على ناصية الحب ..❤ " اسكريبت"

اول يوم قرب ❤

- زى ما بقولك .. ماحكتش لحد عنك خالص ؟!

- نهال !!

- مممممم غير مريم ..

اتعدل كده في قعدته وفرد ضهره ولا دنجوان عصره .. ورفع حاجبه باستغراب
- مريم مننا وعلينا ياستى .. بس هى مريم وبس؟!

- ممممممم وشيماء وهويدا وهنو وبس

فجاة عينى وقعت على ايده اللى اتكورت وسندها على الترابيزه .. وحدقه عينه وسعت شويه وحسيت انه بيزيف ابتسامه كده عشان اطمن .. فقالى
- تمام .. بس كده محكتيش عنى لحد تانى !!

فضلت عينى تتمرجح على ملامحه اللى بعشقها ف كل حالاته .. وسكتت شويه وسالته بصوت واطى
- عاوز الصراحه ؟!!!

- هااااا يااااريت .. مش عاوز غيرها ..

- ودعاء وايه وهبه وتسبيح ودينا واسراء ونورا  ووووو وبس مش فاكرة حد تانى ...

- كمان بتعديهم ع صوابعك !! ممم حلو حلو .. هو دا اللى محكتيش عنى لحد خالص ؟!!!

- فى حاجه كمان نسيت اقولها ؟!

جز على سنانه بنفاذ صبر كده .. وبدا يشرب في قهوته كانه بيفرغ كل طاقات الغضب جواها .. وطلع لحن مكبوت كده من بين سنانه ...
- ممممممم خيررررر !!

- وللعيال عندى ع الجروب .. وبس كده خلصت محكتش لحد تانى والله ...
- والعيال دول اد ايه ؟!

انشكحت كده وقولتها بكل فخر
- هيييح لادول كتير ... انت بتعرف تعد لحد كام ؟!

- اعد !!!! انتِ قايله عنى للعالم العربي كله ومحكتيش يانهال !! وانت كنت بتحكى بناء على اي ؟! انا مكنتش عاطى اي بوادر ولا علامات لرجوعى .. لانى كنت ماشي مش ناوى ارجع ..

فجاة مسكت ايده المفروده قدامى وكإنى بترجاه ميقولهاش تانى
- امير .. بس انت اهو رجعت تانى .. ورجعنا تانى نشرب قهوتنا ف مكان المُفضل .. لو مش واخد بالك انت قاعد قدامى ولابس قميصك الاسود اللى بيطير اخر ذرة عقل فيا .. قاعد قدامى وبتشرب قهوتك ف الوقت الى انا بشرب فيه ملامحك ، بحب الحركه العشوائيه ( لتفاحتك ) اللى بتتحرك اول ماتبتدى تتكلم او تتعصب او تضحك  بتسحر فيك .. امير انا رجعت تانى للنوت بتاعى اللى بتكون معانا ف كل خروجه عشان اكتب فيها تفاصيل قعدتنا سوا .. رجعت تانى اعشق الكتابه على حسك ووجودك ..

فضل ساكت شويه بيبصلى باعجاب او باستغراب .. كنت حساه بيقول البت دى مجنونه ولا عقلها جراله اى !! قام من مكانه وجيه قعد جمبى بالظبط وقال لى
- كنتِ جايبه الثقه دى منين ؟!

رديت بعفويه حتى من غير ماافكر وقولتله
- اصل قلبى عمره ما كذب عليا ...

- وقلبك جايب كل الثقه دى منين !!

- ممم هتصدقنى لو قولتلك معرفش .. بس هو الحمام لما بيطير وبيسيب بيته .. هل البيت بيحزن وبيتهد وبييأس ويقفل ابوابه ... عمرك شوفت حمام طار بمزاجه وشاف العالم وحلاوته وف الاخر مرجعش غير لعشه ولبيته !! عمرك شوفت قفص اتقفل ف وشه سكانه ...