مذكراتي المرعبة (متجدد)

(4)

مناسبة البرد بقى يلا حكاوي رعب واقعية

١- من فترة كدة وبعد حكاية الست الغريبة اللي جت ف المكان اللي كنت بشتغل فيه سكنت بيت جديد ، وكان البيت او الشقة الجديدة دي شقة كبيرة وأول سكن وبتتكون من ٣ اوض و٣ حمامات ومطبخ وريسبشن كبير جدا" وطرقة

لما شوفت الشقة ف الاول كانت شقة حلوة وف مكان كويس وهادي ووقتها اخترت أوضة بعينها وكانت الاوضة دي ملحقة بحمام .. ورغم ان اهلي اقترحوا عليا اختار اوض تانية اكبر منها كمان الا اني قولت احسن وللعلم كل الاوض كانت كبيرة بس كان في اوض اكبر

المهم ان الشقة كانت كويسة وكل شيء وزرتها وهي بتتجهز وكل شيء والدنيا كويسة جدا" لكن المشكلة كلها ابتدت اول يوم من السكن..

اول يوم دخلت فيه الشقة للسكن حسيت بإحساس غريب جدا".. احساس وكأنه مَش مكاني او مَش هعيش فيه! والمشكلة ان إحساسي بعدم ارتياح شديد مكانش باتجاه الشقه كلها بنفس النسبة لا... النسبه الأكبر كانت باتجاه أوضة بعينها ( اوضتي انا )!

احساس غريب ومقبض حسيته اول ما خطيت جوه الاوضه بتاعتي لدرجة اني قلقت ومبقتش فاهمة في ايه، ومن اليوم الاول وانا دة كان باين عليا ولكن اي حد كان بيقولي ان السبب هو ان المكان جديد مَش اكتر ومفيش اي حاجة غريبة ..

وبالفعل بدأت احاول أتجاهل الإحساس دة قدر الإمكان وأحاول اقنع نفسي ان المكان اختلف وان دة مَش تعود الا اني رغم كل دة مكنتش بعرف انام خالص جوة الاوضه دي بالذات!... وهتستغربوا لما تعرفوا اني كنت ممكن انام جوة اي أوضة تانية او على الكنبة برة ف الريسبشن لكن مقدر انام أبداً على سريري وجوة الاوضة !

وفضلت على هذا الحال شوية ولازال احساس عدم الارتياح من الاوضة دي بالذات جوايا ، ولحد ما يوم كنت فيه ف البيت لوحدي ووقتها بس حصل اول موقف ليا مع المكان

ف اليوم دة كنت لواحدي ف البيت تماما" .. وكنت عايزة اخد شاور وطبعا" عشان اخد شاور لازم اجيب هدوم من الدولاب اللي هو فيييييين؟.. ف اوضتي 😂

فضلت فترة كدة ابص الاوضه وانا بفكر 🙄 ادخل ولا مدخلش وف الاخر قررت اتحدى خوفي وادخل واثبت لنفسي ان كل دي اوهام ومفيش اي حاجة ممكن تحصل ، ودخلت فعلا" اوضتي وبدات اطلع هدومي من الدولاب بس وانا بطلع هدومي كدة سمعت صوت ف الاوضة !

بصوا ... كان عندي تويلت ملحق بالاوضة زي ما انا قولت ف البدايه لكن محدش يمكن فاهم اني عمري ما كنت بدخله واني كنت بستعمل اللي برة الاوضة ودة لأَنِّي بردوا مكنتش برتاح ليه لسبب مجهول!، التويلت كان ف جنب السرير يعتبر او على نفس الحيطة اللي السرير منصوب باتجاهها .. والدولاب ف وش السرير ، الصوت اللي سمعته كان بين السرير وباب التويلت

والصوت كان صوت معروف لحد بعينه بس وكأنه بيتكلم بصوت واطي او بيهمس!.. وقيس على ده صوت تنفس واضح ف الاوضة!