على ناصية الحب ..❤ " اسكريبت"

28\7

- صبرنى يارب ... يابت انتى اتهبلتى خلاص !!
- طيب انت ليه مش مصدقانى ؟!
- واحد لابس كمامه وقاعد فى التاكسي يعنى مشوفتهوش غير نص دقيقه بالكتير ... وجايه تقوليلى هو .. عرفته من عينيه ورقبته ودقنه ؟! رقبته ودقنه ازاى يعنى افهم !! هتجننينى 😡
- اااه والله زى ما حكيتلك بالظبط ... تحبى احكيلك تانى ... ممممم لالا انا هحكيلك اللى حصل من الاول ....
- اففففففف صبرنى يارب  !!
- وسعى خُلقك دا .... المهم انا كنت ماشيه فى امانة الله .. فجاة عينى وقعدت على التاكسى اللى جاى فى وشي .. كان بيبص عليا جامد واول ما بصيت بص هو الناحيه التانيه وعمل مش شايفنى 💔
- ما يمكن مش هو يانهال ...
- لا هو .. انا متأكده ..
- متأكده من عينه ورقبته ودقنه !!
- قلبى دق يااسراء .. دق لدرجه خلتنى احس انه هيتخلع من مكانه ... الدقه دى مكانتش غيره له ولعينيه وبس ... قلبى مابيكدبش ...
- طب ياستى .. خلاص هو اتهدى بقي !
- كان شكله قمر اوى ...
- يامرارتى انا ياما...هتشلينى يابت انت !!
- اسمعى بس .. كان فاتح اول زرارين ولابس القميص السماوى .. وياحبيبي كان عرقان جامد .. شكله كان راجع من الشعل ومروح البيت  ..
- ....
- اسراء!
- ابوس ايدك معنديش الا مرارة واحده ؟! ارحميها ....

سكتت شويه لان دموعى غلبتنى كعادتها .. فاسراء حنت شويه
- مالك .. متكملى !!
- أمير كان واحشنى اوى ..
- أمير جوزى!!
- هعمل اى بجوزك انت كمان .. ركزى معايا 😏✌
- بلطف الجو يانون .. الله 😉😂 .. احم اتبسطى لما شوفتيه ..
- تؤ ... انا اتخطفت .. نظرة منه خطفتنى من على الارض وطيرتنى فوق السحاب .... مممم اسراء .. انا مش اوفر والله .. بس اللى عاملو فى قلبى هو اللى اوفر هو اللى مقدرش اوصفه .. انا ما عرفتش الحب ولا كتبت عنه غير لما بدات اكتب لعينيه ..
- واخرتها طيب ؟!
- هو مش ناسي !! هو قال لى كده بنفسه .. قال لى مش عارف ينسي ... ولا قلبى انا راضي ينساه ..
- تكلميه !
- نظرة عينيه بالف شات ... عمر الكلام ما هيعمل فى قلبى زى ما عينيه عملت .. اقترحى عليا فعل يوصل قلبى لليفيل اعلى من الشات ..
- ما بلاش انا😂✌ الافعال الفاضحه كتير ..
- صوته وحشنى .. عاوزه اسمعه كده ويرن فى ودنى ويرقص على لحنه قلبى .. انا مفتقده كل تفصيله فى حياتى خاليه منه ...
- اقولك على فكرة مجنونه ..

بمجرد ما اسراء خلصت كلامها تليفونى رن .. ببص فى الشاشه لقيت اسمه ... شهقت بصوت عالى وجسمى كله اتكهرب وريقي نشف ...
- اي يابت .. بتموتى !!
- بت بت بت بيتصل .. الحقينى .. اعمل اى ! يالهوى !! هقفل صح !! هقفل وهعمل نفسي مسمعتش  ..

- انت هبله ! ما اكيد باين عنده انك ويتنك ... ردى شوفيه عاوز اى ...
- اخاف
- نهال انجزى !!
- طب خليكى ويتنك انت وهرجعلك ...

علقت اسراء وخدت قرار انى ارد واتغلب على الحاله اللى كنت فيها .. وكالعادة صوتى المهزوز بيفضحنى
- امير !

- هو انا ممكن افهم الهانم بتتمشي الساعه ٢ الضهر فالحر دا .. وكمان مش لابسه الكمامه ليه !! انت مش خايفه على نفسك !