مناطق سوداء

البارت الاول

السلام عليكم ورحمة الله وبراكاته

#مناطق_سوداء

(زهراء حسن الراوي )

من مدينة الزقورات العريقة ،مدينة الاهوار الريفية  ،مدينة القار ،فهي بلاد سومر والدولة الاموية نأخذكم الى احدى اقضية ذي قار (الناصرية)
لنطلع لكم على احدى القصص الملهمة في تلك السنوات ..

بسنة ١٩٩٣

قائد :  بهاي السنة جان عمري ٩سنوات تقريباً
جنة كاعدين ومتجمعين انا واهلي واجدادي  وعمامي وولد عمامي كلنة بالهول ومكابلين التلفزيون الي اشتراه جدي جان ستوة داخل لبيتنة وكلنة فرحانين بي

والجهال يهوسون وجدي واكف على التلفزيون بنظارتة العچس ومغمض عيونة بتركيز ويطكطك بي حتى تروح الوشة مالتة وبيبيتي كل شوي وطافرة يمة اطكطك وياه وكلياع حجت

_هاااا عيني ابو طلال ما اشتغل
_لا لا ماكو

انا جنت ستوني ماخذ درهم من ابوي ومشتري حب يعني مجهز اموري الدرامية كدام التلفزيون وكاعد اكرز ومركز على الوشة مال التلفزيون واحرك بعيوني وي الوشة
ما احس الا واحد وطافرعلى زردومي

فهد : انططططططيني حب انططططيني

طارق : ولك بووية كوم عنة خنگتة

طلال : فهيييد والله اذا هسه الزمك اعلكك على البنكة واللله عوووف ابني

قائد : طبعاً هذا فهد ابن عمي طارق اصغر مني ب٥ ايام بس الكاع ما تشيلة وكح وحرك

شلتة من فوكي وشمرتة بالكاع ..دهاااااك فكرر هااك اخذه وولي عني
شوي واجت سارة بت عمي مروان تركض على فهد

_انطييني انطيني
_ اهووو رح اجدين كبالي ما انطي ولي عني
_فهيد هو مالتي انطيهااا منه
_ ما انطي والله لو ترگع راسها بالحايط

عفتهم ورجعت تركيزي على الشاشة شوي وعاط جدي

_بثثثثث بثثث بثث كاافي سكتووو خلي نشوف

جان اول مرة بحياتي اشوف رجال بداخل التلفزيون وافكرهذا شلون دخل بالتلفزيون وشلون هيج صار صغير طبعاً هذا اغلب تفكيرنة قبل