نساء وأمهات المؤمنين " معا إلي الله "

1_ وليالٍ عشر 🤍

العشر الاوائل من ذي الحجة في نقاط..

١- من مغرب السبت هيبدأوا بإذن الله أول ليلة

٢- هم ليالي مش أيام، يعني التركيز ع الليل أكثر دول الي ربنا أقسم بيهم "وليال عشر" 🤍

٣- أفضل أيام الدنيا ، أفضل عمل ممكن تعمله ف حياتك هيبقي ف الايام دي

٤- خاتمة الليالي دي يوم عرفة وهو يوم الدعاء ، كل دعوة نفسك فيها جهزها من دلوقتي ، وادعي ربنا بأسماءه الحسني زي مثلا "يا رزاق ارزقني أو اللهم يا جبار اجبرني" وهكذا عشان تحقق العبادة دي

٥- الايام دي ايام ذكر، يعني لسانك ما يقفش آناء الليل وأطراف النهار، استغل لبس الكمامة/النقاب إن ماحدش شايفك وطول الوقت ذكر
لو الفم باين وحد بيتكلم معاك ممكن تقول لا إله إلا الله، دي مش بتحتاج تحريك شفايف وممكن تقولها كـ راحة بين الأذكار

٦- الصلوات الخمس ف وقتها + اذكار الصلاة "الي هم التسبيح والحمد والتكبير ٣٣ مرة + تختم المئة بـ لا إله إلا الله وحده لا شريك له له الملك وله الحمد وهو على كل شيء قدير" + السنن الرواتب الي هو اتنين قبل الفجر، أربعة قبل الظهر واتنين بعده واتنين بعد المغرب واتنين بعد العشاء

٧- صلاة الضحي ودي وقتها من بعد الشروق لحد قبل الظهر بربع ساعة بتبقي ركعتين او ٤ او ٦ او ٨

٨- من أول ما تصحي لحد ما تنام تنشغل بنفسك تجاهد عشان ما تعملش ذنب، كل ساعة تعدي منغير ذنب نهائي تبقي إنجاز

٩- السوشيال تتقفل لو مش بتعمل حاجة ضرورية عليها

١٠- أفضل ذكر ليوم عرفة هو "لا إله إلا الله وحده لا شريك له له الملك وله الحمد وهو على كل شيء قدير" دة تتنفسه كدة

١١- حاول تصوم الأيام دي ، ما وردش عن النبي صلى الله عليه وسلم إنه صامهم كلهم لكن يستحب من ضمن الأعمال الصالحة

١٢- الايام دي ربنا بيحب العمل فيها، ف ما تكسلش عنه ، شوف كام حاجة بتحبها ربنا ادهالك وانت لسة بتقطع ف عبادات ف ايام ربنا بيحبها!

١٣- جهز دعواتك ليوم عرفة وحاول ما تنامش فيه كتير وتغتنمه

١٤- التكبير بيبدأ من أول ليلة ف العشر، الصحابة كانوا بيمشوا ف الاسواق يكبروا ، ف أحيوا السنة دي

١٥- اظبطوا نومكم وبلاش تتعرضوا لأي حاجة تشغلكم

١٦- اسمع شرح اسم من أسماء الله الحسنى كل يوم عشان تدعوه بها ، الشيخ محمد الغليظ له سلسلة حلقاتها نفس عدد الايام دي خدلك كل يوم اسم وعيش معاه🤍
https://youtube.com/playlist?list=PLgqtKVxUxe2o2R94qDb1jEaPG9u0yygyf

١٧- توصيات الشيخ ليوم عرفة
https://youtu.be/vIlSgmIc5TM

١٨- حاول تعمل ختمة اليوم دة، كل يوم ٣ أجزاء= ختمة ع العيد

١٩- كل حاجة تعملها تحطلها نية لكل حاجة، ممكن تبحث ع جوجل من موقع موثوق "نوايا فعل كذا" هتلاقي العشرات

٢٠- لازم يبقي ليك خلوة مع الله ما تمسكش فيها الفون ما تبقاش مع اي حد تذكر ربنا وتدعيه ، حتي ولو ربع ساعة ف اليوم

٢١- شجع أهل بيتك معاك، وكل الي تعرفهم،  وعرفهم فضل الايام دي وخد أجرهم

٢٢- انتبه ع وقتك هم أقل من ١٠ مش حمل غفلة وضياع للوقت

٢٣- عادي لو ما استعدتش ليها، عادي لو إنت كنت خاربها قبل كدة، هي بتيجي عشان نحاول نصلح فيها الي فات🤍

٢٤- ماتسيبش فرصة إنك تستشعر الدار الاخرة وتدعي ربنا بالجنة

٢٥- لو ماعرفتش تبكي اعمل نفسك بتبكي حاول تخشع

٢٦- دعاء يوم عرفة يغير حياتك بس ادعيه بصدق ، لعلها تُستجاب في عرفة🤍

٢٧- احمد ربنا ع إنه رزقك فرصة كمان للرجوع🤍

٢٩- استغل ساعة الاستجابة انك تدعي إنك تتوفق للعمل الصالح فيها

٣٠- وأخيرا ، أي عمل صالح ف اي وقت م السنة حاجة، وف الايام دي حاجة تانية خالص .. ربنا بيحب العمل الصالح ف الايام دي ف وري ربنا منك خير.

.
.
.
.
.
.
.

تقبل الله منا ومنكم صالح الأعمال 🤍

نونا السيد ✍