صباح اليوم التالي...
التاسعة والنصف صباحا...بعد المحاضر طلع..رفعت تلفونها دقت لعبير لأنها م لاقتها امبارح..ختتو في البنش قدامها وبدت تفك في السماعة..ختتها في اضانها وبدت تحرك في يدها منتظرة عبير ترد..م ردت وجاتها رسالة نصية منها بتقول "دندون...معليش ي جميل بس شغالة محاضرة"
دانة كتبت ليها "ولا يهمك ي قمر..بس حبيت اطمن عليك امبارح اتلاقينا"
عبير "تسلمي حبيبتي..بخلص محاضرتي وبجي عليك"
دانة "تمام راجاك"
شغلت غنية..جمال مصباح/انا قلبي مالو اليوم وختت التلفون في البنش..اتنهدت وهي بتتذكر امجد...كيف كانو قريبين لبعض..كيف اعترف ليها بحبو..كيف خلطو 3 سنة...كيف بزعل وكيف براضيها لمن تزعل...كيف بعزف وكيف بغني...بغمض عيونو لمن يغني...لمن يتوتر بمرر لسانو في شفتو التحت ولمن يزعل بلوي خشمو للشمال لمن يفكر في موضوع كتير م بقدر ينوم وبالتالي لمن م ينوم كم ليلة بزهج ووبقى طبيعي صاري لدرجة عرق رقبتو بنط...قطع شرودها صوت عبير بتقول:هللوووووو
وقفت الغنية وهي بتقول:اهلييييين بالغلا..قامت حضنتها..وينك ي بت مختفية؟
عبير ضحكت:م مختفية امبارح م جيت بس
قعدو، دانة:ليه؟ عسي خير؟
عبير:خير خير..لوحت بيدها..خليك مني الماخد عقلك يتهنى بيهو
دانة ضحكت:ماخدو وم متهني بيهو
عبير ضحكت:بتهني ان شاءالله...المهم اخبارك شنو؟
دانة:والله حمدلله
عبير:وين مايرا "صحبة دانة"؟
دانة:نزلت تحت لحدي المحاضرة تبدا
عبير:فضل ليك كم محاضرة؟
دانة:اخر وحدة..وانتي؟
عبير:تلاااااتة يداب اخدتا وحدة
دانة:ي حليييلك يااخ
عبير:مش كدا؟
اتونسو حبة كدا الدكتور جا عبير طلعت...
في جامعة ناس امجد...
بتكلم في التلفون:اسيل ياااخ
اسيل:ياسر والله م ح اقدر حاسة جسمي كلو مكسر
ياسر:اخدي ليك دش بتنعوشي وبنجيك نسوقك
اسيل:ي ريت والله
ياسر عاين لأمجد الواقف جنبو وقال:تتكلم معاها؟
وفتح الاسبيكر امجد قال:اسيلووو...م ح تبقى سمحة من غيرك
اسيل:م بقدر والله
امجد:يعني مف طريقة؟
اسيل ضحكت:مف اي طريقة
