على ناصية الحب ..❤ " اسكريبت"

اسكريبت جديد

- ايوة الابتسامه الخفيفه دى ، ولمعة العين وانت بتبصي فى الموبايل وراها نكهة سي أمير .. صح ؟!
نفس الابتسامه تقريبا على ملامح وشي كله بصتلها بعيون ضيقه شويه قال مش فاهمه قصدها .. وقفلت موبايلى وقولتلها
- احم .. عاوزه ايه ؟! وبعدين انت مالك ياست اسراء ؟!
غمزت بطرف عينها وبنظرتها اللى فضحانى دايما
- يعنى صح كلامى ؟!
صدرت وشى الخشب عشان ابين قدامهم تقيله ولا يهمنى وفردت ضهرى بثقه زياده كده ورديت عليها
- لا مش صح .. وبعدين امير مين دا اللى انا افكر فيه واحنا خارجين ننبسط سوا ؟! لالا ياسو فلتت منك دى ..
شمس وندى بيبصو لبعض بنظرة انا حفظاها صم .. فردت شمس بمكر تعالب
- يابنتى ما احنا بردو لازم نصدق .. نون مش بتهزها الحاجات دى ومش واحد قابلتو كذا مرة صدفه وحتى مااخدتش بالها من لون ال سنيكرز الزيتونى اللى ماشي مع لون البنطلون .. والساعه الجلد اللى كان تقريبا لابسها فى اليمين يانون !! دى كانت عجباكى اوى صح ..
كملت ندى تحفيل بقى وبمنتهى السخرية :
- ولا الشميز الكحلى اللى كان حلو اوى عليه ، بس لو كان ساب اول زرارين مفتوحين كان هيبقي اشيك طبعا .. بس يلا هو اصلا عاجبنى كده ؟!
اسراء بنفس نبرة السخريه : لالا ولا البلوفر البترولى اللى كان هينطق عليه .. يعجبنى فيه انه بيعرف ينقى الالون اللى بتخطف قلبى ابن الايه !!

تقريبا هما التلاته كانوا بيغنوا ويردوا على بعض .. على اد منا كنت هموت من الضحك من رخامه أسلوبهم .. الا أنهم مستحيل ينتصروا عليا .. كشرت فى وشهم
- الله !! هى الحفله عليا النهارده ولا ايه .. بقولكم ايه اتلموا والا هسيبهالكم وامشي تتفلقوا فى بعض !!

- عينك دمعت من كتر مأنتى مخبيه الضحك .. خدتى بالك ياادو ..
- لا وخدتى بالك انت كمان من وشها اللى حمر !! خلاص ياجماعه دى صحبتنا بردو .. نون زى الشاطره كده هاحكيلنا كانت بتتفرج على ايه خلى وشها ينور ..

شمس بثقه معرفش جابتها منين :
- البيه نزل صورة جديده ..؟! انطقى .
فى المرة دى مقدرتش اخبى الضحك اكتر من كده .. وحرفيا دخلت فى غيبوبة ضحك وانا بمسح دموعى اللى غرقت وشي
- طيب نطلب الاكل عشان صاحب الكافيه هيطردنا وبعدين نكمل الحفله بتاعتكم دى !!
- عيب عليكم .. دى صحبتى وانا عارفه دماغها ..
بعد مناقشات طبعا وطلعنا كل انواع الاكل الجديده اللى مجربنهاش قبل كده وكل واحده ادبست فى صنف متعرفش مكون من ايه .. مااحنا لازم نجرب كل الاكل اللى منعرفهوش ..
- هو هيحصل حاجه لو طلبنا مرة اكل نعرفه ؟!
- مااحنا لو ماجلناش تلبُك معوى بعد كل خروجه هيحصل حاجه فعلا ..😂
- دى طقوس ياامى !! المهم نرجع لموضوعنا .. 😎

عملت نفسي من بنها : موضوع ايه ؟!
شمس بحماس : اشوف الصورة ؟!
- صورة مين ؟!
- بت !! هتستهبلى .. وربنا اعملك فضيحة وانت عرفانى ..
ندى بنفس النبره : وانت جيبانا هنا مخصوص فى المكان اللى بيجى فيه البيه دايما .. يعنى هنخليكى سوابق .. فاتعدلى كده .. وطلعى حسك الروائى علينا شويه وتعالى نتكلم كلام عميق ..
- مممم مصلحه يعنى .. طيب هراضي فضولكم وامرى لله .. بس نتكلم فى اي حاجه غير انكم تجيبوا سيرة الحلوف دا ؟!