ناديه طفله اوصلت امها الى حبل المشنقه

البارت السادس والخمسون

حنين
من اجه عمو سراج البيت هادي وبعدها اجوي الشرطه واجت وراي افراح الي گالت
:ها شمصخمه مو كافي فضيحة اختج
انا ما اعرف على شنو تحچي هي كالت بنتر
:حنين خاتون البسي عباتج وجيبي جنسيتج والشهاده وانزلي يردونج
:عمه انا والله ما مسويه شي
:اي هم ذيج هسه تطلع ما مسويه شي انزلي كون الله يفكنه منج مثل ما فكنه منها

اشوف افراح رغم ما تبچي على ياسر بس من تحچي ولا كانه ابنها مسجون انا بوكتها لابسه دشداشه وجواها
بجامه لان من امسح البيت  ارفع الدشداشه فالبجامه تسترني هي ما خلتني ابدل شافت العبايه معلگه جابتها
وشمرتها بوجهي وهي تحچي بعصبيه
:البسي تره ما جاي ايخطبونج

لبست عباتي وعدلت شالي ونزلت وانا ارجف وريگي يابس بس شافني هادي صار يتهدد لكن سراج خلاني ورا
وهو يگله ::على كيفك هادي خلي نفتهم
وهادي يسب ويغلط ويگله //شتفتهم وحد من امها واختها
سراج لزمني من ايدي واخذني للسياره وانا مدنگه وابچي هو بقى ساكت وصلنه ونزلني اخذني الغرفه وگلي
::حنين لا تخافيين انا يمچ
سالته وانا ارجف //فدوه عمو شصاير ليش جايبيني لهنا انا ما مسويه شي

::اعرف بابا بس هذا الي يصير كله المصلحتج ومصلحة اختج اي شي لا تحچيين وصوت لا تطلعيين يجي
عمج رضا وترحين ويا اذا تردين تفتكين من هادي ومرته
انا اتعجبت من كلام سراج گتله //لا عمو وين اروح ارجع البيت عمي
هز راسه وگلي ::شنو ما واثقه بيه حنين مو انتي الي طلبتي من زهراء ما تبقيين ابيت هادي
انا برطمت وگلت //چان ابدي اروح يم بيبي جميله بس
::بس شنو لا تخافيين انا يمج انا القاعده الي لازمج انتي واختج

باوعتله وسالته //يعني عمو انت تعرف ناديه وين
هو جر نفس وگلي ::بابا حنين اسمعي الكلام الي ايهمني هسه انتي ما اريدج تبقيين يم هادي لان بقائج هناك بي
خطر عليج وعلى ناديه وحتى عليه

ما فهمت قصده طلع وانا بقيت بالغرفه احس من كلامه انو يعرف شي عن ناديه وبعدين اجه عمو رضا واخذني الفندق
ودخلت بغرفه هو گلي // اقفليها عليج ونامي
بليلتها نمت رغم القلق والخوف على اختي وعلى نفسي لكن نمت وثاني يوم اخذني سراج ورضا وطلعنا
وانا اسمع رضا يگله// اخذها للصويره يم سكنه

رغم شگد الي ثقه بسراج بس خفت ليش هلگد بعدوني عن بيت هادي ومنو سكنه وشنو راح يصير
لكن من وصلت وشفت خاله سكنه ومريم وحتى ابنهم رضا هدئت شويه
اول يوم بتت يم مريم وخاله سكنه وانا مرتبكه وخايفه وثاني يوم الصبح دز عليه سراج وانطاني فلوس وگلي
::من ترتاحيين روحي ويه مريم اشتري ملابس

وراحو بعد ان وصاني ادير بالي وما ابچي وگلي لازم ابدي اقرا واعوض الايام الي غبتهن عن الدوام
چان كل شي مبهم بالنسبه الي بس راحو انا بقيت بالغرفه ما طلعت منها وكت الغدا اجت مريم وهي تگلي
- - شنو هاي الهسه بعدج بالغرفه لا عيني ما عدنا بنات يبقن گاعدات ياالله (لزمتني من ايدي وطلعتني )
ياالله تعاي ساعديني خلي انحضر الغدا