليهو "بكرهك" وكيف انهت حب عمرهم بطريقة متهورة رجع راسو وغمض عيونو وهو بقول: ي رب..رحمتك…
سلاما علي اصحاب العيون الساهرة علي الذين تبدأ معاركهم عند الواحدة صباحا، اولئك الذين يشاركون عقرب الساعة دقاته بأعينهم الذين تعحز حتي الموسيقي علي مقاسمتهم ليلهم وحدها الذكريات من تستطيع ذلك.. اصحاب الهالات الذين تزيدهم جاذبية، اما الذين ينامون الليل فلا سلام عليهم ولا يحزنون…
#يُتبع…
mosha🌸✨
