كل عائلة العين بدت تجهز لعرس ولدهم وبتهم.. شهد طبعا طوالي نزلت السوق الشيلة والارياح وبتاع الاسبوع الاول دا كلو قصتو تصحي الصباح تمش السوق ترجع بالمسا تنوم وتصحي تاني تمشي السوق وعلي هذا الموال لحدي ما خلصت حاجاتها… الاسبوع التاني بدو ليها الحبسة والدخان نسرين طبعا فاالحة في الحاجات الزي دي"نسرين الهنا"…
الشباب ديل مشغولين بالفنانين وألين وران بالفساتين والقصات وكدا.. نسرين كانت احمد بوديها الصباح بيت ناس امها ولما يجي راجع من الشغل يسوقها ابا يخليها ليهم… لحدي قبل العرس ب اسبوع كدا ستفت شنطتها وكبرتها بيت ناس امها…
ومع بداية الاسبوع ابدت الحنن السنن… رامي كان عندو 3 حنن بدت من يوم الاتنين كانت في الصالة بطه سليمان الاولاد ديل حتوهو حت نضيييييف بعدها رجعو كلهم فلة عبدالرحيم والبنات مشو فلة عبدالفتاح ..اساسا العيلة كلها متقسمة جزو في بيت العريس وجزو في بيت العريس…
يوم التلات كانت الحنة دي جيه في الصالة عاملاها ليهو حجة عواطف "حبوبة الهنا👋🏻 " الاولاد"رامي،احمد،امجد، انس،فهد" كانو لابسين بناطلين جينز اسود وقمصان سودا وجكت بدلة بيجي فيهو رقعة في الكوع بالاسود كانو خرافييييين ورقصو رقيص الجن رامي دا حتااهو لمن قال بس…
يون الاربع حنة شهد في صالة عاملاها ليها حجة عواطف برضو جابو ليهم ميادة قمر الدين "آآه انا ي غزالي💃🏻" البنات "نسرين ، وعد، دانة، ألين، ران" لابسين فساتين سودا شامو مع الجسم وفيها فراشات بالفضي وعاملين شعرهم ضنب حصان فيهو حاجات كدا صغار مشتتة بالفضي والميك آب دا عجيب.. شهد جات وكانت لابسة فستان زي بتاع ساندريلا لونو سمواي فااااتح والاكسسري بالفضي وجايبة شعرها كلو بالجنبة وخاتة بالجنبة التانية دبوس شعر كبير شكل طاؤس الاولاد "عدا رامي طبعا" لما جو وشافو البنات عملو كدا🤤..امجد بقى يعاين ل دانة الفستان كان زابط شديد مع جسمها وضنب الحصان جااي مع ملامح وشها وميكبها كان خفيف بس الروج احمر صااااااخ… احمد برضو بقى يعاين ل نسرين وشعرها العاملاهو ضنب حصان ليها فترة طويلة م فكت شعرها جسمها كان رهيب شديد وم بتديك احساس انها متزوجة عاملة ميك آب بالبنفسج الغااامق…
المهم رقصو رقيص الجن والاولاد جو عملو دايرة حولين شهد ومعاهم ألين وران ووعد ونسرين ..دانة قاعدة جنب امها ..ميادة بدت تغني غنية "كان معاي سمنة علي عسل ي ناس" دانة ابتسمت وهي بتعاين لامجد عاين ليها اشرت عليها وعليهو نظام كنا سمنة علي عسل ..ضحك بخفة وتابع رقيصو… في الفاصل الغنائي😂 هي قصدي الفاصل البتعشو فيهو… .انس جرا فهد ومشو علي جهة البنات وبقو يتونسو معاهم شوية كدا ونسرين جرت دانة عشان تمشي معاها الحمام "احمد طبعا كان بشرف علي توزيع العشا عامل فيها مسؤل وكدا🙊"
نسرين ودانة اتجهو علي جهة الحمام لاقاهم هادي سلمو عليهو
نسرين: طيب دندون انا ح اسبقك
دانة: اووك
وبقت تتونس مع هادي وفجأة امجد ظهر ليهم من العدم، امجد ومن غير م يسلم علي هادي: دانة تعالي عايزينك
هادي: اووو امجد.. طب سلم اول
امجد ببرود وهو منعس عيونو: م لاحظت ليك
هادي جرا ليهو نور وم ردا
دانة: دقيقه ي هادي عن اذنك
هادي: لا لا ولا يهمك اصلا نحنا طالعين بعد دا
دانة: ليه؟ لسا الحفلة م انتهت
هادي: بكرة شغال بدري والله
امجد: اي احسن ليك تمشي تنوم
دانة عاينت لامجد بعداك لهادي وقالت: تمام بس اكيد بكرة ح تجو صح؟
هادي: ان شاءالله
مشا ، دانة عاينت لامجد وقالت: ??are u ok
امجد م ردا
دانة اتأفأفت بعدها قالت: اها العايزني منو؟
امجد: انا عايزك
قلبها عمل شحح وم ردت
امجد عارف روحو غلطان مف داعي يعمل حركاتو دي لهادي في النهاية هو ود عمتها ، امجد:طالعة قمر الليلة
ابتسمت غصبا عنها وقالت: وانت كمان حنتك حلوة
رفع يدو الشمال وكان متحنن حنة تقول ي ليييل وقال ليها: دي؟
دانة: اي دي
فجأة لقتو خلخل اصابعو في اصابعا عاينت ليه بخلعة ابتسم وقال: كدا بقت احلي
عانيت ليهو في عيونو مسافة وبعدها عايزة تجر يدها مكسها اقوي وقال: دقيقة نصورهم
وطلع تلفونو باليد التانية وفتحو ..بقت تعاين ل يدينهم سوا حنتو الجاية مع لونو ومنكيرها الاسود الجاي مع لونها…
في هذة الاثناء نسرين كانت دخلت الحمام وجات طالعة كدا مرت ب مرتين قاعدين قريب للحمام نادوها وسلمو عليها وحدة منهم قالت ليها: انتي مرت ود عبداللّه الكبير صح؟
نسرين بابتسامتها العجيبة ديك: اي مرت احمد
المرا: حلاااتك ما شاء الله
نسرين: الله م ضراك ي خالتو
التانية: هي الحلا فايدتها شنو لو م قادرة تجيب ليهو ليهو شافع يشيل اسمو؟
نسرين ابتسامتها اختفت
المرا: اجيييي… ليكم كم متزوجين؟
نسرين: سنتين
المرا: والله ي بتي انا عارفة الجيل دا الوحدة تقول ليك انا م متسعدة اخلف انا عايزث وقت وم عارفة شنو..
نسرين الدموع بدت تتجمع في عيونها
المرا كملت كلامها: لمن الراجل يزهج منها ويمشي يدبل اصلا رجال الزمن دا بتمسكيهم بالعيال غير كدا لا تقولي حب لا خرابيط سمح ي بتي؟
نسرين حركت ليها راسها نظام سمح وهي العبرة خانقاها
المرا اتلفتت علي الجنبها وقالت: هسي كان شفتي ي سمية بت عباس اخوي راجلها عرس فيها…
نسرين: عن اذنكم
ومشت والمرتين ولا اشتغلو بيها اول م ادتهم ضهرها دموعها جر 10/10…
احمد بفتش فيها فكر يدق ليها بس تلفونها معاهو مشا للشباب وقال: شباب شفتو لي نسو؟
انس: اشتقت ليها ولا شنو؟ راعي لشعور السناقل الزينا
احمد مشا خلاهم بضحكو لأنو بالجد كان حاسي انها م كويسة اتحرك من جنبهم وبقى ماشي وبفتش بعيونو شاف امجد ودانة
احمد: شفتو لي نسرين؟
دانة: ايوة قبل شويتين كانت ماشة الحمام
احمد: معليش بس شوفيها لي في الحمام
دانة: عادي ولو
ومشت الحمام لقتها واقفة قدام المراية وبتبكي
دانة: بسم الله اشفيك نسرين؟
نسرين مسحت دموعها: مف شي
دانة: ي بت شوفي وشك بقى كيف وتقولي لي مف شي؟
نسرين سكتت وهي بتمسح في دموعها بعد مسافة قالت: علبة البارد وقعت لي في رجلي وكنت حفيانة
دانة لا شعوريا عيونها اتجهت علي رجل نسرين: جد؟ وهسي كيف؟
نسرين: حمدلله وجعتتني شديد ببس. هسي احسن
دانة: طيب تعالي معاي لأنو احمد قالب عليك الدنيا
نسرين مسحت دموعها وقالت بهدوء : ارح
دانة: اسبقيني انتي وانا بجي وراك
نسرين: طيب
طلعت من الحمام لقت احمد قريب من الحمام اول م شافتو العبرة خنقتها وعيونها اتملو دموع احمد جا عليها وقال بلهفة: نسرين وينك انتي؟
نسرين: كنت في الحمام
احمد عقد حواجبو وقال: مالك انتي؟
نسرين: مالي؟
احمد: ليه كنتي بتبكي؟
نسرين اتوترت وشتتت نظرها: علبة البارد رقعت لي في رجلي
احمد: جد؟ كدي اشوفها ليك وانحني عشان يشوفها مسكتو من كتفو وهي بتقول: هسي بقت تمام
احمد جراها: طيب تعالي اقعدي خلينا نشوفها
نسرين وقفت ولفتتو عليها: احمد الموضوع م مستاهل واصلا هسي بقيت تمام
احمد عاين ليها في عيونها بشك ابتسمت ليهو عشان تثبت انها تمام
احمد اتنهد: تمام يلا
ومسك يدها ومشا مشت معاهو وهي بتفكر في كلام المرا القالتو ليها قبل شوية قطع شرودها صوت امها من وراها بتناديها
وقفت واتلفتت علي امها امها اشرت ليها نظام تعالي
عاينت لاحمد لقتو مثبت عيونو عليها ابتسمت ليهو وقالت: دقايق وراجعة
جرت يدها منو هو كان ماسكها قووي مشت لأمها ،اما هو فضل يفكر في السبب الخلاها تبكي ومتأكد انو حنك علبة البارد دا م صح.. راقبها وهي ماشة م كانت بتعرج نزل عيونو لكرعينها ودقق النظر في اصباعها الظاااهرة من بين سيور الشبط الفضي اتنهد ورفع عيونو لقاها بتضحك وبترجع شعرها لورا ابتسم لضحكتها وردد: الله يحفظك…
عبير فتشت بتها الوحيدة بعيونها لقتها بتسلم علي مرا كدا سلمت عليها ولما عايزة تزح كدا شعرها اتشربك في توب المرا دانة بت تفكو براحة وابتسامة بشوشة مستقرة علي ثغرها عبير بدت تحصن في بتها ذات الجمال الساحر والشعر الطويل وم عارفة انو عيون امجد كانت مراقبها وبتحصنها….
#يُتبع…
mosha🌸✨
