بعد مرور اسبووع...
الليلة سفر وعد..بعد ما وليد انتهي من اجراءات نقلها..
اترمت في حضن امها للمرة التانية وهي بتبكي..
نادية"امها" ببكى:احي ي بتي الحتبعدي عني
رامي من ورا وعد:شنو ي وعود..الطيارة ح تفوتك
واشر لأمو نظام خلاص م تبكي
وعد فكت امها وهي بتمسح في دموعها البنزلو اصعاف بعد كل مسحة
نادية:ربنا يغطيك ي بتي ويحفظك من كل شر..وتصلي سلامة غانمة ي ربي ي الله
وعد حركت راسها نظام اي وهي م قادرة تتكلم بالبكى..اتلفتت علي نسرين الابتسمت ليها اول ما عاينت ليها ومشت عليها خطوتين
نسرين فتحت ليها يدينها وعد اترمت في حضنها..حضن بت عمها ورفيقة عمرها
نسرين رفعت عيونها للسما عشان م تبكي وقالت:وعوود..فكتها وبقت تمسح ليها دموعها..م تبكي ي جميلة ابقى عشرة علي اخوي ااا؟
وعد ضحكت ومسحت دموعها
بعدها ودعت احمد..بعدو فهد وانس وامجد
اتلفتت علي ران الخاتة يدينها في خشمها وبتتخجا بالبكا
جات عليها وقالت:بختك هدومي كلها بقت حقتك..حتي الكيموني الابيض
ران ضحكت بين دموعها:م عندهم معني بدونك..حضنتها..البيت كلو م عندو معني بدونك
وعد بكت زيييييين مع اختها
ألين ختت يدها في ضهر ران وقالت:رانوو..م تبكي بس اهم شي ي وعود ترسلي لينا زيارات صح ي ران؟
ران فكت من وعد:اي اهم شي
وعد ضحكت:بس كدا عيوني ليكم
حضنت ألين شدييييد ألين دموعها جرو
وعد فكتها وقالت:اجي القاكم عقلتو ااا؟
ألين بين دموعها:بنفكر بنفكر وعد ودعت شهد الكانت بتبكي شديييد ودانة وبرضو كانت بتبكي
عبير واقفة وعيونها اتملو بدموع حضنت وعد وقالت:تصلي بالسلامة
وعد حركت راسها نظام الله يسلمك..
مشت لحبوبتها دنقرت عشان تحضنها لأنها كانت قاعدة
حجة عواطف وهي بتسمح علي شعر وعد:ابقى فاالحة ي بتي وامسكي بيتك وراجلك املي ليهو وقتو عشان م يحس بالغربة
وعد بتحرك في راسها نظام طيب وهي في حضن حبوبتها
حجة عواطف باست يدها مساااافة وقالت:الله يحفظك ي بتي
بعدها وعد باست راس حبوبتها ويدها ووقفت علي حيلها ودعت عبير عمتها وابوها واعمامها الاتنين..اتحركت علي الباب بعد سمعت رامي بقول ليها:وعووود الطيارة دي م حقة ابوك
وقفت جنب الباب واتفلتت عاينت ليهم نفر نفر ابتداء من امها الخاتة التوب في خشمها وبتبكي وران المحاوطة اكتاف امها بديها وبتعاين ليها..ألين دانة شهد عبير بالجهة التانية نسرين البتبكي واحمد ماسكها انس فهد امجد..ابوها القلع نظارتو وبمسح في عيونو وهو مدنقر اعمامها الاتنين وعمتها..حبوبتها…طلعت بسرعة قبل تغير رايها وتلغي السفر...
كيف ح تقدر تبعد عن اسرتها..اصحابها..البلد الاتربت فيهو وبين شوراعو…
وصلو المطار وبسهولة وسلاسة خلصو اجراءاتها..رامي وقف قدامها ومدا ليها الجواز جواهو التذكرة بعد ما ختا ليها شنطتها الحتسبقها للطيارة في السير
وعد عاينت ليهو مسااافة..يداب اسبوعت انها ح تسافر بدون رجعة
رامي مسك يدها مسكها الجواز وقال:لا يُكلف الله نفساً الا وسعها..لو ربنا م عارفك انك قوية وقدر قسمتك دي م كان اداك ليها
اترمت في حضنو وهي بتبكي
رامي العبرة خنقتو:م بعيدة ي وعد طيارة وحدة ونلاقاك في وشنا
ابتسمت بين دموعها وهي في حضنو
سمعو النداء للرحلة..
باس شعرها مسااااافة بعدها قال:طمنينا عليك اول ما تصلي
فكتو وهي بتحرك راسها نظام طيب..
رامي ابتسم:يلا في حفظ الرحمن
مشت وهو وقف بعاين ليها..وصلت حتة كدا بعدها م ح تشوفو..اتلفتت عليهو رفع ليها يدو نظام..سلاام
شدت يدها علي الجواز وفكرة انها تاني م ح تشوف اهلها قريب بدت تعمل ليها وجع بطن...خلال ربع ساعة كانت قاعدة في مقعدها المخصص في الطيارة وربطت الحزام..
