عزتي للي حزونه كايدة ماهي بقده

باقي لي من وسعه الصدر شعره

وضاح بهمس: رماح انتهينا
رماح : تأكدت منهم كلهم ؟
وضاح: ايه ما خليت احد
رماح : لقيت من بينهم احد صويبٍ جدا؟
وضاح : الاغلب متصاوب لكن لله الحمد ما شي يمنعهم من السير
ان كان احد اظن جرحه يمكن يعيقه يمكن الرجال اللي تحاكى من شوي ايش كان يقاله؟! نمر ان ما اخطيت
رماح : النمر! ليه جروحه اجل حرجه؟
وضاح : والله اني مافحصته الفحص الدقيق لكن الغالب والظاهر انها حرجه
رماح : اجل تعال تبادل معي وكل من جاك صرفه لا تخليه يركز بالاسرى
وضاح : ابشر
راح رماح وهو يتمعن في الاسرى ومثل ما قال وضاح مافيه صويب اصابته بتعرقله الا النمر اللي واضح ثقل انفاسه
قرب منه وهو يقول : ورني جرحك يالنمر
النمر :ماله داعي مافيه الا كل خير
رماح : ان سمعت كلامك ماظنتي انك بتشرد مع العرب
النمر وهو يخزه بالنظرات: وش قصدك ؟!
قال رماح : ورني يا رجال وبعدها بيجيك العلم
وهو يشوف صدره اللي فيه اثار الدم ورجله اللي مادها
النمر : ماله داعي مغير رجلي اللي مادها وجريح في صدري وماهو برادني من اللي بسويه
رماح وهو يثني ركبه ويمسك رجله ويبين جرح رجله : انا ما لزمت عليك حباً فيك لاني اعرفك ولا انت تعرفني غير -وحط عيونه بعيون النمر والعزم يقدح منها- انا رجال مالي في العراقيل ان نويت على شي مالي الا اتمه انت قلت الموت اهون من المقعاد وها انا امسد لك الدرب ان كان ودك تسلكه ولا ماني بغاصبك! وش ردك يالنمر؟! بتحط يدك بيدي؟ ولا بتجلس مكانك؟
النمر وهو ياخذ له نفس يحاول يهدي عقله اللي تعب من التفكير والسهر قد له ليالٍ وهو شايفٍ الشين
فتح فمه وبهدوء : لا بالله يدي بيدك سو اللي تشوفه
وبين ما رماح يشوف ويداري جراحه
نطق النمر: الا يا رماح وش اللي خلاك تساعدنا؟
رماح وشبح ابتسامه لاحت على شفاه: تصدقني لو قلت لك مدري ؟
النمر : اجل تهقى اني بصدقك؟
رماح : ما ظنتي بتصدقني
النمر : وهذا الوكاد اني ما صدقت انك تفعل كل ذا بدون اسباب
رماح : صدقت يالنمر صدقت لي اسباب ودوافع غير ماني بقايلها لك ذلحين
النمر : ان كان ماهو ذالحين فمتى؟
رماح وعيونه بعيون النمر: ان تحررت وتلاقينا عقبها فذاك الحين بتعرفها انا الحين شاغلٍ بالي حاجةٍ ما ادري ان كنت بعدها بَنْسَر ولا بنضر ان تلاقينا فحينها الوكاد انها انقضت
النمر : ان قلتها الحين ولا بعدين وان ماقلتها ابد ماني بحريص
الا يا رماح وش قومك عايشٍ مع حثالة العربان؟! وانا واحدٍ اخبر الرجال من عيونه
رماح: حثالة العربان !؟ هه اجل ، والله اللي جبت وصفهم غير قريب قريب وانا اخوك الحال ينقلب لحال
وصار يتلفت يمين ويسار ان كان حوله احد
انحنى لاذن النمر وهو يقول : انسدح على جنبك واليا سمعتني اعتزي انصرع لا تحرك لك طرف انت ما انت قاوي  تشرد مع الباقي لازم اهربك قبل باقي الاسرى
جاء النمر بينطق الا الجمته نظرات رماح
وما درى الا وهو يشوف ظهر رماح مبتعد
متجه لوضاح بدا يكلمه
رماح : النمر ماهو بقاوي يشرد مع الباقي
وضاح بقلق: وش السواة يارماح لو بنتصرف بيشكون بنا !
رماح : انا ادري عشان كذا بنسوي -كيت وكيت وكيت - (كيت=كذا)
توسعت عيون وضاح وهو يسمع اللي يقوله اخوه
رماح : فهمت يا وضاح؟ الكلام ذا ما يحتمل ادناة الخطأ ولو انكشفنا كل اللي سعينا له وخططنا له بيطير مطار الطير
وضاح : بس ياخوك ء
رماح : لا بس ولا غيره مادامنا عزمنا على الامر ماله الا ننجح ولا الفشل ماهو بسارنا
وضاح : ماعد ورا قولك كلام توكلنا على الله 
رماح : مثل ما اتفقنا بعد ما اروح بالنمر نفذ اللي اتفقنا عليه ولاقني في المكان اللي واعدنا ابن جلوي به
تلفت يجس الوضع ويوم صار مثل مايبي ابتسم لين بانت اسنانه
البسمة اللي مالها الا ثواني واختفت يليها صوته بأعلى ماعنده
: اببن بااااارق
وهو يتجه للنمر ويسوي نفسه يجس نبضه ونفسه وقام يقول : انا لله وانا له لراجعون 
وهو يمسك النمر ويسنده على ظهره وبدا يمشي وهو يحاول يخفي بسمته يوم شاف الحشد اللي وراه ولقى الرئيس اللي موكله جلعود عليهم
:مات يا جرو مات
جرو: انت صادق ؟!
رماح : مثل ما انت شايف لا نفس ولا حركه
جرو وهو يقرب : تأكدت  ؟!
رماح بتوتر حاول يخفيه ونجح : ايه متأكد
جرو رفع يده تجاه النمر وعيونه في عيون رماح
هنا وقف قلب رماح قبل النمر
النمر وهو يحس بيد تلامس طرف خشمه كتم نفسه وهو في داخله يردد: يارب يارب يالواحد الاحد
رماح اللي جبهته صارت تلمع من التوتر : وش السواة ذلحين مادام جرو استقعد ماهو برايح الا ماخذ العلم الصحيح مالي الا اتصرف مع انها مغامرة الا انها ازين من اني اوقف مكتف اليدين
وتلفت يدور عزوته عضيده من لا تجمعت عليه سود الليالي والايام كان هو عونٍ له عليها 'وضاح ' لقاه واقف ماهو ببعيدٍ عنه ومثل ماتوقع لقا يده على سيفه وعيونه تترقب له ينتظر بس يتقدم جرو بخطوه ليهاجمه انتبه وضاح لعيون رماح اللي تشوفه ولاحظ الإيماءة اللي ارسلها رماح له وبدا يقرب منه بشويش
اما رماح اللي لاحت شبه ابتسامه على شفاه يوم فهم وضاح وش بغى منه
بدا رماح يخفف من مسك جسد النمر اللي على ظهره ويميل بجسده بنيه ينفلت جسد النمر منه يوم تأكد ان مابقى شي وينفلت صاح : اعقصصص ياوضاااح الميييت بيطييح
وماهي الا ثواني الا و وضاح وراه يمسك النمر ويعدل وضعيته على رماح
اما جرو اللي ابتعد بكم خطوه بعد صيحة رماح قامت عيونه تتنقل من رماح لوضاح وتطيح عالنمر فتح فمه : دامك ضعيف ومالك قوه وشوله تفزع ما انت بخاسر شي اليا خليت غيرك يشيله واما عن الشرهه والمناقيد تطمن محد بناقد على من لا له لا اصل ولا فصل
هنا رماح اشتدت قبضته اللي ماسكه النمر
لدرجه ان النمر حس ان الجزء اللي ماسكه رماح بينطحن بأي وقت
اما وضاح قامت كلماته تدور في راسه وخلت شيطانه يناقز تقدم من ورا رماح ناوي له نية الا وقفه صوت رماح المكظوم : وضااح
وقف وضاح لا ارادي يوم سمع نبرة رماح التفت على اخوه
اخوه اللي عاش مثل ماعاش اللي قاسا معه مقاسيه كيف مايفهمه من لمحه ! ولا نظره !
فهم الوجع ، الضيق ، الغضب ، والاهم الحسرة اللي بانت في عيونه
انقبض صدره من شوفة اخوه بذا المنظر ويقول في نفسه : والله لو ما ان حنا وعدنا العرب بفكهم كان مخليه خبر كان ولاهمني وش بيصير اجل ما بقى الا هالجرو ذا ملفظه ما اكون وضاح ان مادفعتك ثمنها
هز راسه لرماح وتراجع
هنا رماح كنه هدا شوي كان على اعصابه من وضاح لايثور ولاثار وضاح من بيوقفه؟! غضبه نار وتستعر
رماح وعيونه تتقد تعاكس ملامح وجهه الباردة : ابد ماهو من طبايعنا لا انا ولا اخوي الضعف والتخاذل ولانا نمشي على الشرهه والمناقيد حنا مشينا من حر راسنا وان كنا مانعرف من وين حنا ومن اي عرب
تطمن! الرجال واهل العز والشان تبان من وجهها وممشاها ( قال اخر شي وهو يعطيه نظرات تقييم بسخرية) وابد ان كنت ناوي تخيس الجيفة وتنتن علينا خذها وخس معها محد بقايلك شي
جرو بغضب : ايا الدااااعر - وقرب منه وهو يلهث بغضب وفحيح انفاسه اخترقت اذن اللي يجاوره تقدم من بين الصفوف اللي احاطت بهم بحماس وترقب رجل طويل وعريض عيونه مكحلها بالكحل تكحيل
وله شعر مجدل بعضه وفاك بعضه قرب من جرو وهو يمسك كتفه
هنا جرو اهتاج زياده والتفت له بنيه يهجم لكن لما شاف من اللي مسكه
:ن ءءا نزار؟ وش تسوي هنا ؟
نزار : جاي اشوف وش فعلتوا هنا مرسلني لكم جلعود والحين تنح خل الصبي ينطل الجيفة لاتخنز عندنا
الجرو وهو يرسل نظرات لرماح مليانة غيض : مثل ماتشوف
نزار لرماح : رح لطريقك وعود على اخوك
هز رماح راسه له ومشى لخيله والخيل اللي مجهزها للنمر
سدح النمر على ظر الخيل وركب فرسه وهو ماسك لجام الثاني والنمر للحين وهو مستمر على انه ميت ومتحمل الم جراحه اللي تفاقم بركوب الخيل
—-
اما عند وضاح وبعد ما انفضوا الناس بمراح رماح وراح نزار مع جرو وهدا الجو راح للأسرا وهو يراقبهم ومثل ماقال وضاح بدا يزين الغدا تركه عالضو وهو يدور للغليم اللي شافه اولى
شد انتباهه هالغليم
وبين ما عيونه تجوب على الجلوس شبهله على واحد جالس في الطرف لحاله  قرب منه وسمعه وهو يتكلم بصوته الغريب على مسمعه : هالحين وين بروح لاني بدل ولا لي خوي واخاف ان رافقت لي اي احد انهم بيعرفون اللي ما ابيهم يعرفونه يوووه انا اخطط وافكر وانا ما ادري هو انا بطلع من هنا حية ؟! ودي اموت على اني صبي ولا يدرون بإني مرة !
من حظي اني لابسه لبس غريب عن حريم هالمنطقه ولا كان مصيري مثل باقي الحريم البارحه ان اكشفوني ما ظنتي اني بصير بازين منهم !
وبين ماهي تخطط وتفكر ما درت باللي وراه ومفتح عيونه بصدمة من اللي جالس يسمعه
بنت ؟! معقولة!
—-
نوف بعد ماسمعت كلام قوت
: ياعزتي لهم  يا اخيتي عزالله اللي تجمع الزمان والعرب عليهم
من سوء (بس تنطقه سو) الحظ ما خذاهم الا جلعود الهلامه 
وانتي الحين راجعه من ال رشدا وش تفارقتوا عليه ؟ ( اتفقتم )
هنا جلوي تحاكى : ماقلتي لنا يا قوت وش اللي صار عساه طاوعك
هنا قوت صمتت لثواني وهي تشوف جلوي بنظرات نترقبه ومتوتره
تدري ان اللي بتقوله ماهو عاجبه ويمكن يغضب وما يطاوعها
قوت : الامور طيبة ان شاء الله ما صار الا الخير
قابلته وتفاوضت معه واللي طلعنا به انه بيضمهم في قبيلته
هنا جلوي استبشرت ملامحه بعد القلق اللي جاه من نظرات قوت بنته ويعرفها كان يحسب ان الامور ما مشت مثل ما بغت قاطعها وهو يقول الحمد لله مشت الامور بلية (بلا) غصايب
كملت قوت وعيونها بعيون جلوي : بشرط!
جلوي وهو كنه اللي متوقع ذا الشي : ويش هو عساه باليد ماهو بعسير
قوت : والله يالجلوي يبينا نروح معهم مانخليهم على ساس ان حنا عيلة وحده عشان لان عربه اذا درو انهم من ربع جلعود ماهم مأمنينهم ولا بيقبلون جوارهم
جلوي لقوت ونظراته تاهت : يا قوييت انتي اخبر بجوابي
قوت بتنهد : اني خابره ياجلوي لكنها فتره لين يستأمنون ونطلع من القبيلة
جلوي : يا قوت وانا ابوك انا ما استجرت بأحد يوم عودي غض وبليا احد استجير ذلحين والشيب كاسيني !
قوت وهي تقرب منه وتحب راسه : ولا احد بيغصبك على ما لا تبيه ما دام بنتك حيه واللي تبيه بيصير
جلوي : يا مال الغنيمه يا قوت ودي ان مطر بينا ويشوف زينه البنات وياقوتها واللي ما مثلها حتى بعض الرجال
قوت : الله يرحمه ياجلوي انت اللي ربيتني وكبرتني انت اللي عزيتني وانت اللي لملمت وضمدت جراحي يكفيني شوفتك بخير واخذ شورك بالصغيرة قبل الكبيرة
——
عند رماح والنمر
وبعد ما توارت عنهم التلال اللي فيها غيران جلعود وربعه
خفف رماح من سرعة الخيل والتفت للنمر ونطق : ابعدنا عنهم يالنمر
النمر وهو يحاول يستوي على الخيل : مابغينا الحمد لله اللي نجانا
رماح : ايه بالله حسبت ان نحن انكشفنا خلاص الا بجية نزار
وسكت له شويات ويلتفت للنمر :عربك قريب من هنا ؟
النمر : لا بالله الا حنا غرب وهم شرق
رماح :اجل به غار قريب من هنا وماهو بمكشوف
ودك تريح هناك ؟ واشوف جراحك
النمر وهو اعلم بجروحه اللي تفتحت لكن هو خابر ان رماح ماعنده وقت يضيعه : لا ابد جروحي مابها الا العافيه وانا ادري يا رماح ان وراك دنيا ما خلصتها للحين خلني اريح في واحدٍ من الغيران وروح لشغلك
رماح : والله ان تجي معي ماني اللي يرمي خويه بالخلا اليا من صار حولك عرب فالله يستر عليك اما الحين كمل خوتي لين ييسرها الله والاساس اني متفق مع وضاح الاقيه في وحده من ديار الشرق
النمر : ما دام الوضع كذا اللي تشوفه
رماح : تجوَّد
——
وضاح وهو يدقق في المأسورين قبل لايتركهم لانه ادرى بان اقل غلط بيفضحهم تكلم بصوت خفيض : اسمعو اللي بقوله زين بتتبدل الحراسه بعد شوي خلكم مكانكم ولا تظهرون ان قيادكم مفكوك اليامن ناديت الحرس للغدا بعد شوي وتخلينا عن نظركم هناك (وهو يشر لجهه معينه ) تلقون الخيل مجهز وضحت الخطة ؟!
واحد من الاسرى : وضحت يا بن الاجواد والله ماندري كيف نطلع من جزاك انت واخوك
وضاح : ما فعلناها عشانكم فعلناها بسبة شي في نفسنا وهالحين ذا اخر حكي بيني وبينكم وبعدها كلٍ بطريقه فمثل ماقلت لكم تنبهوا لحركاتكم

وقبل لا يلتف مغادر طاحت عينه على اللي منزوي بعمره على اخر الجموع وراسه منكس وفي نفسه : يا وش السواة معك !

راح من هنا وجو اثنين بداله من هنا
وضاح وهو يتفقد الخيل ان كانت جاهزه 
وبين ماهو يفكر تبادرت لفكره عيون ماعمره شاف لها مثيل تنهد بعدها وقال : توكلنا على الله ماله الا اني اخذه معي ان كان الوضع مثل ما سمعت
رجع لهم وهو يتبادل السوالف مع اللي حارسينهم
وضاح : الله يعين وجهكم منصفق شكلكم من الصبح على رجل
واحد منهم : كنك شايف من يوم جا نزار وجرو مفترنا بالشغل
وضاح : اجل اسمعوا اللي بقوله انا مسوي لي ذاك الغدا اللي مايتفوت
تعالو معي نتغدا ولانا مطولين كلها ربع ساعه مايمدي احد يلاحظ
الثاني : وان انحاشو
وضاح:  وين ينحاشون وهم مربطين
الاول : والله مدري بس الحرص ازين
وضاح : انا من صبح عندهم ورحت وجيت ماصار شي لو بهم حيل ما انأسروا بالاساس
الثاني للأول :والله انه صادق خل ناكل لنا كم لقمه نسد جوعنا ولانا بمتأخرين مايمدي يصير شي ولاحد بملاحظ
وضاح : اعجلوا العيشة بردت
———-