"الله اكبر ..الله اكبر.. "
قطع شرودو صوت اذان الصبح فرك عيونو بتعب وهو بستغفر وقام دخل الحمام يتوضا عشان يمشي يصلي في الجامع…
رامي صحا بصوت الاذان فتح عيونو بعاين للسقف وخلال ثواني استرجع الواقع ابتسم لبداية اجمل يوم في حياتو قعد علي حيلو بكل نشاط وقف واتجه علي الحمام عشان يتوضا…
فتح عيونو علي صوت امو"عبير":فهد الصلاة
فهد قعد علي حيلو ورفع تلفونو يشوف المنبه ليه م دقا، شوية كدا ورجعو مكانو واتجه علي الحمام اتوضا وجا طالع فرش مصلايتو وكبر وبدا يصلي بخشوووع… الله اكبر.. اول ما سجد خطرت ببالو هي ابتسم وهو بقول "سبحان ربي الاعلي" 3 مرات اتنهد وهو لسا ساجد م عارف روحو حاسي بشنو كل العارفو انها بقت م بتفارق تفكيرو اردف"اللهم هي" وقام واصل صلاتو….
جات طالعة من الحمام ووشها مغسل دموعها مختلطة بموية الوضو فرشت مصلايتها وهي بتقول: استغفر الله العظيم
بدت تصلي وهي ماسكة روحها بالعافية واول ما سجدت انفجرت بالبكا وهي بتدعي ربها يلطف بحالها ويحنن قلب امجد…
في نفس الجناح.. مبتسمة وهي ساجدة ولسانها م قادر يوقف عن كلمة الحمدلله.…
احمد وقف عربيتو جوا المزرعة البتبعد ساعتين عن الخرطوم ونزلو هو ومرتو… نزلت واتجهت لاخوها الكان مبيت في المزرعة من بعد الحفلة عشان يجهزها
نسرين: اها
انس: م تخافي كلو جاهز
نسرين: شركة الطعام ح يجو بعد ساعة نضفت ليهم الحتة الحيطبخو فيها؟
انس: اي وشركة المناسبات جو وبدو يجهزو الجنينة
احمد جا عليهم: انس الجهة الجنوبية دي ليه م نضفوها؟
انس ختا يدو في جبهتو بتعب: امبارح قلت ليهم نضفوها ولما جيت بعد الحفلة لقيتها في حالتها
نسرين: م مشكلة مف زول ح يمشي عليها اهم شي الجنينة والفلة يكونو نضفوهم
انس: اي نضفوهم بس عفش الصالة م مرتب
نسرين: م مشكلة هسي بنرتبو
انس: تمام رتبوهو وانا بتابع شركة المناسبات ديل
احمد: تمام.. اتلفت علي نسرين.. يلا
اشرت ليهو براسها نظام طيب واتجهو علي الفلة الصغيرة الموجودة في نص المزرعة.. دخلو نسرين قلعت عبايتها ختتها بالجنبة وبدت تجرجر كراسي الجلوس عشان ترتبهم
احمد جا عليها: دقيقة دقيقة انا بزحهم ليك
لزاهو منها رجعت لورا وهي بتقول ليهو: ديل جيبهم بالجنبة دي
المزرعة طبعا كبيييرة في نصها فلة صغيرة كدا متكونة من طابقين التحت عبارة عن صالة كبيرة فيها طقوم جلوس بس وفي نهايتها المطبخ والطابق التاني فيهو غرف كتييييرة مجهزة بحماماتها وقدام الفلة الجنينة حته كبيرة كدا مسورة بشجر متوسط كدا في جنبة كدا في بدايتها م فيها شجر زي الباب كدا وبجاي قصاد الفلة.. بعد الجنينة بالجهة الشرقية في اسطبل الحصين وقدامو حمامات كتييرة للرجال وجنوب الفلة في الجهة الم اتنضفت دي مزروع فيها برتقال ونخيل وكدا….
الساعة 7 ص…..
نزل من عربيتو واتجه علي ود عمو ال ح يبقى نسيبو بعد ساعات
رامي: ابو النسب
انس: اووو العريس الجابك بدري كدا شنو؟
رامي: والله قلنا نشوف الوضع ماشي كيف؟
انس: عيب عليك ..م تشيل هم لأي حاجة كلو تمام
رامي ربت علي كتف انس وهو بقول: كفو كفو
اتلفت علي عربية احمد وقال: احمد جا
انس: اي من بدري… هو ونسرين جوا
رامي: كدي امشي ليهم واجيك
انس: طيب
واتجه انس لعامل من شركة المناسبات وهو بقول: لا لا لا الكوشة ختوها بالجهة التانية
رامي دخل وهو بتنحنح ، نسرين لبست عبايتها لأنها كانت لابسة بنطلون وتيشريت
احمد: اووو العريس النفض الكيس
رامي ضحك: صباح الخير
احمد: صباح النور.. الاخبار شنو؟
رامي:والله تمااااااام حمدلله
احمد ضحك: ليك حق والله
نسرين ابتسمت: ربنا يتم ليكم علي خير
رامي: اللهم اميين وعقبال ما نفرح بعيالكم
نسرين اول ما سمعت الكلمة دي حست بحاجة جواها اتكسرت اتفلتت علي الجهة التانية وغمضت عيونها بأسي لمن سمعت احمد بقول: اللهم امييين في حياتك كدا
رامي استأذن لأنو ماشي الصالون وكدا
احمد جا علي نسرين: اها والطقم دا ح نوديهو وين؟
نسرين عاينت ليهو مسافة وبعدها رمت نفسها في حضنو
احمد ضحك: حبيبي
نسرين: احمد.. انا محتاجة حضنك
احمد خت يدو في راسها والتانية في ضهرها وهو بقول: خليكي فيهو طول العمر
في اللحظة دي انس توووشك دخل ضحك بصخب لمن شافهم وكورك:راعو للعزابة الزينا ياااخ
نسرين زحت من احمد ادتهم ضهرها واستغلت فرصة انشغال احمد مع انس عشان تمسح دموعها
احمد ضحك:خلاص هانت اشتغل عشان نشوف ليك بت الحلال
انس: بت الحلال قاعدة بس الله يسهل
احمد: خاالط من ورانا ي انس؟
انس: م خالط والله… ربك يهون بس
احمد: ان شاء الله
في اللحظة دي ألين وران جو منكشحين
احمد:ولو م لقيتها بديك ألين المجنونة دي
ألين جمدت في مكانها وعيونو لمعو.. انس قلبو قرب يطلع من مكانو لما شاف ران وألين مركزين مع كلام احمد بلع ريقو وقال:كدي اشوف العمال ديل
وطلع، ران سلمت علي احمد ونسرين وألين بالها م معاها
نسرين: امي وابوي جو؟
ران: لا لا جابنا بابا
نسرين: طيب يلا طلعو شنطكم دي فوق وتعالو عشان تساعدوني
الين وران: اوك
واتجهو علي السلم
احمد راقبهم وبعدها اتلفت علي نسرين: اها وقفنا وين؟
نسرين ضحكت وهي بتلزو وقالت: وقفنا في انو المفروض تجر الطقم دا علي جهة المطبخ
احمد رجع خطوة من لزتها وهو بضحك جراها وطبع بوسة سريعة بين حواجبها وهو بقول: عيوني ليك ي جميل
نسرين: يسلمو لي العيون انا احمد اتجه علي الطقم عشان يجرو ونسرين طلعت فوق تشوف الغرف
"من هذا المنبر اعلن انبراشي ب احمد عبداللّه العين🙈👋🏻"……
