...طيبه ...
وصلنه هناك وزرنه وارتاحينه وانه خجلانه كلش لان جنت ماندل اي مكان امشي وراهم بعدها كالو نروح نزور اهلنه انه ماندل اهلي صليت ابجي طول الطريق وهوه راحو زارو اهلهم وخلصو رادو يرجعون بس الشيخ كلهم اسبقونه هسه نجي وراكم اخذني وضليت امشي وراه وخايفه يتيهني هنا بس فجئه وكف انه استغربت
-صاير شي شيخ
-شنو ماتردين تزورين اهلج
التفتت شفت اسمائهم متت بجي واحس طلعت روحي عله كبرهم بجيت لحد ماراسي ضل ياذيني ورجعنه للسياره لان ورانه طريق كعدت بمكااني اباوع من الجام شفت رقيه واكفه يم الشيخ وتحجي وياه وتتمضحك متت ودي انزل اسحلها من شعرها وامسح بيها الكاع محسيت اله دموعي نزلت اجت ساره
-شبيج طيبه
-مابيه شي مشتاقه لاهلي
-كومي انزلي غسلي تعاي وياي لاتيهين
رحت وياها غسلت وانه عيني عله رقيه الي دخلت ورانه تضحك وتسولف وي امها عن الشيخ اختنكت متت طلعت اشتم هوه لان كلش بعد ماتحمل اجت ساره وراي
-شوفي طيبه سالفه مشتاقه لاهلي ماعبرت عليه احجيلي شبيج
-مابيه شي
-تحجين لو اصيح الشيخ يحجيج بطريقته
-لا لا فدوه انه اكلج من اشوف رقيه اختنك ماطيقها ماريدها تدناله ماسمعتيها شلون تحجي هسه
-ولج تغارين عله الشيخ
-اي اييي اغااار وشبيها
-طيبه يعني تحبي
-ها شنو ليش منو كال
-انتي هسه كلتي اغار والي يغار هيج يعني يحب لاتغشمين روحج
-اي احبه احبببه مايصير لو حرام احبه
-لا حقج وبعدين هوه رجلج يالغبيه ههههه ولج يارقيه الي باوعلها وهوه عنده هالجمال
واحنه نسولف صاحو عليه لان تاخرنه رحنه للسياره وكعدت بمكاني وكلبي ماركد شفت الشيخ مو طبيعي واجه يمي يباوعلي ماعرفت افرزن نظراته شنو بيها بس باوعت كلها موجوده وملوكه ماكو وكف عقلي ركضت ادور عليه يم البنات ماكو صحت عليه وانه كلي ارجف
-شيخ الحكلي
-شبيج بويه
-ملوكه ماكو
-شنو ماكو هسه جانت يم الحجيه
-دورت عليها مالكيتها
اباوعله صار اصفر وطفر من السياره هوه وصادق راحو يدورون عليها انه ماكدرت اتحمل نزلت رحت ادور عليها وسمعت صوته يصيحلي اجيت لكيته شايلها خذتها وشبكتها خفت حيل عليها وصعدنه للسياره وطلعنه نكمل سفرنه .
....شيخ كاظم ....
شفتها من رحنه للمقبره تدور عله شي وتبجي ادري تدور عله اهلها بس اصبري انكمل واخذج الهم يبت كلبي وكملنه من اهلنه وكلت الصادق ياخذهم وانه بعدين الحكه خذتها وهيه تمشي وراي جانت خايفه لان ماتندل لحد ماوصلنه لاهلها وبجت روحها عله كبرهم بقت فوك الربع ساعه ماردت اقاطعها صارلها هواي مشايفتهم كملت ورجعنه وكفت يم عمي احمد احجي وياه وسالني وين جنت اشويه واجت رقيه تتنغوص يمي تريد تعتذر مني وتحاول تتقربلي من جديد وانه مامهتم لان عندي المالي كلبي ورروحي صارت كلشي اذا ماشوف وجها ماشوف الخير كالي عمي استعجل البنات لان انريد نوصل عله وكت رحت لكيتها واكفه يم ساره وتسولف سمعتها تكلها
-اغار عله واحبه
وسمعت ساره ترد عليها يارب يعني تحبني تريدني اجيت اركض عليها واحضنها بس شفت عماتي طلعن ورجعت كلت نوصل هناك واحجي وياها بس مامصدك نفسي ضليت افتر وراها احس ضيعت روحي عدها اتاكدت هيه تحبني سمعتها باذني شويه وصرخت عليه ملوكه ماكو ركضنه ندورها لكيتها عد عباس شايلها وجاي جان يشتريلها رجعت للسياره مالكيت طيبه كالو نزلت تدور عله ملاك هسه هيه ماتندل شنزلها ركضت الحك عليها وصحتها لاتيه وانطيتها ملوكه شبكتها جنها امها وخايفه حيل عليها لاتضيع جان منضرهن حلو كلش اخذتهن ورحنه طلعنه بالسياره وقبل لا نوصل للمكان وكفنه صلينه وتغدينه وارتاحينه بس شفت طيبه ماتهد ايد ملوكه ولازمتها لو شايلتها ماتفاركها بعدهي خايفه عليها بعد ماتحمل يمته نوصل لهناك عندي حجي وياها شكد جنت واكف يم عمامي وشفتها تريد تروح عله السياره شفت شعرها شويه طالع من الشال اتخبلت ماريد احد يشوف شي منها رحت عليها وسحبتها للسياره هيه منفاجئه شنو السالفه بس انه عله اعصابي خليت ايدي عله شالها وضميت شعرها
-شعرج طالع
-مانتبهت شيخ جنت شايله ملوكه
-ماريد اخد يشوف شي يخصني بس انه فهمتي لو لا
حجيت وياها وعفتها ونزلت يمهم بس انه كاب اعصاب نار اغار حيل اغار عليها انه محروم منها وهيه يمي بس يلا مابقه شي مادام كلبها الي انه مرتاح شويه وتحركت السياره حته نكمل طريقنه
