#العابث_الاخير

10-داني واسراره وحكاياته اللي مابتخلصش

العابث_الأخير
__________________
الفصل العاشر(داني واسراره وحكاياته اللي مابتخلصش)
________________
مع تالا و داني

وصلت لفوق وهيه بتقول بالانجليزي
((من فضلك عد بنا فقد نسيت ان.........))

صرخت فجأة وكتمت شهقتها من الفزع...داني لف وبص لها بأستخفاف...قالت بلعثمه

((ا...ا...انت...ازاي..انت هنا ازاي....انت بتعمل ايه هنااااا))

قالتها بصراخ...رد ببرود وعجرفه
((دا اليخت بتاعي...وأركبه وقت ما احب))

((انا...انا عارفه هوه نصه بس بتاعك بس...بس انت هنا دلوقتى ليه....انا سبت لك الجزيره كلها جاي ورايا ليه))

((وراكي...جاي وراكي...ليه يا سنيوريتا...فاكره نفسك مين عشان انا اجي وراكي...انا عرفت ان فخامتك عايزه تروحي العاصفة...ماشي تمام....من حقك...لكن سيلفر هوك مش من حقك يا سنيوريتت ابوكي....اليخت ده مش لعبه...عشان تركبيه وقت ما تحبي....فاهمه))

((انت بتقول ايه انت...يخت ايه اللي مش من حقي يا داني بيه...انا ليا الحق ف كل حاجه...وحتي فيك انت شخصيا))

ساب الدفه وبرق لها...قال بصدمه
((نعممم ياختي...ليكي حق فيا ازاي يعني))

((طبعا ليا حق فيك...ولا ناسي اني مراتك...يعني....))

قربت منه وهيه بتتكلم لفت حواليه...تابعها بعينه وهيه بتقوله ببرود

((يعني لو رميتك ف الميه دلوقتى ودوست عليك بيختك العزيز...وقتلتك...مش هورث كل حاجه لوحدي يا دودي بيه))

بص لها اوي...وفجأة واحده انفجر ف الضحك...فضل يبص لها بأستهزاء ويضحك...غضبت اكتر...قالتله بحده

((ايه مش مصدقني...داني انا بتكلم جد....حذر مني اوي...عشان انا جبت اخرى منك...وممكن اقتلك وارتاح منك للأبد))

رجع يضحك وهوه بيبص لها كأنها بتمثل له مشهد كوميدي....قربت منه اوي ووقفت أدامه

داست ع رجله بقوه...سكت عن الضحك وبص لها...قالت له وهيه بتجز ع اسنانها

((خليك مستخف بيا يا داني....بس ما ترجعش تزعل لما اوريك انا اقدر اعمل ايه...انت بتتحداني بأستخفافك بيا...بس انت لسه ما تعرفنيش...انا ممكن اعمل اي حاجه عشان اوصل للي عايزاه))

((وايه هوه ده يا سنيوريتا))

((روحك))

حرك شفايفه ف ضحكه استهزاء بارده...وقالها
((فعلاً طفله ف جسم انسه....بس انتي معذوره...مانتي طالعه لأمك))

برقت له اوي...وقالت بعصبيه
((قصدك ايه...يعني ايه طالعه لأمك دي...وانت تعرف امي منين انت))

((لاء اعرفها....اعرفها...اعرفكم كلكم يا بنات حوا...كلكم شبه بعض...وانا مصدقك...فعلاً الواحده فيكم بتوصل للي هيه عايزاه...بأي طريقه....بأي طريقه يا تالا))