🍒
" اسير " بطلتنا عندها 27 سنه ، بتشتغل دكتورة جراحه فى مستشفى خالها ، كل الناس بتحبها وشاطرة جدا في شغلها
** اول ما دخلت المستشفى راحت على مكتب مدير المستشفى
" اسير " صباح الخير يا حبيبي
" مصطفى " خالها :- صباح الخير يا بكاشه احنا كنا لسه مع بعض
" اسير " الله بقا يا خالو ما انت علطول بتوحشنى
" مصطفى " وانتى كمان يا حبيبتي ...... بس قولى بقا عاوزة ايه
" اسير " دايما فاهمنى كده
" مصطفى " طبعاً يا حبيبتي تربيتى
" اسير " طيب بقا يا خالو ماما بقالها فترة مش مظبوطه متعرفش مالها ؟
" مصطفى " متسأليها انا مالى ؟
" اسير " ماهى مش راضيه تقول واكيد قايلالك ، ثم تابعت بدلال هو مش انا حبيبتك برضو يا عسل
" مصطفى" بت انتى بطلى حتى لو قايلالى مش هقول ..هى لو عايزة تقولك هتقول غير كده انا مليش دعوه .... ويلا بقى على شغلك
" اسير " ما انا عارفه انك مش هتقولى بس ابقى افتكرها بقى يا خالو ، ماشى انا هقوم اشوف الواد طارق
" مصطفى " نفسى مرة تحترميه وتقوليلو خالى زى ما بتقوليلى
" اسير " لا لا لا خالو ايه دى اللى اقولهالو ، مفيش غير خالو واحد بس هو اللى فى قلبى ، ثم قبلته وقالت : يلا باى يا خالو
********،**********
فى مكان تانى خالص فى قصر يدل على حسن الذوق والرقى فى ارقى مناطق الاسكندرية
" ملك " بابا يا بابا يا حبيبي
" احمد " حبيبة بابى عامله ايه يا ملوكه ؟
"ملك " الحمد لله يا بابى بس انت واحشنى اوى اوى اوى بقالك كتير مشغول عنى كده يا حماده انا زعلانه منك
" احمد " يا بنتى انا ابوكى بلاش حماده دى ، ثم قال بهمس : امك بس اللى تقول كده
" ملك " ايوة بقى قول كده ماشى يا حبيبي الله يسهله ، بص انا عايزة اخرج معاك انهارده
" احمد " مش هينفع انهارده خليها بكره
" ملك " ماشى يا رب بس نخرج مش زى كل مرة
" احمد " ماشى يا حبيبتي وعد
"ملك " اوك يا بابى همشى انا راحه الكليه عاوز حاجة منى ؟
" احمد " لا يا حبيبتي شكراً خدى بالك من نفسك
ملك قبلت رأسه ومشيت
" احمد " فى نفسه :- كان نفسى اختك تكون معانا
( ملك عندها 20 سنه طالبه فى كلية الصيدلة شعرها اسود حريرى تخفيه تحت حجابها لديها بشرة بيضاء وعيون عسلى )
فى جامعة الاسكندرية
" ملك " صباح الخير
" الشله " صباح النور
" اسماء " صاحبة ملك :- اتأخرتى كده ليه المحاضرة هتبدأ
" ملك " معلش الطريق كان زحمه ..... يلا علشان نلحق المحاضرة
" الشله " يلا
**************
فى مجموعه اقتصادية من أكبر مجموعات الاقتصاد في البلاد يدخل رجل هيئته تدل على الهيبه والوقار شعره قد اخذ منه الشيب والزمان حقه
" احمد " صباح الخير يا منى
" منى " السكيرتيرة :- صباح الخير يا فندم
" احمد " خليهم يبعتولى قهوة وخلى سيف يجيلى
" منى " حاضر يا فندم
بعد قليل يدخل شاب فى ريعان شبابه
" احمد " ازيك يا سيف
" سيف" الحمد لله يا عمى
( سيف شعره اسود ناعم ، طويل القامه ، عينيه بلون البحر ، ابن اخو احمد وبيشتغل معاه ماسك كل شغل عمه وهو النائب بتاعه )
" احمد " عملت ايه فى المناقصه ؟
"سيف " الحمد لله يا عمى كله تمام وان شاء الله ناخدها وترسى علينا
" احمد " انا عارف انك قدها وقدود
"سيف " طب انت مالك يا عمى شكلك مش عاجبنى
" احمد " ما انت عارف يا سيف
"سيف " انت لسه بتفكر فى الموضوع اياه ؟
" احمد " مش هرتاح غير لما اوصلها
" سيف " ان شاء الله يا عمى
بدأو يتكلمو فى الشغل
*****************
عند اسير فى المستشفى
" اسير " ايه يا ابنى انت فين من الصبح؟
"طارق " خالها الصغير :- موجود بس كان عندى حالات كتير بتابعها وانتى خلصتى شغلك ؟
" اسير " اه والله يا طارق هلكت انهارده كان عندى كذا عمليه لما تعبت
" طارق " حد قالك ادخلى جراحه ؟ مالها العظام بس ؟
"اسير" انت عارف انى كنت عاوزة ابقى زى خالو مصطفى
" طارق " ماهو اخويا بردو كنتى بقيتى زيى
"اسير " مش مهم دلوقتي ...بقولك عاوزة اكلم معاك شويه بره البيت
" طارق " خير فى ايه ؟
"اسير " هقولك لما نمشى هروح دلوقتي اخلص شغلى ونتقابل لما نخلص
" طارق " اوك ماشى
" اسير " بااى
( طارق خال اسير اكبر منها ب 3 سنين بس بتعتبره اخوها واكتر وبتحبه اوى اوى وهو كمان بيحبها جدا )
***************
فى الجامعة
ملك بعد ما خلصت المحاضرة لقت حد بينادى عليها
" د/ مراد " آنسه ملك
"ملك" ايوة يا د/ مراد فى حاجة ؟
" مراد " كنت بس عايز اسألك لو فى حاجة مفهمتيهاش من المحاضرة
" ملك " لا يا دكتور الحمد لله فهمت المحاضرة كلها ، بعد إذن حضرتك
" اسماء " ماله ده عاوز ايه ؟
" ملك " مش عارفه .... سيبك منه ، انا هروح عايزة حاجة؟
" اسماء " شكراً
( مراد هو معيد عند ملك فى الجامعة بيحبها جدا بس مش قادر يقولها )
