#انقلاب_حياة
#الحلقة_الرابعه
الكاتبه مرام احمد
Meroo Ahmad
🌺"«قراءة ممتعة»"🌹
نضت الصبح فتحت اعيوني حاولت نستوعب اني وين لانه متعوده علي تهزيب الصبح من امنه استغربت انه مانوضتني خلتني راقده لوقت هدا استوعبت شن صار امس اني في مكان غير موجوده فيه امنه 💔 بس مهما كان هذوم اهلي الي روبوني 💔
انا قعمزت انشوف فيهم كيف امرقدين واضح كمية حبهم لبعض وعلاقتهم حلوه ❤️
شفت يساري وكان بابا راقد علي الصالون ومش متغطي
سحبت روحي بالشويا ونزلت من السرير وقعمزت علي اركابي وغطيت بابا وقعدت نتفرج عليه كيف راقد والشيب مالي راسه وملامحه حاده عكس الشخص الي امس بكى قدامي وكيف ايحاول يشرحلي انه انا بنته
حسيت بيه تحرك وجيت بنوقف مسكلي ايدي ارتبكت
انا بخوف: اسفه نوضتك شفتك مش متغطي وغطيتك
بابا ابتسم وقعمز:خيرك خايفه
انا: لالا
بابا: به قعمزي عارفك خفتي مني بس انا بوك
انا قعمزت: لالا ماخفتش غير المكان جديد عليا مزال مش مستوعبه الي صار
بابا: خلاص خلينا ننسو الماضي توا حياتك الجديده امع اهلك وخوتك كلهم ايحبوك نبيك تاخدي راحتك هدا بيتك زيهم عارف صعب عليك بس حاولي اتقالمي اسبوع توا تتعودي عليهم واتخشي
انا: ان شاء الله انحاول
بابا ابتسم: حسيتك متقبله الموضوع مش زعلانه واجد
انا: صح حتي انا حسيت مش عارفه هكي قلبي مرتاح وحاسه روحي فرحانه القيت الاهل ايحنو عليا ممكن كنت فاقده الحن الاهل لانه كانو مايعملوش فيا اكويس كله ضرب واهانات وحقد ويفرقو بينا انا وخوتي ممكن حسيت امعاكم بالامان الي فاقدته اسنين شفت في اعيونك شي ايطمني انه حياتي بتكون امعاكم حلوه لانه شفت الخوف في اعيونكم وقداش ماما حنونه صح انحرمت منكم طول عمري بس حسيت روحي كاني نعرفكم
بابا ابتسم وخداني فحضنه: وعد مني مستحيل انخلي حد يقدر ايمس شعره منك وربي نقتله وان شاء الله نقدر انعوضك كل هل السنين
انا شفت في اعيونه: اكيد معاش اتخلي حد يضربني
بابا ضحك: من يقدر يلمس وحده من بناتي هد اخر يوم فعمره
انا اعيوني دمعو: علاش فرقوني عنكم صح مش اول طفل ليكم
بابا ابتسم بوجع: لانه انا وامك كنا فرحانين عشان قالو الجنين بنت وانا وياها انحبو البنات اكثر كنا فرحانين بيك اكثر من شاهين وحاتم في فترة حمل امك كنت زي المجنون انخاف عليها حتي لو رفعت كاس الميه بتشرب انعاركها كنت ديما انهدرزك لمه كنتي في بطن امك شن بنديرلك بعد اتجي علي الدينا كنت كل يوم انجي انهدرز عليك كيف انحبك قبل ما اتجي علي الدينا
انا بكيت😢💔
بابا قعد يمسحلي في ادموعي: علاش تبكي توا
انا:مانعرفش 😂
بابا:هبله زي امك ادموعها علي سبله
انا: 🥰
بابا:حتي تشبهيلها في العيون والملامح وكل شي
انا: لحضت حتي انه نسخه منها
شاهين: لوسمحتو يا الاب وبنته بنرقدو احني لو تبو اتهدزو اطلعو برا كملو باقي كلامكم
التفت انا وبابا القيناهم كلهم فايقين يتفرجو علينا
بابا ضحك:انت الي اطلع من داري اهوني دارك امشي اندفس فيها
شاهين: والله كان نحساب روحي نلز ره مافتحتش فمي
غفران:انا بديت انغار يابابا امس ماما واليوم انت 😂😂
بابا: لا انتم خلاص حيوته التوب ❤️والغلا كله
شاهين: والا والله كنا نحنا عويل البطه السوده
ماما: باهي ياكلب صار بطه السوده
شاهين: اوووو جرحنا مشاعرك يانبع الحنان
حاتم: توا كيف حالك حياه
انا: الحمدلله بخير
غفران: اكيد عشان قاعده فحضن بابا بتقعد بخير
انا ابتسمت: يمكن ❤️ عشان حضنه دافي
ماما: لا غرت حتي انا يامحمود 😂😂
شاهين: اوووووه قويه منك ياحنونه
حور ضحكت:حي عليك بابا 😂😂😂
باباضحك: عاد بتغار من بنتها 😂😂
ماما وقفت وجت قعمزت جنبي
ماما: وعليش انغار عليك انا انغار علي حيوته بنتي نبيها فحضني انا بس وجبدتني في حضنها
بابا ضحك عليها
حاتم: رسمي راحت عليا ياخوتي
غفران:هي انتم حتي نحنا اولادكم ره
جوري: خيركم انتم فرحانين بي بنتهم الي غايبه عنهم اسنين وانتم قريب اتموتو بالغيره
بابا ابتسم ويمسح في ايده علي اشعري
غفران: حيوته
انا: نعم
غفران: شن درتي فينا يابنت
انا:شن درت
غفران: غيرتي حياتنا ولت حلوه اول مره انشوف بابا وماما فرحانين هكي
بابا:عشان حياتنا كانت ناقصه واليوم اكتملت
حور: ان شاء الله ديما فرحانين ومبسوطين
بابا: امين وانتم جنبي ديما
غفران تضحك: كيف يابابا مش ناوي اتزوجنا 😂
حاتم: تحشمي يابنت
بابا ضحك: لا مش امزوجكم نبيكم جنبي ديما لو الراجل مش حايسكن جنبي مش حا نعطيكم
شاهين: قويه ياحاج اكيد بناتك ايعنسو قدامك
انا كنت انشوف فيهم وفرحانه كان كلهم ايهبلو فعلا كان مثال العائلة السعيده ابتسمت ممكن لانه صارت عيلتي
جوري: الله فيك نفس غمازات بابا بعد تبتسمي
شاهين: هدا ظلم اسما كيف حياة وحور بس عندهم غمازات واحني لا
بابا: الصبر يارب علي المجانين الي عندي
ماما: جعتي يابنتي
انا ابتسمت : اي
شاهين: تي معاش تضحكي ولا تبتسمي اتزيدي تقهريني 😂😂😂
ماما: ماتسمعيش كلامه خليك ديما تضحكي
بابا:هيا نوضو حتي انا حسني جعت امس من الفرحه ماتعشيت
