حكاوي رعب حقيقية ..
لما كنت صغيرة كنت عايشة برة مصر .. جدة بالمملكة العربية السعودية تحديدا"، كانت الشقة بتاعتنا كبيرة وواسعة جدا" وكانت عبارة عن تلت اوض وحمامين وريسبشن ومطبخ كبير جدا لدرجة انه ف حجم الاوضة نفسها!.. دة غير طبعا" طرقه كبيرة سواء طولا" او ف العرض
الشقة كان من مميزاتها انها بتحتوي على بيبان كتير .. و تقدر تفصل نصها الخارجي عن الداخلي.. هتسالني ازاي هقولك ان لما بتدخل من باب الشقه هتلاقي الطرقة الكبيرة وتويلت وباب بتدخل منه على الريسبشن وباب تاني ف نهاية الطرقة تدخل منه على بقية الشقه والغرف والمطبخ والحمام اللي جوة وهكذا
وبكدة لو قفلنا البابين اللي ف الطرقة دول نعتبر فصلنا الجزء الخارجي عن الجزء الداخلي اللي بننام فيه بليل
انا بحاول اديكم شكل الشقة او انكم تفهموا تقسيمها عشان لما احكي تتخيلوا معانا، بالنسبالي قضيت وقت كبير من حياتي فيها ودة لأَنِّي كنت الأصغر ف اخواتي تعالوا بقى نحكي عن اللي بيحصل ف الشقة ..
١- بصوا ياجماعة في حاجات كانت طول الوقت مشهودة ومعروفة لكل شخص فينا جواها زي مثلا" صوت حد بيمشي ف الطرقة بليل وكلنا نايمين ، او حد بيخبط تلت خبطات جنبنا على طرابيزة او على الخشب واحنا كلنا ف نفس الاوضة مع بعض، او اننا نسمع اسماءنا بتتنادى من بعض ولما نروح للي بينده علينا يقولنا انه مندهش خالص!
وكمان ريحة السجاير الرهيبة او الروائح الغريبة اللي فجاة بتملى المكان وكان في حد جوا الشقة هو اللي حاططها او بيدخن مع العلم ان محدش عندنا بيدخن اصلا"!
وقيس على كدة اختفاء بعض الحاجات او تغيير مكانها .. او انك تكون قاعد بتتفرج على التليفزيون وتسمع صوت حد جاي ناحية الاوضة والصوت دة دخل الريسبشن ادامك وتلاقي الكنبة زيقت او طلعت صوت ونزلت شوية وكان في حد قعد عليها وانت مَش شايف اي حد!
٢- اللي قولته دة كانت حاجات بتحصل مع اغلب اللي ف البيت كلنا بس في حاجات فردية كدة منسهاش خليني احكيهالك!
لما كان عندي ٨ او ٩ سنين تقريبا" كنت وقتها بنام مع اختي ف أوضتها واللي بعد ما اتجوزت بقت اوضتي بالمناسبة، المهم كنت نايمة جنبها على السرير وفتحت عيني وبتقلب .. واشوف حاجة واقفه ادام السرير يعني ناحية اخر السرير عند رجلينا وبتتابعنا.. انا شبه لمحت الشيء دة واختفى بسرعة وقعدت ع السرير ابص للمكان اللي شوفته فيه وانا مَش مصدقة لثواني وبعد كدة سكت ، سكت لسبب واحد اني حكيت حاجات مشابهه لاهلي وقتها ولكن مقتنعوش وقالولي دة تهيؤات اما لانهم مَش عايزني اخاف او لانهم فكروني بألف الحكايات دي بسبب الحاجات اللي هما بيسمعوها
٣- من المواقف اللي كمان مَش هنساها .. كنت بذاكر بليل ف الريسبشن وأهلي نايمين ، وكنت يوم خميس والجمعة اجازة فكنت بذاكر واخد بريك اتفرج ع التلفزيون وارجع أذاكر وهكذا
أنت تقرأ
مذكراتي المرعبة (متجدد)
Paranormalمجموعة من الحكايات االمرعبة والخارقة والحقيقية التي حدثت لي (د.رانيا احمد) او تناقلت لي من اقاربي والمحيطين ، وهي حكايات واقعية 100% من الطفولة وحتى اليوم ..يتم سردها على اجزاء متفرقة وبأسلوب سلس وشيق .
