حب المكابر دايم حظه غابر

مغلوب على امري

حط يده على صدره وهو يقول : ياويل حالي وش صابني؟
وقام يشتد الوجع عليه لين وقف من المجلس وخرج برى البيت ركب سيارته الربع وبدا يسوق بلا وجهه وهو يقول : طلع اسمك يام تيس الجازي ياحلات الاسم وحلات راعيته
اما عند الجازي سحبها ابوها للمجلس وصار اللي صار
اما عن شمايل من الخوف والذنب ركضت لغرفتها وهي تفكر : ياخوفي يدرون اني انا اللي فكيته!

نرجع اللي راكب الربع جلس يسوق وهو يفكر بالسبب اللي سبب لراعية التيس هالبكاء كله قطع افكاره رنة الجوال قطب حواجبه بضيق وهو يقراء اسم المتصل تنهد ورد بضيق: الو
جاه الرد بصوت كله دلع : هااي حبيبي
: هلا عبير
عبير : وينك فيه ؟
قال بصبر : ويني فيه يعني ومن متى انسئل وين رحت ووين جيت؟؟
عبير بإندفاع : يعني ماسأل عنك ولا شي زوجتك على عماها؟ لمتى يعني بتستمر بهالمعاملة ؟؟
قال بهدوء : عبير ..
قاطعته بعصبيه : عبير عبير عبير وش سوت عبير غير ان كبدها حامت من العيشه اللي هي عايشتها
قاطعها بإنفلات اعصاب : عبييير وش انا اقول انكتمي لين اجي
عبير بزعل: يوووووه منك
سكر في وجهها قبل تكمل كلامها
غمض عيونه يهدي اعصابه وسند راسه عالديركسون يدري انه ظالمها وظالم نفسه بذي الزواجه بس الله يهديك يا يمه يقال انك تعوضيني ببنت اختك مادريتي انك عقدتيها فوق ماهي معقده
سمع رنه الجوال رفعه بسرعه وهو متوقع انها عبير بس هدأ لما قرأ اسم ابو سراج اخذ نفس ورد على الاتصال
ابو سراج : السلام عليكم والرحمة
رد عليه : وعليكم السلام والرحمة
ابو سراج : وينك يارجال مالقيتك في المجلس
: والله جاني شغل اضطريت اني اغادر بعجلة السموحة يابو سراج
ابو سراج: مسموح ياولدي كان ودي انك تتعشى معنا العشاء
: كثر الله خيرك ماهو غريبة منك وخيرها بغيرها
ابو سراج : ان شاء الله عادك صامل على شراء التيس؟
توه يذكره! : والله ياعم اني باغيه بس ماهو ذي الليله قد ابعدت من الديرة وان شاء الله قريب بيعه والجية الثانيه اخذ لي تيس غيره ولاخروف
ابو سراج : حياك الله حياك الله
: ابقاك الله في امان الله
ابو سراج : في حفظه
وحرك السياره متجه لبيت عمته وهو ضارب بكلام عبير الحايط
اما عند ابو سراج (هلال)قفل من المكالمة ودخل الغرفة وجد ام سراج (زبيدة) جالسة عالسرير ولما انتبهت لدخوله فزت واقفة على طول لاحظ هلال ان عيونها حمراء : علامك يامرة (مرأة ) وش بلا عيونك حمراء ؟ لا يكون باكية على فال النحس جويزي ؟
زبيدة بسرعه : لا لا مابكيت وهي تستاهل ماجاها
هلال : ازين لك انك مابكيتي على قليلة الرجاء بغت تفشلني مع الرجال لو انه ماجاه شغل وطلع قبل ماياخذ التيس جهزي لي العشاء ببدل ثيابي واجيك
زبيدة: ابشر
طلعت من الغرفة لغرفة البنات سيدة : يالله يالله ابوكم يبي العشاء حطوه له في الصاله واستعجلو تراه حده معصب
وطلعت بسرعة وهي قلبها متقطع من منظر الجازي ولا ودها تقرب منها عشان لاتفتح مناحة ومن يفكها حينها من ابو سراج
التفتت كل من رجاوي وخزاري يناظرون بعض بعجب
ثم قالت رجاوي : ياربي هو كيف بقت له نفس للأكل الحين ؟
خزاري : الله اعلم
رجاوي : يالله يارب انك تاخذ حقنا من هالابو يالله يارب جعل بده الكسر
خزاري : عيب يابنت ابوك مايصلح هالكلام له
رجاوي : قاهرني يا خزاري قاهرني
خزاري : يالله نخلص قبل لا يعصب
دخلت عليهم امهم في المطبخ وهي تقول : وش فيكم يابنات ابوكم في الصالة اخلصو ماني ناقصه يكمل عليكم
رجاوي : حاضر حاضر اللحين خلصنا
وشالو  الصحن والسفرة والسلطة وإلخ.. وهم يدعون ان ربي يستر
بدؤا ياكلون وبالأساس خزاري ورجاوي مالهم نفس بس ياكلون عشان يفتكون من شر ولسان ابوهم
ابو سراج : صبو لي لبن
مسكت رجاوي اللبن تبي تصب وعيونها بالارض هي واخوانها مايقدرون يحطون عيونهم بعيون ابوهم تذكرت اخر واول مرة حطت عيونها في عيونه رمى عليها الفنجال واللي فيه وصك بجبهتها قاطعها ابو سراج: وقفي انتي لا تصبين لي يالليل الاسود صب لي ياسراج
سراج : ابشر
صب اللبن واعطاه ابوه واستمع لأشهب وهو يهمس له بشفقة : ياليت ابوي يخف عليهم شوي
ماعلق سراج واكتفى بالابتسام بسخرية وكمل اكل

نرجع لعذوبة وحفلتها
عند عذوبة وهي تعاتب نفسها : اللحين ليه راسك فاضي ؟؟ علميني وش نفعه اذا ماعرف يمين من يسار هي قالت يمين خلاص روح يمين ليييييه تروح يسار ؟؟ لييه؟؟! ياربي والله الموقف موحلو ابد لا واضح ان الرجال منخرش وخاصة يوم شلت الشماغ عن وجهه كان يشوفني بعيون وساع ومنصدمه بس عيونه فخمة بقوه يوووه ولك وجه تتغزلين بعد ودخلت عند اخوها و .....
اما عند اللي للحين وهو ماسك الشماغ بيده ويشوف مكانها بذهول وعدم تصديق وإعجاب : هو اللي شفته حلم ولا علم ياعرب؟
لا وتناديني نويصر ياحظك فيها يانويصر بس هي من ؟؟
هز راسه كأنه ينفض افكاره اعوذ بالله ماهي بمحرم لك طلعها من تفكيرك
دخلت عند اخوها وهو واقف ينتظرها في الغرفة قرب منها وضمها على طول : الف مبروك ياعين اخوك
عذوبة : الله يبارك فيك
ناصر : اعذريني والله ماقدرت استقبلك نجد دقت علي تقول انزلقت وطاحت وتحس بوجع وكلمتني خايفة على الجنين لايكون طاح وماكان بيدي الا اني اروح اتطمن على ولدي لايكون صار له شي
عذوبة : ولا يهمك يانويصر كلش ولا ولد اخوي يجيه شي
باس راسها وهو يقول : الله لايحرمني منك
وطلع كيس كان وراه : وهذي هديتك يالغالية
اخذتها عذوبة وهي طايرة من الفرح : جعلني ما اعدمك قل امين
ناصر بضحكة : امين
وقف وقال: يالله ياعذوبة اترخص وبهمس : تصدقين من جاء؟
عذوبة بفضول : من؟؟
ناصر: عيال عمي
عذوبة بصدمة: عيال عمي ؟! ياجعله خير
ناصر : لهم فترة يتواصلون مع ابوي وعزمهم للحفل وجو
عذوبة : غريبة جدي سمح لهم
ناصر : ايه هذا اللي محيرني بس يمكن مايدري بجيتهم
عذوبه بتفهم : يمكن
طلع ناصر من الغرفة
وتبعته عذوبة وهي تفكر بأهل ابوها تدري بأبوها وده بأهله لكن جدها الله يهديه قلبه قاسي حتى بعد موت امهم مايبي شوفتنا لا انا ولا اخواني
دخلت القاعة واتجهت لورد اللي على طول وقفت لما شافتها
وقالت : جت جت دلوعتنا
ضحكت عذوبة
ورد : ليه رحتي بسرعه وتركتيني مع الغثيثة لحالي بغيت اخنقها من كثر ما اقرفتني
عذوبة بشماته: حلالك
انتهى الحفل واخذها ابوها على البهبهاني انتبهت ان الطريق ماهو طريق بيتهم
عذوبة : يبه ما كأن هذا الطريق ماهو بطريق بيتنا؟
خالد : ايه يا ابوك ماهو طريقه بنروح لنا مشيوير صغير قبل
عذوبة : بدينا بطبع الغموض
خالد : ههههه
وصلو لمبنى مسور التفتت لأبوها بإستغراب
جاها الجواب : هذي مزرعة يالعذوب انزلي تشوفينها

__________________

اعجبتكم الروايه؟