Ang Mga Tula Ni MISTERCEE

"9 na Taon at sa Darating pa"

9 na ang oras kagabi,

Ako'y di mapakali sa isang tabi,

Tahimik na ang aking katabi,

Kaya naisipan magsulat sa hating-gabi.

9 na taon na ang nakakaraan,

"OO" ay aking binitawan,

Puso'y sumisigaw sa kagalakan,

Pagkat ikaw ang makakasama sa walang hanggan.

9 na taon na ang nakalipas,

Ang oras ay kabilis kumaripas,

Pag ibig ko sayo'y walang kupas,

Kahit walang kasiguruhan ang bukas.

9 na taon ay di perpekto tulad ng iba,

Ugali man nati'y talagang magkaiba,

Ngunit mahal, kailanma'y di mangangamba,

Pagkat sa Diyos tayo sumumpa na wala ng iba.

9 na taon na di puro tamis ang buhay at minsa'y salat,

Ngunit kay bathala ako'y nagpapasalamat,

Pagkat ikaw ang pinili higit sa lahat,

Ang aking makikita sa bawat pagmulat.

9 na taon man ay ibalik ulit sa nakaraan,

Kung ng diyos tayo'y pagbibigyan,

Wag magalala,ikaw lang ulit ang pakakasalan,

Sana mahal, ako ulit ang iyong pipiliin na ligawan at hagkan.

9 na taon na at ang oras ay kaybilis na kumakaripas,

Mga araw man ay kaydaling lumipas,

Pangako tayo parin, PEKSMAN! walang kupas!

Hanggang sa huling hininga "mahal kita"ang huling ibibigkas.