العود الطري

يوم 2019/12/19

ساعة 8 ليلاً

بنص الچادر والهوسة والناس اللي تسلم دگ تليفوني بجيبي ، طلعت التليفون
رقم غريب
صوتي مبحوح حتى مابيه حيل اجاوب
عفته ما جاوبت
اكيد واحد من جماعتي بالدوام يريد يعزيني

فصل الاتصال، كم دقيقة ورجع دگ
هم ما جاوبت
تقريباً خمس دقايق
ووصلتني رسالة

أسفة جداً اعرف ان انت مشغول وكل شي عليك ومخبوص بس بالي يمك
اعزيك واعزي نفسي البگة براسك
خاتمة احزاننا ان شاء الله
انتبه ع روحك
(م)

ردت روحي بهالمسج ، حسيت مشى الدم بعروگي
مشتاقلها ، اي هواية مشتاق
مو عبالك رسالة وحروف مسفطة
حسيتها مرهم لجروحي
دوا لعلتي

وينچ يا بنية گلبي
تعالي وشوفي حالي

❤️❤️❤️❤️❤️