Find My Bearings | ဘာသာပြန် [Main Story Completed]

3 (U)

Translator: youtiao
Editor: dounai & mantou

ကျိရှောင်ပေ စိတ်အားထက်သန်စွာအချက်အလက်မျိုးစုံရှာဖွေပြီးသကာလ နောက်ဆုံးတော့ cz2046 ပြောသည့်ရုပ်ရှင်ရုံကိုသွားလည်ပတ်ရန် စိတ်ဆုံးဖြတ်လိုက်၏။ သိပ္ပံနှင့်နည်းပညာဟာ ဘဝတွေကိုပြောင်းလဲစေပြီး ယနေ့ခေတ်မှာ လူတစ်ယောက်ဟာ voice command ကို အသုံးပြု၍ လိုအပ်သောသတင်းအချက်အလက်များကို လွယ်ကူချောမွေ့စွာရှာဖွေနိုင်ပြီ။

မျက်မမြင်များအတွက်ရုပ်ရှင်ရုံဟာ အမှန်တကယ်ပင် A မြို့တော်တွင်ရှိပြီး သူနေသည့်ရပ်ကွက်မှ လေးဘူတာဝေးသည့်ခရိုင်တွင်တည်ရှိ၏။ ကျိရှောင်ပေသည် cz2046 နှင့်မဆုံခင်အထိ ပြင်ပလောကကြီးကို မေ့လျော့ထားပြီး သူကိုယ်၌ယခင်က ဒီလိုမျိုးကိစ္စမျိုးနှင့်ပတ်သတ်ပြီး သောကများရတာမျိုးမရှိခဲ့။

ရေပြင်ဟာ ကြေးမှုံချပ်အသွင် လှိုင်းစိုးစဥ်းမျှမရှိပဲငြိမ်သက်နေပါက ရေသေဖြစ်၏။ သို့ပေမယ့် cz2046က ငါးနှစ်တာကြာပြီဖြစ်သည့် အတိုင်းအဆမဲ့ဆိတ်ငြိမ်ခြင်းကို ဖျက်ဆီးပစ်ကာ ကျိရှောင်ပေရဲ့နှလုံးသားအောက်ခြေကို လှိုင်းလုံးများတဖန်ဖြစ်သွားစေသည်။

ထိုရုပ်ရှင်ရုံသည် စနေနေ့တိုင်း ရုပ်ရှင်ကားပြသလျက်ရှိပြီး ဝင်ကြေးပေးစရာမလိုဟုအင်တာနက်တွင်ဖော်ပြထား၏။ လက်မှတ်ဝယ်ခြင်း ထိုင်ခုံနေရာဦးခြင်းတို့လုပ်စရာမလို ၊ အချိန်မီအရောက်လာရန်သာလို၏။

မတိုင်မီညတွင် ကျိရှောင်ပေသည် အိပ်ရာထဲလူးကာလွန့်ကာဖြင့်အိပ်မပျော်ခဲ့။ သူ ဘယ်လိုများအိမ်မှထွက်ပြီး သူစိမ်းများနဲ့ပြောဆိုဆက်ဆံရမလဲဆိုသည်ကိုတွေးရင်း အဆမတန်စိတ်လှုပ်ရှားနေ၏။ မနက်ခင်းနှစ်ချက်သုံးနာရီထိုးလောက်မှသာ ငိုက်မျဥ်းရင်းအိပ်ပျော်သွားကာ ခုနှစ်နာရီတွင်နိုးလာသည်။

မနက်စာစားပြီးနောက် အိပ်ခန်းထဲပြန်သွားပြီး ဗီရိုထဲခေါင်းထိုးကာ သူဝတ်လေ့သိပ်မရှိသည့် ဆွယ်တာအင်္ကျီခပ်ထူထူကိုရှာလိုက်သည်။

အဲ့ဒါဟာ သူ့ဒေါ်လေး အရင်နှစ် နှစ်သစ်ကူးတုန်းကဝယ်ပေးခဲ့တာဖြစ်၏။ အနွေးထည်အသားမှာ ထိလို့ကိုင်လို့သက်တောင့်သက်သာရှိပြီး ခပ်ကြီးကြီး အမွှေးပွပွခေါင်းစွပ်လည်းပါ၏။ စျေးအတော်ကြီးလိမ့်မည်ဟု ကျိရှောင်ပေထင်သည်။ သူသည် အိမ်မှာပဲတစ်နေကုန်နေသည့်အတွက် သူဒါကို ဝတ်ဖို့လည်းမလိုသလို သူဝတ်ထားနိုင်လိမ့်မည်လည်းမဟုတ်။