السلام عليكم ✋🏻
{ياعزتي للي حزونه كايده ماهي بقده } هذي الرواية ياحبايبي ماهي من ذا الزمن وابطالها ماهم من ناسه لا لا هي من الزمن اللي كانو فيه القرايب حبايب ماهم عقارب من زمن الناس فيه قلوبهم على بعض اييه اكيد عرفتوه ذاك الزمان البعيييد البعييد اي...
: والله يالصقر ان الحال ماهو عاجبني ! الصقر : علامك ؟(وش فيك) :ياخي فيه احساس لاعبٍ في صدري لعب ناقضٍ ( مفسد )مقعدي (مجلسي) بس ازريت {تعبت} اعرف سببه! الصقر : ماعليك ياخوي هذي كلها وسوسة شيطان ولا الامور شوفة عينك والحمدلله الخير مالي القبيلة وصيتنا ذايعٍ { منتشر }بين العربان نغزي ولا ننغزا : الحمدلله : ضاوي ياضاوي ضاوي : لبيه ياعمة العمة : تعال صوبي بغيتك (تعال لي ابيك) ضاوي : يالله فمان الله يالصقر تولم للمقناص لاتهفى ! ( تجهز للصيد لاتنسى ) الصقر : الله معك دخل ضاوي : امري يالغاليه في خاطرك شي ؟! * ضاوي عايش مع عمته من بعد موت اهله في قبيلة آل رِشَدا اللي خاله هو شيخهم عمته عفرا ارمله ماعندها ذر (عيال ) عمرها ٤٥ مربية ضاوي من يوم عمره ١٠ سنين وهذا هو ضاوي اللحين رجال ابو ٢٥ وماراح مرباها عبث الا اثمر من في العربان اللي حولهم مايعرف ضاوي !! فارس قبيله آل رِشَدا وعزوته المعروفه راعي اللَّحْفَا {فرسه} رفعت عفرا عيونها له وهي تفكر : الغالي ولد الغالي والله لو ان الود ودي انك ياسعد تشوف ولدك وفعوله اللي كل القبيله تفتخر بها صدق من قال من خلف مامات عفرا : ياضي عيني عاني ولمت لك زهاب المقناص اماك قلت لي البارح انك بتغبش بعد ماتصلي الفجر هنيا؟ ( شوفني جهزت لك اغراض الصيد لانك قايل بتروح بعد صلاه الفجر ) ضاوي : الا ياعمة قلت وبئذن اللي مايخيب اني على رهيفان العصر {قبل الغروب } وانا عندك عفرا: بئذن الله تروح وترجع بالسلامة ياضي عين عفرا ضاوي : جعلني ما انحرم يالله فمان الله طلع وركب اللحفا ماسماها بذا الاسم الا من طول ذيلها اللي كنه يلحف الارض معروفة اللحفا في الغزاوي والغارات تنعرف هي وفارسها لاشافو الذيل وسبيبه الاسود الطويل (سبيبه= العر اللي عالذيل )
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
وبدا يمسح على عرفها لين قابله الصقر على فرسه : تراني قد قلت لعمتي ان ممساي (نومي) بئذن الله عندها وعلى رهيفان العصر وحنا عندك الصقر : اقديت وانا اخوك قلب عمتك عليك حتى لو انك شايبٍ منعوي ( يعني شايب هرم) ضاوي : الله اعلم من اللي بيصير شايبٍ منعوي وانت صادق عمتي تشيل همٍ لي انا نفسي مافكرت به الصقر : جعلها الجنة ضاوي : امين كملو طريقهم لأرضٍ عندهم معروفة بطيب قناصها يوم وصلو الصقر : وش رايك نعيد الذكريات يوم كنا نتبارا بأي قنيص أطيب من الثاني وابوي هو اللي يختار ضاوي : قصدك يوم كنت اغلبك وخالي هو اللي حكم😂 الصقر : بدينا شوفة النفس ترا ان فزت انا ٥٠ مرة فأنت مافزت الا هقوتي انها ٦٠ مرة ماهو بذاك الفرق (هقوتي = ظني ) ضاوي : واسي عمرك واسيها ولو اسأل خالي بندر قال من اللي دايم قناصه طيب وبعدين يالصقر انا وانت واحد ماعلينا خلاف بن خال وعزيز وفعولك سابقتك واخوان وانا ادري ان لاصابني شي ولا اذى انت اللي بتشد عضيدي مثل ما انا بسوي لك في إمْحَقا الظروف وحلوها (امحقا = اسوء) الصقر : صدقت ياضاوي ضاوي : تجهز هذا حنا دخلنا ارض القنيص خلنا نخش ونبدا نصيد توزو لهم في مكان عشان مايهج الصيد لمحو لهم غزال طيب رفع ضاوي سلاحه ويوم قده بيفك الزناد سمع طلقه وبعدها طاح الغزال على جنبه لف عالصقر مستغرب لقا نفس نظراته على الصقر جذب نظرهم الفارس اللي لبسه كله اسود في اسود وعليه لثامه نزل من فرس فيها من الزين الشي الكثير وبدا يقضب غزاله بيحطه على ظهر الفرس ضاوي : ايا الصقر ظفر بالغزالة ذيبان مالنا فيه نصيب تشبح لنا منا ولا منا يمكن نلقا لنا شي (تشبح = ابحث ) الصقر : وش رايك نتجه مناك يمكن نلقا لنا رزق ضاوي : توكلنا على الله لمح الصقر روحة الفارس من درب يعاكس اللي هم متجهين له ويوم جت سنود القايلة (وقت قبل الظهر) شبو ضوهم وشوو لهم من اللي صادوه وسوو لهم ذيك الدلة اللي تكيف الراس تقهوو وقدعو وعقبها تغدو وترقبو لصلاة الظهر ثم قيلو وبيكملون المقناص بعد المقيال يمكن يلقون لهم صيد مايتفوت وعلى وقت حلة السربة (من الساعه وحده الى ثنتين الظهر تقريباً ) صحصحو من النوم وقفضو غرضانهم وغيرو مكانهم جنب غديرٍ للماء استقو واوردوا خيولهم وفي ذا الوقت اقبل عليهم ثلاث اشخاص ثنين منهم كانو جبرين شوي ( ماهم بهزيلين ) وثيابهم لاهي رثه ولاهي فارهة عكس الاخير حيث انه أعجف نحيف ( ضعيف بنيه ) ملابسه راهيه وملامح العجرفة والغشامه على وجهه باينه حيث نطق : زحو من الدرب بنورد الغدير ( ابعدو عن طريقنا بنشرب من الغدير ) الصقر وهو عاقد حواجبه : يابن الحلال ارض الله واسعه تعالو في نحرنا ولا على يمينا ولا من يسيرنا ماهو بفارقه ولا اصبروا لين نخلص وِرْد (نحرنا = قبالنا) : انا خلاوي بن جلعود احتري رواعي القوم !؟ (احتري = انتظر) الصقر : لا بالله غشيم وانا خبري ان جلعود داهيه ولو انه شراني ماخذيت منه الا الشرور ياعزتيله فاقع كبده ذلحين نزل خلاوي من خيله و : رماح ، وضاح! وضاح ، رماح : على ايش ياطويل العمر خلاوي بين هو يقرب : الزموه لي ( امسكوه ) ضاوي وتوه يتدخل : ادخر الشيطان وعين من الله خير خلاوي وهو يصيح : رماح وضاح ماسمعتو اللي قلت ؟!! شمرو يديهم ( رفعو كمومهم ) ضاوي وهو يقرب منهم وبانت لهم اللحفا وسبيبها : راعي اللحفا ضاوي !! وضاح : ابك يا خلاوي ذا ضاااوي ! ضاوي بن سعد راعي اللحفا فارس قبيلة آل رِشدا ! شبهت الاسم بس أكدلي هقوتي فرسه خلاوي : ضاوي اجل ! وهذي هي زانت وانا بن جلعود الزمو خويه لي لزمو الصقر وبخبث و غشامه بغى يطعنه في بطنه لكن الصقر لزم الخنجر بيده صح انه سوتله قطع ماهو بهين لكن منع عمره غير الجرح السطحي اللي في صدره فكوه بسرعه ناوين يهجون وصل ضاوي وسيفه بيده : راعي اللحفا ضاوي ورماح ووضاح قدهم على خيلهم ما ابعدو وخلاوي وراهم هيهات هيهااات ان خيولهم تسبق اللحفا وصل ضاوي لخيل خلاوي ومسك خلاوي من قفا ثوبه ولبنيه خلاوي الضعيفه واللي هي عكس ضاوي بكثير فضاوي مفتول العضلات طرحه عن ظهر خيله ثم نزل ضاوي عن اللحفا وقام يلعب بالسيف قدام خلاوي وعيونه ماهي ناوية خير ابد ارتعدت اوصال خلاوي هو داري انه ماهو بقدهم وخاصه ضاوي بس حسب عمره بينحاش ولا ضاوي بواصله ضاوي : اجل ياخلاوي هذا وانت عارفٍ من انا ؟! ومسوي نفسك الشديد القوي ! ماسألت عمرك كيف ذاع صيتي ؟ انا ياخلاوي ماتنعاد لي كلمة كان يقول ذا الكلام وهو يقرب من هالخلاوي وعاده للحين يشقلب بالسيف وعيونه لو ان النظرات تذبح كان خلاوي اللحين ميت ضاوي : اللحين خلني اتذكر اي يد من يدين الصقر انصابت ؟؟ خلاوي : السموحه ياضاوي بس الغضب عماني ضاوي : بسيطة مثل ماهو عاميني ذالساع (ذساع =الأن) خلاوي : كم تبي بفدي نفسي انا بن جلعود اطلبو منه اللي تبون يعطيكم ضاوي وصل له وخلاوي مطروح في الارض ويحاول يزحف لورى : تذكرت اي يد من يدين الصقر انصابت ومسك يد خلاوي اليسرى ووطى الثانيه برجله : اليسرى ان ماأخطيت ثواني الا صيحة خلاوي اللي اكيد الصقر وخويا خلاوي سمعوها الدم مالي يد ضاوي ومغرق خلاوي بترها !! من نص الذراع !! وقف ضاوي وهو ماسك يد خلاوي : كذا خذيت بثاري منك لابيني وبينك اللحين طلابه ولاجيت ثاني مره تنفخ ريشك شوف من اللي نافخه عليه لاتاكلك الندامه بخليك ذالحين وخوياك وكاد انهم سمعو صياحك خلاوي : حرامٍ علي ياضاوي اني مابخليها لك والايام بيني وبينك شاهده ضاوي وهو يركب فرسه: ما قلت لك لاتنفخ ريشك؟! يالله وراي من لازم اداويه ورجع دبره بأسرع ما للحفا من سرعه وهو يفكر بالصقر ماغاب عنه الا ١٥ دقيقه وهو معه رقعه (قماشه)ودواء (نطق ابطالي للهمزه ضعيف جدا لدرجه انها يالله تنطق فإذا جيتو تقرونها اقروها {دوا} )مثل ما مع ضاوي بس مع ذلك شايل همه ذا بن خال واخو دنيا اقبل عليهم لقا عند الصقر الفارس الملثم اللي حظا (فاز)بالغزاله وهو يداويه صار يشوفه وهو حاس بإحساس غريب يحس بشي يدور في قلبه احساس ماعمره جربه بس رجح السبب للغضب استعاذ بالله وقال: ....
________________________________
يتبع🔚
هذي روايتي الثانيه 😊 وهي بصراحه طلب خاص اني اسوي روايه في ذاك الزمن وتكون باللهجة البدويه الحمدلله اني القط اللهجة بسرعه رايكم ؟؟
