هلو ناس _بصوت سلو_
هاي قصة وحده من البنات حبت تحجيها الكم و تطيكم نصيحة و انتو هم اطوها نصيحة و ادعوا الها ♡♡
اني عمري ٢٢سنه خريجة معهد طبي سنة٢٠١٩
تعييني مركزي يعني وره ٦شهور من التخرج اني المفروض اتعين واستلم راتب
اني بنيه اجتماعيه كلش وبسرعه اكون علاقات وصداقات ميصعب عليا شي اكبر واحد اكدر اتقربله واصادقه مهما كان عمره وشخصيته لان عندي كاريزما محبوبه ولساني ينقط عسل والكل يشهدلي بهالشي بحيث اليدخل وياي بنقاش أو محادثه ميحب يطلع من الحديث وياي
اني اهلي ناس عشائر ومتربايه زين طول فترة دراستي بالمعهد محاولت ادخل بعلاقة حب رغم هواي صارحوني ورادوا بس مقبلت وبعمري معشت الحب وعرفت معناه ورغم اجتماعيه اني بس مااحب اتقرب كلش من الشباب لان اخاف منهم ومن نواياهم ومااثق بيهم
تخرجت واني الحمدلله محافظه على ثقة اهلي وتربيتهم زين انتظرت اتعين ومرت الست الشهور والسنه والسنه والنص والسنتين وهذا حالي كدامج لسه ممتعينه
وره سنه ونص من التخرج صرنا احنا جماعة خريجي الكليات والمعاهد الصحيه بتنضيم مظاهرات وكروبات حتى نطالب بالتعيبن
الشباب كان دورهم يطلعون للشارع يتظاهرون وأحنا البنات دورنا ندعمهم اعلاميا
نظمنا كروبات على جميع مواقع التواصل الاجتماعي حتى نوصل صوتنا للمسؤولين
اني ماعندي فيس وانستا لان اهلي ميقبلون
عندي موقع تويتر واللي هو كان أهم موقع النا وكل شغلنا بي نرفع هاشتاك ونسوي ترند
نزلت تويتر بأسم مستعار غير اسمي ودخلت اغرد وارفع هاشتاكات أطالب بتعيين خريجي الصحة اني من الله عندي موهبة إقناع المقابل بكلامي واكدر اعبر بالكلام عن اي شي اريده
كنت ارفع الهاشتاك واكتب كلام من عندي اعبر عن تعبنا ومعاناتنا واحنا بلا تعيين
بقية الشباب والبنات نسخ لصق اهم شي يغردون
اما اني كنت اغرد من كل قلبي
بضرف اسبوع واحد وصلوا متابعيني لل٥٠٠ وتغريداتي توصل آلاف الاعجابات والمشاركات
جانت اكو مجموعه خاصه بخريجي الصحه منظمه من جميع المحافظات بتويتر شغلهم يحشدون وينشرون وعدهم كروب بتويتر يسولفون بي
من شافوا تأثيري بتويتر وصدى تغريداتي ضافوني بكروبهم وطلبوا مني أواصل حماسي واتبع نفس اسلوبي حتى نصعد ترند ويوصل للوزير صوتنا اني هم وافقت اكون وحده منهم
بيوم من الايام كان اكو جلسه لرئيس الوزراء من المفترض يوقع على تعيينا بي
كنا نحتاج نوصل صوتنا ونصعد ترند
بس مصعدنا لان كانت هاشتاكات أخرى اهم صاعده
صارت خبصه بالكروب وكلنا متضايقين ونبجي لان صوتنا مديوصل وتعب السنين راح يروح
الشباب كانوا يدخلون الاعلامين والاعلاميات يعلقولهم ويتوسلون بيهم يغردون ويانا
لان الإعلاميين الهم اكبر تأثير بتويتر وتغريده منهم نصعد ترند
لكن لاحياة لمن تنادي محد قبل يساعدنا
