#العابث_الاخير

12-ظهور حقيقه داني لاول مره

#العابث_الأخير
__________________
الفصل الثاني عشر(ظهور حقيقه داني لاول مره)
________________
# ع العاصفة

تالا تعبت من القاعده كده...وكمان الخوف اتملك منها......الليل قرب يدخل عليهم ومفيش اي وسيله اتصال ع الجزيره دي

تالا ضعفت من الانتظار والهوا الشديد والخوف وكل حاجه حواليها....قامت وقررت انها تمشي من الجزيره دي

ولو هترجع سباحه لحد هناك....بس تراجعت عن الفكره الغبيه دي...قالت ف نفسها

((لازم ف حته هنا فيها شبكه...مستحيل المكان ده كله ميبقاش فيه ولا وسيله اتصال واحده اومال كانوا هيبنوا منتجع هنا ازاي اكيد حفروا ودخلوا الكهربا والغاز و مواسير الميا النضيفه اومال بنوا المبني ده ع اساس ايه....فكري يا تالا...فكري بسرعه عشان تخرجي من الموقف اللي رماكي فيه الكلب ده...ماشي يا داني بس لما ارجع الجزيره بس...انا هسيب لك المكان كله....انا هرجع امريكا تاني وانت والمحامي والوصيه اتحرقوا بجاز...انا هروح لاكبر محامي ف امريكا واخليه يطعن ف الوصيه دي وبرضو مش هسيب حقي ليك يا داني...ولو هخلص عليك بأيدي))

غضبها وصل لاقصاه...لو كان واقف قصادها ف اللحظه دي...كانت هتقتله...او هتأذيه بشكل كبير

النار والغضب اللي جواها بسببه...مالهومش وصف...تالا لسه بتكلم نفسها وهيه ماشيه عماله ترفع الفون يمكن يلقط شبكه

فضلت ماشيه وهيه مش شايفه راحه فين....وفجأة....شافت الزرع بيتهز ادمها.....جسمها اتخشب من الخضه...برقت وهيه بتبص مترقبه ايه اللي هيخرج من بين الزرع

شافت ديل حيوان ظهر...صرخت وكتمت بقها بسرعه...تلفونها وقع...رجعت لورا وجسمها بيتنفض من الرعب

لفت وجت تجري...اووووب لبست ف داني...شاف الخوف ف عينيها...وجسمها اللي خبطه بقوه بيترعش

مسكها وقالها بقلق حقيقي
((في ايه مالك....شفتي عفريت ولا ايه...تالا انطقي))

شاورت لورا بصابعها وهوه بيرتجف وقالت بلعثمه
((حي...حيوان...حيوان مفترس...شفته هناك..هناك بين الزرع يا داني))

برق لها بذهول...لكنه مكدبهاش...خرج سلاحه وخدها ورا ضهره ...ومشي بحذر تجاه المكان اللي شاورت عليه

شاف بالفعل كذا ديل لحيوانات مختلفه...تالا كتمت صراخها بأيدها ومسكت ف ضهر داني خبت وشها فيه

داني مخافش...لاء استغرب...همس لها
((إزاي الحيوانات دي جت هنا...ايه نزلت من السما ولا الارض طرحتهم))

تالا ضربته ع ضهره بسبب هزاره اللي مش مناسب ابدا ف الوقت ده....داني قالها بهمس برضو

((مابهزرش انا....انا بتكلم جد....مستحيل الحيوانات دي تيجي هنا بالصدفه...إلا لو مكنوش حيوانات اصلا))