نساء وأمهات المؤمنين " معا إلي الله "

5_ يوم عرفة 🤍

يوم عرفة إيه اللى نصومه !!

من سنة بالظبط، السوبر ماركت بتاعى حصل فيه ماس كهربى، وولعت اكتر من تلت أربع البضاعة

كان قبل يوم عرفة بيوم، متخيل داخل علينا العيد وشغلى وحالى ومحتالى بح .. يعنى لا فيه عيديه ولا عيد

مفيش غير ديون .. هقضى العيد عليا بديون، وكنت لسه عريس جديد مبقاليش شهرين

البضاعة اللى ولعت يجى ب ١٥ ألف جنيه، ابيع مراتى اللى لسه عروسه دهبها ولا استلف !!

أروح للناس عشان استلف كله يقولى

- دى دخلت عيد يا طلعت معلش اعذرنى اللى اقدر اعمله هعمله

وكله على هذا الحال، لميت من معارفى وصحابى ٨٠٠ج، ودول بالنسبه للبضاعه نقطه فى بحر سعتك

جه جارى عدى عليا وانا ماشى

- كل سنه وانت طيب يا استاذ طلعت صيام بكرة متنساش

'' انا بينى وبين نفسى ''

= ياعم صيام ايه انا ناقص وجع قلب

المهم زوجتى حبيت تواسيني فطلبت منى نخرج ونتمشى ووو

حصل فعلا، والخروجة مكنتش حلوة عشان اللي حصلى وحالى اللى وقف !

'' وإحنا مروحين ''

- مش هتجيب سحور !
= سحور !!
- بكرة عرفه
= إحنا فى ايه ولا فى ايه
- ربنا قدر كدة وأكيد مش هينساك بس الصيام لابد منه

'' المهم أصرت انى أصوم، وصومنا جينا ساعه الإفطار ''

- أدعى
= ادعى
- آه
= بأيه
- باللى نفسك فيه
= نفسى فى ١٥ ألف جنيه، هدعى وينزلوا من السما
- اللى خلق السما قادر على كل شئ

'' مدعيتش طبعا وكبرت دماغى .. دعوة إيه اللى هتتستجاب بالطريقه دي ''

'' بعدها بساعه رن واحد زميلى ''

- طلعت أنزلى على القهوه عاوزك

'' نزلت على القهوة قابلته ''

- بقولك يا طلعت مش هلاقى انسب منك فى كدة
= خير
- واحد صاحبى قبض جميعه وعاوز مشروع يشغله قولت أهو فكرة لو تكلمه ويستسمر فلوسه معاك

فرحت جدا كلم الراجل ونزلنا على القهوه

= انا معايا ٣٠ ألف جنيه، ومحتاج استثمرهم
- انا السوبر ماركت بتاعى محتاج ١٥ ألف أجيب بيهم بضاعه

ايه رأيك تحط نص الفلوس فى البضاعه والنص التانى فى تجديد المحل وليك ٥٠٪ مكسب من بعد ما تلم ال ٣٠ ألف جنيه تانى

= ودول تصمنهمولى فى اد ايه
- ٣ شهور بلظبط

وعلى هذا الحال اتفقنا وجددت الماركت وكنت يومها ميت من الفرحه

قبل الحادثه بتاعه السوبر ماركت بتاعى بأسبوع أمى جالها كانسر وعملنا تحاليل نتيجتها كانت يوم عرفه

طلعت النتيجه بالسلب، يعنى أمى مطلعش مريضه
عاوز اقولكم ان أمى لما عرفت كدة عيطت اليوم كامل من كرم ربنا

خلاص السوبر ماركت اشتعل وامى طلعت سليمه نختم اليوم بقى

مراتى رنت عليا

تعالى عوزاك
روحت البيت
مالك
انا طلعت حامل فى أول ابن لينا

'' وهى يتنطط من الفرحه فجأه قالت ''

شوفت الدعاء والصوم ليوم عرفه؟!
الدنيا كله اسودت فى وشى وجه فى بالى انى مدعيتش وإن كل ده حصل وكان ربنا بيقولى

رغم إنك مدعيتش بس وقفت جنبك وفرحتك بدل المرة اتنين وتلاتة ..

اتعلمت يومها الادب درس من المولى عمرى ما هنساة هو جنبنا وإحنا بنعبدة، وجنبنا حتى وإحنا بعاد عنه

ربنا طيب وقلبنا متعلق بيه وعمرة ما يسيبنا كدة لا حول لنا ولا قوة .. شوف رغم انى استهزءت بالدعاء

ومكنش فى نيتى الصيام .. وحصل كل دة !

بعدها عدي العيد أهو وكنت بصلى فرض وعشرة لأ برضوا رغم كل اللى ربنه وقف جنبى فيه

فلما ال ٣٠ ألف جنيه لما جيت ترجعهم لصاحبهم طلعت الحكايه مختلفه تماما

اتصلت بيه عشان اديله فلوسه بعدها ب٣ شهور

- بصراحه الفلوس دى مش بتاعه صاحبى دة ولا حاجه الفلوس دى بتاعه واحد مطلعها لله عشان مراته خفيت من الكانسر !

= يعنى محدش عاوز منى فلوس ؟!
لأ دى بتاعتك انت ..

يومها روحت ودخلت اوضتى وفضلت ابكى بكاء الأطفال بانين وكأن ربنا بيرد عليا

ها عاوز مفاجآت تانى .. مش ناوى ترجعلى بقى

كل لما اتخيل كرم المولى فى حياتى رغم انى مش قريب منه ابكى بدل الدموع دم، ابكى واعيط على حسرة الوقت اللى فات فى الهفئ

عرفة يعنى ايه دعاء يوم عرفه، ويعنى إيه صوم يوم عرفه

انا عرفت يعنى ايه كرم المولى لمجرد إنه عالم بيك

" ربى يا الله تكفى انت نعمتى فى الدنيا احبك يا مولاى "

- منقول

.
.
.
.
.
.
.
.

نونا السيد 🤍