على ناصية الحب ..❤ " اسكريبت"

فضفضة

مبقاش قدامى غير اكتب .. مابقتش عايزه اى حاجة غير اصرخ مش عاوزاك ولا عايزه اى حاجه تفكرنى بيك ولا ترجعك ليا ... الحاجه الوحيده اللى اتمنيتها هى انت وبنفس اصرار اول امنيه بتمنى دلوقتى انى انساك ... عايزه اصحى وانام ناسيه مش فاكرة اى حاجه عنك ...

انا اتقبلت فى حياتى كل الخسارات الا انت كنت اكبرهم .. اتحكم على قلبى بالاعدام قبل ما يلمس نور الشمس  ... تايهه .. بلف حولين نفسي مش شايفه ولا حاسه باى حاجة غير ان جوايا بركة دموع عاوزه افجرها بين ايدك .......

سنين انتظار وتعلق متشعبطه فى كل حاجة توصلنى ليك وكأنك حته منى تايهه مش عارفه اتجمع عليها ... انا حرفيا واقعه فى كل جزء من ملامحك حاسة ان احنا اتقابلنا فى زمان قبل الزمان ومكان تانى كنا فيه انا وانت وبس وجينا الدنيا توهنا فيها ونسينا بعض ... فى بالى صورة منحوته لمسكة ايدينا ومشينا فى مكان كله شجر !! معقوله تكون نسيت ؟! احلامى كانت تطبطب على قلبى كنت اشوفك دايما وكل مرة فى صوره احلى من التانيه .... معقولة هتكون لحد تانى غيرى ... مش انا اولى طيب ... هتحبك قدى ... هتسامحك وتغفرلك كل بلاويك ادى !! هتترمى فى حضنك اول ما تزعلها .... هتفضل تراقب تفاصيلك وانت نايم وتشكر ربنا الف مرة انك هنا !! هتقوم من النوم مفزوعه عشان تجهزلك فطارك !! هتهتم بلبسك ومكوتك وتفرشلك الارض ورد !! هتاخدك فى حضنها وتصبرك وتقولك انا جمبك تهون الدنيا !! هتقوم فى نص الليل تطمن عليك متغظى ولا لا !! هتقوم على صوتك وانت بتذاكر بره عشان تعملك حاجة دافيه تشربها !! هتكون على  بالها ال٢٤ ساعه ازاى تسعدك فيهم !! هتمشي جمبك وراسها مرفوعه لانك جمبها !! هتفضل تحكى عنك ليل نهار مع مامتها !! هتتحرش بقلبك فى نص يومك الممل وتبعتلك ( وحشتنى جاى امتى ) !! هتستقبلك من الباب بحضن يساع العالم وكانها عاوزه تشيل من عليك كل هموم شغلك !! لما تشوفك تعبان ومش قادر تقف على رجليك من التعب هتجيبلك ميه وملح وتغسلك رجليك !! هتصحى كل يوم قبلك عشان تجهزلك حمامك وحاجاتك ومتقومش تدور عليهم وتحتار  !!

لو جبت واحده تعملك نص الحاجات دى ومتشيلكش هم واحد فالدنيا انا نفسي هاخدك من ايدك واوديك ليها واوصيك عليها كمان !! خايفه عليك يانور عينى تدبل مع واحده متقدركش !! واحده سابها حبيبها زى ماانت سبتنى وتطلع عليك كل العكننه والنكد ده !! مش هيهون عليا نكدك والله .. عاوزه اشوفك مبسوط دايما .... انا هفرح هفرح لانك فرحان !!

تعرف ان فى حاجات كتير معاك حسيتها وعشتها مش بخيالى لا بقلبى .... انا قلبى كان بيخونى ويهرب منى ويجرى !! يجرى عليك ... وانت للاسف مقدرتوش .... عايزه افضل العمر كله اكتبلك ومش هيكفى شعور ليله واحده من اللى هعيشهم معاك .... انت عارف يعنى اى اقصي احلام حد ليله واحد تشرق فيهم عيناك على ارضه !! شوفت انت بخيل اد ايه ؟! شوفت انك طفل صغير محتاج لمامته تدله وتعرفه االصح من الغلط والنور من العتمه !! شوفت انك محتاجنى فى حياتك !!

بس الخلاصه أي باب انا قفلته فِ وش حد ماقفلتوش غير لما اتأذيت وعرفت إني مستحقش البهدله دي ، وأي علاقه نهيتها من حياتي أو حطيت صُحابها فِ إطار المعارف مستحيل أرجعها تاني مهما أصحابها حاولوا ، ومش بمشي غير لما أكون دارسه قراري وعارفه إنه ده الصح واللِ لازم يتعمل ، كل اللِ رميته من حياتي رميته بإقتناع وكان لازم يترمي ، رجوع أي حد أذاني لحياتي تاني ده عشم إبليس فِ الجنه ، أنا سامحتك وبتمني ليك الخير بس بعيد عني .

#فضفضة
#نهال_مصطفى