مذكراتي المرعبة (متجدد)

(3)

الحكاوي الحقيقية ٣

استنادا" لروايتي لإحداث حقيقية من حياتي الشخصية فتعالوا احكيلكم احداث واقعية جديدة من عالمي الخاص

١- من فترة كدة كنت بشتغل ف عيادة وكان صاحب العيادة دكتور زميل، ف يوم من الأيام حضرت حالة وكانت ست كبيرة .. ودخلت الست للعيادة عشان الدكتور هو اللي هيشخصها ، الحالة كانت ست كبيرة وواضح عليها انها متبهدلة كدة .. سواء ف طريقة مشيها او ف القطنة الكبيرة اللي كانت مغطية عينها اليمين ودة طبعا" اللي خلاني بدون تردد اروح أساعدها ف الدخول وأنها تقعد كمان على كرسي الكشف ، وكنت واقفه معاها والدكتور بيكشف عليها كمان

الست لما دخلت وقعدت الاول على المكتب كان كلامها عادي وقالت للدكتور على شكوتها لكن لما قعدت على كرسي الكشف قبل ما الدكتور يحط ايده ف بقها لقيتها فجاة كدة وبدون اي تدريج بتقول

" دة جاي ورايا لحد هنا" ... وقتها بصيت انا والدكتور لبعض باستغراب كدة ولف الدكتور وشه ليها وقالها" مين اللي وراكي يا فندم!"

فردت الست ( القرين.. جاي ورايا لحد هنا .. اهو واقف هناك اهو)

قالت الست كلمتها وانا لقيت وش الدكتور قلب الف لون وانا كمان استغربت بس انا من الناس اللي بتعرف تمسك نفسها ف المواقف دي والحقيقة انا اصلا" اعتقدت من منظرها كدة انها مَش طبيعية .. عندها خلل عقلي بشكل عام ودة طبيعي للدكاترة اللي بيتعاملو ناس من طبقات وأنواع مختلفة

ودة اللي خلاني ابتسم كدة للدكتور واطنش وكاني بقوله عادي دي شكلها ست كبيرة ومريضة فكلامها غير متزن شوية وبالفعل الدكتور طنش ورجع يكمل شغله وهو متجاهل اللي سمعه

بس المشكلة ان مرة واحدة كدة الست دي مسكت أيد الدكتور وهو بيشتغل وفضلت ماسكة ايده بشكل مرعب وهي بتضغط عليها وبتقول كلام غريب جدا"

( قاعدين يرقصوا هناك .. ليل نهار بيرقصولي) ( ربنا ينتقم من .......هما دول السبب) ( هي مرات ابني ال......... جابتهم عندي )

دة كان ملخص لكلام الست الغريب وهي قافشة أيد الدكتور زي ما يكون هيهرب والدكتور بيبصلها بصدمة وفزع وهو مَش عارف يتكلم ولا يتحرك لحد ما بدا يستوعب ويحاول يشد ايده بهدوء لكن الست مَش راضيه وباصه ف وشه مباشرة وهي بتعيد نفس الكلام ، ورجعت كملت

( انا دبحت وغرقت الشقة بالدم .. جوزي كان موجود .. كل شويه أدبح وأغرق الشقه دم عشان اخلص منهم) منه لله أبني ومراته ال.... ادي عيني راحت .. هي السبب .. هي اللي جايباهم )

شد الدكتور ايده وقام واستاذنها وطلع برة العيادة وسابني معاها، وانا ساكته .. الكلام كان غريب ومخيف بس لحد دلوقتي انا بتعامل مع الحالة اللي ادامي على انها هستيريا.. وارد جدا" تشوف عيانين مهتزين او عندهم مشاكل عقليه ، ولكن وانا واقفه كدة حسيت بايدها وهي بتمسك رجلي!