عزتي للي حزونه كايدة ماهي بقده

مرسال

توق وهي على ظهر العيطموس وغيهب معها : لاتنسين يابخوت تسوون اللي قلت لكم وانتي يانوت اسمعي كلام اختك والله الله في بعض انتبهوا لأعماركم
بخوت : تطمني ولا تشيلين علينا هم في امان الله ياعين اختك
والتفتت على الغيهب : غيهب
الغيهب : لبيك يابخوت
بخوت : انتبه على اختك ياعضيدي
غيهب : ابشري
نوت : سلموني على قوت وعمي ولا تنسون ذرب
مشت توق بالعيطموس وهي تقول : ودعتكم الله
————————
نجي عند قوت بعد سير على ظهر السلمى لفترة بدأت تشوف مشارف قبيلة آل رشدا وبدات تفكر وتفكر هي جت وهي عازمة على اللي بتسويه بس كيف بتقابله ؟؟؟
—————————
كان جالس في مجلس خاله بعد ماتطمن على صقر
بندر : وش قلت لي اسم الرجال اللي استضافكم ؟؟؟
ضاوي : جلوي
بندر : وش هو من لحية ؟؟ (يسأله عن كيف الرجال )
ضاوي : لحية غانمة (كفو) وكثير الرماد (كريم) والله ماشفت منه الا كل خير وكلامه كلام رجالٍ يدري وش يقول وملامحه ماهي ملامح ضعوف لو انه سالم مابه كان حلفت انه فارس ماعليه كلام
بندر : وش اللي به ؟
ضاوي بشرود : كسيح (مشلول)
بندر : انا لله وانا له لراجعون من حينه كسيح ؟؟
ضاوي : من اللي فهمته انه ماله الا كم سنه ولا هو كان صحيح مايعله شي بس ما اعتل (تعب ) جسمه الا بعد وفاة مرته حزن عليها حزنٍ شديد وبعدها جته سخونه شديده غيبته عن الدنيا ثلاث ايام ولما استفاق منها وسلم جاء بيوقف ما استطاع ماعد قدر يحرك رجليه
بندر : كل ذا حب لزوجته الله يشفيه ويرحمها
ضاوي : امين
بندر : قلت لي انه بارض ما حوله عرب ؟؟
ضاوي : لا والله ما حوله احد
بندر : اجل له ضنى ؟
ضاوي : ايه ولد يقاله ذرب
بندر : اجل هو اللي يسنع ابوه
ضاوي تردد يقوله عن قوت ولا يخليه على فهمه : ايه على اسمه ذرب جلوي مربي بنت اخوه يتيمه
بندر : الله يكتب اجره الا ياضاوي بغيتك تروح لغويميش تخبره يذبح ثنين من القعدان واربع خرفان لسلامة صقر
ضاوي وهو يقوم : ابشر
—————
جت على بالها فكره ليه ماتروح لمكان مايرعى فيه حلالهم وتاخذ وتعطي مع راعيهم وتوصيه لاعاود لاهله يقول لضاوي بن جلوي يتحراك
وهذا اللي صار
قوت : السلام عليكم
غويميش : وعليكم السلام ياهلا ومرحبا
قوت : المهلي ما يولي
غويميش: حياك الله القهوة
قوت : أبقاك الله
وبين السوالف وهذا وذاك
قوت بدهاء : هذا حلال اي قبيله ياغويميش ؟؟
غويميش : هذا حلال ياطويل العمر الشيخ بندر
قوت : والشيخ بندر من أية قبيلة ؟؟
غويميش : كيف ما وصلك خبره ؟؟ هذا الشيخ بندر شيخ قبيلة آل رشدا الللي تغزي ماتنغزى !
قوت : ال رِشَدا ما غيرهم ؟؟ اللي منهم الفارس ضاوي وصقر
غويميش : وصلت خير وصلت خير هم نفسهم
قوت : اجل يا غويميش لي مطلب عندك
غويميش : عندي انا ؟؟
قوت : عندك ماغيرك
غويميش : انا رويعي حلال وش انا قادر عليه ؟
قوت بغموض : ان شاء الله بتقدر عليه بتقدر
غويميش : ادامني بقدر عليه فأبشر به
قوت : لي رسالة بغيتك توصلها لواحد من ال رشدا
غويميش : رساله ؟؟ لمن ؟؟
قوت : ايه رساله ، وهي لضاوي
غويشميش : ضاااوي !؟
قوت : ايه ضاوي بن سعد ماغيره هاا؟ قدها
غويميش بعد ثواني هز راسه : قدها قدها وش أوصل له ؟
قوت : ................
—————-
ركب فرسه ناوي المراح لغويميش يقوله اللي قال خاله
وهو في الطريق بدا عقله يفكر بالعيون اللي ما قدر يشيلها من ذهنه
وبعد فتره وصل للحلال بدا يبحث عن غويميش بعيونه لين لقاه ماسك العصى ومتكي على ظهر صخره وهو ينقل بعيونه للحلال لا يلهى عنه ويتمتم بشي
قرب منه : السلام عليك ياغويميش
فز : وعليكم السلام ياعمي
وبعد سؤاله عن احوال الحلال والخ ..
ضاوي :عمك الشيخ موصيني اقولك تذبح ثنين من القعدان وأربع من الخرفان لسلامه صقر
غويميش : يبشر
ضاوي وبنيته يروح : اجل ماتشوف شر ( وعطاه ظهره )
غويميش بتردد: يا يا عميي
ضاوي : وش بغيت ؟؟
غويميش : فيه رجال جاني وانا ارعى الحلال وطلب مني أوصل لك رساله
ضاوي بتعجب : رساله ؟ لي انا ؟؟
غويميش : الله الله
ضاوي : ما خبرت اسمه
غويميش : لا بالله
ضاوي : ويش يقول ؟؟
غويميش وهو يتذكر الابيات اللي كان يرددها بتمتمه قبل لايجي ضاوي عشا لاينساها :
ياطيب الذكر يامعرب الجد والخال
هذا انا جيتك طالبٍ تفرج الحال
فرج بعد الله على ايديك بالحال
جيتك جية الطامع بطيّب الفال
ما نصيتك الا انك ملزم بالامثال
وهذا أنا اتحراك جلويٍ بين التلال

قاله اخر بيت وهو يشر له لجهة معينه
هز ضاوي راسه بحيره وهو متجه لفرسه ناوي يقصد الجهة اللي أشار لها غويميش
وفجأة فهم التلميح اللي بين الابيات ابتسم شبح ابتسامه و : ........
————————-
شاركوني رايكم