قيـد إنتقام المجروح لــ زينب سمير

الفصل السادس عشر..

قيـد إنتقام المجروح:-
_الفصل السادس عشر .

صوت هانيا! الصراخ العالي كان يخصها وحدها، ارتعبت وهي تسمع صراخ الاخري الشديد خاصة مع اقتراب عبدلله منها وهو يردد ببسمة سخيفة:-
_بذمتك مش اللعبة زادت اثارة؟!
كانت كلماته تفوح بالشر.. والجنون، ذلك الرجل لا يمكن ابدًا ان يكون طبيعيًا، بل مجنون ومختل عقليًا، تصرفاته لا تدل غير علي ذلك، كلماته كذلك ونظرات عينيه التي تفوح بالجنون والشـر
انفتح الباب ودخل هاني حاملًا شقيقته بيده، وهنا علمت سـر صراخ الاخري الشديد.. التي اتضح انها لا تصرخ خوفًا بل قهرًا انها ربما تكون منساقة لـ الموت محملة علي يـد شقيق.. هي بسببه هنا منذ البداية
وضعها هاني علي مقعد مجاور لـ المقعد الاخري، شـدد علي رباط الحبال حولها.. بينما هي بعدما كانت تصيح سكت صوتها فجاة وراحت تنظر له بعيون دامعة، بينما هو كانت عيناه ابعد ما يكون عنها، رغم كل ما يفعله وفعله، رغم تجبر قلبه، مازال لا يملك القوة لـ التطلع لها!
لـ ان يضع عيناه بعيونها بلا ذنب او شعور بالحرج والخجل
أنتهي من ما يفعله وابتعد عنها خطوتين، فقال عبدلله امرًا اياه:-
_لهنا خلصت مهمتك.. اطلع بـرة
نظر له وكاد يتحدث، لكنه بأخر لحظة صمت واؤما بنعم وتوجه نحو الباب مغادرًا

توجه عبدلله نحو هانيا بخطوات بطيئة، راسمًا علي شفتيه بسمة مصطنعة و:-
_اهلا بالبطلة، بطلة الحكاية من البداية، اللي من غير دعمها ليا مكنش مخططي هيمشي ابدًا.. اهلًا اهلًا، تعرفي اني حقاني اوي؟ علشان كدا هعترف واقول من غيرك مكنش انتقامي هيبقي ليه طعم! انتي كنت نجمة الحكاية.. اساسها، انتي كنتي الساحرة اللي حققتلي المستحيل، اللي خليتي نور الدين يتكسر.. انتي وبس

وصـل بخطواته لها، راح يسير بأطراف اصابعه علي وجهها، بينما تحاول هـي جاهدة في ان تبعد وجهها عنه وهي ترمقه بقرف
تابع:-
_مننكرش ان جمالك دا وقع سـراج باشا في حبك وخلاه زي الخاتم في صباعك، وبقي بيشرب السـم من يـدك بكل نفس راضية، الحقيقة حقه يشربه من غير تفكير، دا انا ذات نفسي لو عارف حقيقته وطلبتي مني اشربه بعيونك الحلوة دي هضعف واشربه
حركت رأسها بهسترية بعيدًا عن يديه وهي تردد بغضب بعدما ذكرها بغبائها وبافعالها الشنيعة التي فعلتها بزوجها:-
_ابعد عني ياحيوان
مال ناحيتها، حتي صار وجهه امام وجهها.. عيناه بعيونها، عيون كلا منهم محترقة داخلها النيران.. نيران الشـر ونيران الوجع و:-
_هبعد بس بعد ما اخد حق مـي منكم
_انت مريض، مـي ملهاش حق عند حد، هي اللي اختارت طريقها هي اللي ماتت، افهم بقي
عبدلله بصراخ:-
_بسببه
اشار لنجوان:-
_وسببها
واشار لها:-
_وسبب جوزك، نور الدين بَقي الكل عليها
هانيا بصراخ مماثل:-
_نور الدين مبقاش حد علي حد، ولو بَقي.. دي حياته وهو يختار ترتيب الناس باهميتها في حياته زي ما هو عاوز، هو مش مطلوب منه يحب الكل ويضحي علشانهم، اختك هي اللي ضعيفة والمذنبة في حقها.. اختك...
قاطع حديثها بصفعة منه علي وجهها:-
_اخرسي
ابتسمت له باستفزاز:-
_اية الحقيقة بتوجع؟ حقيقة انك بتنتقم علشان سبب واهي ملهوش اي اساس من الصحة، انك بتركب غلط اختك وغلطك لناس ملهمش ذنب علشان تريح ضميرك؟!