على ناصية الحب ..❤ " اسكريبت"

غيرة 😍

- انتِ بتغيري ولا ايه !!
- بغير ؟! لا محصلش الكلام دا !! وبعدين البنات اللى بتغير دى بنات ناقصه ومعندهاش لا ثقه في نفسها ولا في حبها ..

بصلى كده بعدم تصديق وهو بيقلب بالشوكه في طبقه ورجع يكمل اكله بهدوء مصطنع وقال بابتسامه خفيفه
- يعجبنى فيك عقلك الكبير ياروحى ؟!

بروده كان مستفز للدرجه انى بقيت بطلع دخان من كل حته في جسمى .. رميت الشوكه والسكينه بغيط وانا بقوله
- عقلى وبس .. دانا عندى كمان اوفر جنان هيعجبك اوى ..

رفع حاجبه وعصبنى اكتر وهو بيتكلم بنفس البرود والبراءة
- في حاجه ياحبيبي !!

ربعت ايديا واتسندت على التربيزه وانا بتكلم من ورا سنانى اصلا
- مين الانسه اللى جات وسلمت وهزرت وضحكت لا وكمان خبطتك واحده يامارو .. وانا نجفه قاعده هنا !!

- ااااه تقصدى سوزى !! دى بنت هايله ..

- والله !! طيب معاك رقم تليفونها ولا اقوم اجيبهولك واوريك السوبر هايل بتاعى ..

- نهال .. بلاش تكبري الموضوع ..

لا ماهو مافيش برود وتناحه بالشكل دا .. فجاة لقيتنى وقفت وخطفت شنطتى وانا بقوله بصوت عالى
- لا هو الموضوع كبير فعلا يادكتور لو مش واخد لبالك ... ااه وست سوزى قاعده هناك لوحدها فأنا هعفيك من التجمل دا وامشي عشان تروح تتساير معاها ..

وقف قدامى بطلته المريبه اللى بتدغدغ كل ساكن جوايا .. وهو بيمسك ايدى وبيقول لى
- بطلى هبل وتعالى هنا ..

- لا سوزى مستنيه ... اااه استنى ودبلتك اهى .. مش انا اللى هتختم على قفايا واسكت يابيه ...

فجاة لقيته اتحرك وشدنى بقوة وقعدنى على الكرسي غصب عنى وقعد هو في الكرسي اللى جمبى ولف جسمه ناحيتى وهو بيكلمنى بعتاب
- انت كل ماتشوفينى بتكلم مع واحده تقفشي كده !!

- وانت الرجاله اتقطعت من البلد فكل علاقتك ستات !!

- طيب والله صحوبيتهم بتفيد وبتوفر عليا كتير ...

سحبت دراعى بقوة لان كلامه خلاص ولع نار الغيره في كل جسمى ومابقتش شايفه قدامى .. سد عليا الطريق برجله وهو بيشدنى من كف ايدي التانيه وبيقول لى
- اهمدى وخدى الكلام للاخر ...

- سيب ايدي ياامير !! ..

- مش لما تسيبى قلبى انت الاول !!

- لا بقولك اي انسي انى اعديهالك المرة دي وبعدين كلامك مابقاش يجيب معايا ..

فجاة بصلى كده وكانت عيونه السود اللى بتلمع بضي نور رهيب خلانى اتنح قدامه .. مافوقتش غير وهو بيهمس
- مممم .. ممكن كلامى مابقاش يجيب نتيجه .. بس دا نفس الريتم علي عينيا طيب .. فشلوا هما كمان يهدوكى ..

لقيتنى براجع غصب عنى خطوة لورا وبخبى ضحكتى ووببعد عن عيونه اللى زي عيون الصقر دي وباخد كذا نفس ورا بعضهم وكأنى نسيت كل حاجه .. وبدل ما اكمل خناقتى معاه عاوزه اقوله "اي القمر دا" .... بس برود جمدت كده وعملت فيها بسبع رجاله وسألته
- مين الهانم اللى جات وسلمت !!

- دى موظفه ف البنك اللى بتعامل معاه وبصراحه بتسلكلى كل اموري وانا واقف ....

- وهو البنك مافهوش رجاله ياامير !!

- لا طبعا فيه .. بس انا مابعرفش اتعاامل غير مع ستات يانهال .. الله ؟!

- اوووف وسع كده من طريقي احسن ارتكب فيك جنايه ...

- بردو مصممه انى مش بتغيري !!

- انا !! واغير من البنت الملزقه دي ؟! .. دى كلها تركيب اصلا ..

- طيب ماانتى عارفه انه مافيش غير الاصلى اللى بياخد عقلى وقلبي لحسابه متعصبه ليه ..

- مش متعصبه ...

- طيب متنرفزه ليه ..

- الله .. مش متنرفزه قولت ..

- طيب اقعدى يلا وبطلى جنان ..

- مش هقعد وهمشي حالا ..

- اوك .. يلا بينا نمشي حالا ...

- لا همشي لوحدى ...

- نهال ......

- وكمان ليك عين تزعق ؟!

- لا .. بس كنت هقولك افردى بوزك دا مش بحب اشوفك كده ..

- ياسلام يهمك اوى يعنى ؟!

- ولو مايهمنيش هيهم مين يعنى .. اضحكى يلا

- تؤ ...

- براحتك اصلا انا بحبك ف كل حالاتك ..

- والله !!

- بس بحبك اكتر وانت غيرانه

- شوف انا بحكى ف ايه والبيه بيحكى ف ايه ؟!

- بحكى ف ايه !!

- امير انا متعصبه ومنك ومش طايقاك وانت بتقول لى بحبك ووو ..

- اشششششششش .. وانا كمان بحبك على فكرة ..

مكنش قدامى غير انى اضحك وانسي واسامح .. هو انا لحد امتى هفضل غبيه كده وبكلمه واتنين يضحك عليا وياكل بعقلى رز بلبن .. لحد امتى زعلى منه هيبقي مهزأ كده .. او لحد امتى هفضل بحبه بجنون كده ...

حكاوى

ل #نهال_مصطفى
#على_ناصية_الحب