سمعو صوت كواريك نسرين:دا شنو دا؟
امجد وقف عزف:شنو؟
سكتو عشان يسمعو.. ولأنو الدنيا ليل وصاانة سمعو صوت راجلين بكوركو في بعض
احمد:شكلهم نفرين بتشاكلو
نسرين: والبجيهم هنا شنو زي الوقت دا؟
وطبعا اصوات الكواريك زايدة
انس وقف علي حيلو سريع ومشا علي السور الجهة المطلة علي غرفة ابو هيما"الغفير"وناداهو:ابو ابرهييييييم
الدنيا صننننننت انس اتلفت عليهم نظام اها العمل شنو؟
بعدها سمعو صوت طلق رصاص..رصاصتين سريعات ورا بعض
البنات غطو اضنينهم وصرخو
احمد اتنفض وقف علي حيلو وبقى يلبس في سفنجاتو
نسرين وقفت:احمد ماشي وين؟ م تنزل
احمد باستعجال:م بتجيني عوجة انزلو تحت انتو
ومشا نسرين اتلفتت علي وليد الكان ماشي ورا احمد برضو وقالت:وليد م تنزلو..دقو ل 999 بس
وليد م ردا ليها ونزل
امجد ختا الجيتار ووقف علي حيلو نسرين جات عليهو:امجد...امجد امشي ناديهم وتعال ديل بكونو سكاري ساكت بعوقكم م تنزلو
امجد ربت علي كتفها:نشوف الحاصل شنو ونجي
ومشا وفهد وياسر كانو مشو قدامو
انس واقف وبعاين لنسرين العيونها رقرقو وباقي البنات المرعوبات…م قدر ينزل يخليهم
انس:ارح تحت..ادخلو غرفكم وارتاحو لحدي ما نحنا نجي
وفعلا اتحرك ووراهو اختو وبت خالتو وبت عمو وبت عمو التانية وبت عمتو…في هذه الاثناء كان احمد مشا ل ابو هيما لقاهو طالع من غرفتو وهو زاتو مستغرب في الاصوات دي…امجد وياسر وفهد مهرولين هرولة،وصلو تحت تزامنا مع فتحة احمد ووليد للبوابة الكبيرة…الدنيا كانت صااانة ومف زول قدام البوابة طلعو من البوابة خطوتين كدا لقو حاجة كبيرة مرمية شمال البوابة ولمن قربو منها لقوها جثة!!!
امجد ختا يدينو في راسو بخلعة: لا أله الا الله
ياسر كان خاتي يدو في ضهر امجد نزلا بخلعة وهو مبقق عيونو
فهد تم ليهو الشهادة في سرو وهو مطير عيونو برضو
احمد اتلفت سرعة علي وليد وليد عاين ليهو وبلع ريقو...دي مشكلة او بالاصح كااارثة
في اللحظة دي انس جا جاري واول م شاف الجثة كورك:داااااا شنووووو دااااا؟؟؟!!!
وليد غمض عيونو واتنهد
احمد بس بعاين لوليد..حاليا هم اكبر اتنين وباقي الشباب ديل في عهدتهم ح يعملو شنو؟ ويتصرفو كيف؟
وليد كان بفكر في نفس الشي..يدقو لأهلم يوريهم؟لا لا ح يخلعوهم ساكت وامهاتهم م حمل خلعة زي دي
امجد بس مثبت عيونو علي الجثة وبمرر لسانو علي شفتو التحت ببطئ كدليل علي توترو
احمد:نحلقو المستشفي؟
فهد وهو بقعد علي كرعينو قريب للجثة:م ظنيت يلحق…م قعد يتنفس
احمد عاين لوليد نظام اها العمل شنو؟
وليد وهو بدعك في جبهتو:نشيل تلفونو ندق لزول من معارفو
امجد:تؤ..احسن م نهبشو من الاساس خلوهو في حالتو دي وبلغو الشرطة
احمد:اي ويجو يتصرفو هم
وليد حرك راسو نظام اي
انس وهو بلز المسدس الواقع في الارض برجلو:عان خالي ليكم الطبنجة كمان عشان لمن تتحيرو وم نعرفو تعملو شنو ترصصو روحكم فت مرة
"دا وقت هزار هسي؟🙄👋🏻"
امجد اتلفت عليهو بسرعة:انت خليت البنات براهم؟؟؟؟
انس فتح خشمو عشان يرد
فهد:م جادي يلا
وهرول ل جوة
انس رفع اكتافو:نزلتهم الغرف تحت
احمد وهو بهبش في تلفونو عشان يدق ل999:حتي ولو تحت لازم واحد مننا يكون معاهم
امجد حرك راسو نظام اي وهو عيونو علي الجثة
احمد:الو..سلام عليكم…معاك احمد عبدالله العين...انا حاليا في مزرعة في بداية الجيلي و…الخ
جوة عند البنات نسرين ماشة وجاية بقلق...عبير ودانة قاعدين في كرسي جلوس ودانة بتبكي…وعد وألين قاعدين مع بعض وألين بتبكي… وران قاعدة في كرسي براها ومربعة كرعينها وبتعاين ليهم
فهد جا داخل
نسرين مشت عليهو:اها في شنو برا؟ طلعو سكاري صح؟
باقي البنات لمن شافو فهد وقفو عدا عبير
فهد:ااا…لا اي م عارفين
نسرين:فهد لقيتو شنو برا؟
فهد: جثة..
نسرين طق قعدت..وألين ودانة وران اتخلعو عبير يداب حست بخطورة الموقف قامت وقفت..وعد ختت يدها في كتف نسرين وهي بتسمع في فهد
فهد تما كلامو:تقريبا هم اتنين متناقرين في حاجة وواحد رصص التاني
دانة والعبرة خنقتها:ومات؟!!
فهد حرك ليها راسو نظام اي
ألين انفجرت بالبكا...اساسا موجوعة وعايزة ليها سبب تبكي بيهو
نسرين ضربت يديها الاتنين مع كرعينها:سجمنا سجمنا سجمنا
فهد:نسو روقي
نسرين:دي جثة ي فهد جثة دا قتل م لعب
فهد:اكيد م لعب ونحنا ح نحل الموضوع دا بس انتو اهدو وم تخافو كدا
قال كلكتو الاخيرة دي وعيونو علي ألين المغمضة عيونها وبتتخجا بالبكا
وعد اشرت ليهو براسها نظام طيب
فهد:كدي اشوف الجماعة ديل
نسرين:م تهبوشها ي فهد تقوم بصماتكم تلصق فيها كمان..واحمد،احمد يزح منها
فهد:طيب بس انتو م تقلقو كدا..دندون م تبكي
دانة حركت ليهو راسها نظام طيب...طلع ليهم برا
امجد:اها لقيتهم قاعدين كيف؟
فهد:متجرسين شديد وبالذات ألين ودانة
امجد بلع ريقو..تقريبا كان عارف انو دانة اكتر وحدة ح تكون خايفة في المواقف دي
فهد لأحمد:ونسرين م ح تطمن الا تمشي ليها
احمد اتنهد و م ردا…نسرين بطبعها حكيمة وخاتة الرحمن في قلبها بس لمن الخطر يكون بهدد احمد م بتعرف الحكمة طريق لعقلها
فهد:بلغتو؟
امجد حرك ليهو راسو نظام اي
فهد اتنهد: ح ياخدو اقل شي ساعتين عشان يصلو
ومشا وقف جنب امجد..امجد وياسر كانو واقفين جنب الجثة ووراهم علي بعد خطوات كدا احمد ووراهو وليد وانس متكل في كتفة البوابة…
