يقف امامها..عُذرا! يقف امام حلمه وحب طفولته..متأملاً..مبهوراً يكاد يقفذ فرحاً ليصرخ ملء كل شئ:تزوجتها ي عاااالم...تأملها بعينيه التي اتسعت بؤبؤتها كدليل علي فرحته...ثوبها الحريري ذي اللون الكبدي المُزين بنقوش ذهبية مُطرزة...نقوش الحناء المتوهطة علي ذراعيها وقدميها صارت لوحة فنية اكتملت بلون بشرتها الحليبي القاني...الجدلة الذهبية المشغولة بإتقاان التي تُغطي شعرها الاسود الواصل لحنكها...الاقراط المُتشبثة بأُذنيها ليمتد حبل ذهبي رقيق من اسفل قرطها الايمن وصولا لأنفها ليستقر كذمام دائري...حتي حبات العرق التي تلألأت في اعلي جبينها بفعل التوتر باتت فاتنة جدا في نظره...
همس:كدي عايني لي؟
رفعت عيونها ليهو
اتسعت ابتسامتو:بسم الله ما شاء الله..تبارك الرحمن
نزلت عيونها وابتسامتها كشفت غمازاتها الساحرة
وليد:ي ارض احفظي ما عليكي
"واي انبراش السواد😂👋🏻"
رفع يدو الفيها منديل ورق وبدا يربت ب ارق ما عندو عشان يمسح ليها العرق..رفعت عيونها ولاول مرة في حياتها تشوف ملامحو بالوضوح دا..حواجبو عيونو نخرتو لحيتو المرتبة كلها حاجات بتأكد ليها انو هو فارس احلامها المُنتظر
خلص وقال:نمشي؟
حركت راسها نظام اي
اتلفت علي ران الواقفة جنبهم لقاها ضامة يدينها الاتنين وخاتهم تحت حنكها وعيونها مرقرقين
ضحك قال:نمشي ي جماعة؟
رامي من وراهو ضحك وهو ماسك شهد من يدها وقال:نمشي طوالي
عاين لران وقال:سمعنا زغروتة لو سمحتي
ران شالت نفسها وختت بداية اصابعها في خشمها وفكت الزغروتة...انتهت
رامي:تاني وحدة
ران تاني فكت الزغروتة
شهد ضحكت علي جرأة ران اكيد لو هي في محلها م ح تقدر تزغرت في مكان عام كدا..وليد خلخل اصابع يدو الشمال في يد وعد اليمين وبشر ليهم:ابشششر
ران تزغرت وماشة وراهم لحدي ما ركبو العربية وهي ركبت قدام جنب السواق..رامي وشهد لحقوهم بعربية رامي...
في الصالة...
الانوار الطفت والفقعات الملت المكان دليل واضح علي انو العرسان وصلو...كل زول قعد في كرسيهو وعلا صوت شكر الله وانصاف وهم بتشاركو اغنية "بحمد الله حضرني اشوف جنايا فوق بيتوووووو"
امجد ابتسم باتساع لمن ظهرت سنتو المردوفة وهو شايف بت عمو وود عمو جاين داخلين...عبير واقفة ورا كرسي اميرة خالتها خاتة يدينها في اكتافها وتاكلة راسها في راس خالتها وبتعاين ليهم وعيونها ملياانين بالدموع...
