ချစ်ခြင်းမှတစ်ပါး(ခ်စ္ျခင္းမွတစ္ပါး)

❦︎အပိုင်း-၁၀❦︎(နှုတ်ခမ်းတွေနွေးနေလား)❦︎အပိုင္း-၁၀❦︎(ႏႈတ္ခမ္းေတြေႏြးေနလား)

#Unicode
ဝိုင်နဲ့ဒေါ်လေး ပြောခဲ့သောစကားများကို ခံစားချက်အမျိုးမျိုးဖြင့် ရိုင်းအား ပြန်လည်ပြောပြမိပြီးနောက်မှာ... ရိုင်းဆီကနေ "သူ့ရဲ့တစ်ဦးတည်းသောအရင်းနှီးဆုံးသူစိမ်းက 'ဝိုင်'" ပါဆိုတဲ့ ထိရှကြည်နူးဖွယ်စကားနှစ်ခွန်းကို ဆိုလာခဲ့သလို... နွေးခနဲဖြစ်သွားတဲ့ဝိုင့်နှုတ်ခမ်းတစ်စုံနဲ့အတူ ဝိုင့်နှလုံးသားလေးပါ အရည်ပျော်ကျသွားတော့မတတ်ခံစားလိုက်ရသည်... နှုတ်ခမ်းနှစ်စုံတို့စက္ကန့်ပိုင်းလေးထိကပ်သွားတဲ့ကာလလေးက ဝိုင့်အတွက်တော့ အချိန်တွေအကြာကြီးရပ်တန့်သွားသကဲ့သို့... 

ကျောက်ရုပ်သဖွယ်ငြိမ်သက်ရင်း ရိုင်းကို တအံ့တသြငေးကြည့်နေမိပေမယ့်  နှုတ်ခမ်းတို့ပြန်ကွာသွားပြီးနောက် ဝိုင့်မျက်နှာကို ပြီတီတီကြည့်၍ ပြောချလိုက်သောစကားက

"ငါ့နှုတ်ခမ်းတွေ နွေးနေလား"...

ရုတ်တရက်ဆိုတော့ ဝိုင် ဘာပြန်ဖြေရမှန်းမသိပဲ သူ့ကိုသာမော့ငေးကြည့်နေတော့ ရိုင်းက သူ့နှုတ်ခမ်းသူ လက်နဲ့စမ်းပြီး

" နင့်နှုတ်ခမ်းတွေထက် ငါ့နှုတ်ခမ်းတွေက တော်တော်လေးပူနေတာဆိုတော့ ငါပြန်ဖျားနေပြီထင်တယ်"

အဲ့တော့မှ ဝိုင့်လည်း သူ့ကိုမယုံနိုင်သလိုကြည့်၍ တစ်ခုခုမေးဖို့ကြိုးစားပေမယ့် ထွက်လာသောစကားများက

"နင်... နင်... နင်....."

"ငါဘာဖြစ်လို့လဲ?... ခုနက အဖျားတိုင်းကြည့်တာလေ... ငါဟိုတစ်နေ့ကpostတစ်ခုမှာ နှုတ်ခမ်းချင်းထိပြီးအပူချိန်တိုင်းတဲ့ထူးထူးဆန်းဆန်းနည်းလမ်းကိုတွေ့ထားတာ... အခုစမ်းသပ်ကြည့်တော့မဆိုးပါဘူး... အဆင်ပြေသားပဲ..."

ဝိုင် ဒေါသထွက်လွန်းလို့စကားတွေတောင်ထစ်ကုန်၏.. ဝိုင့်ရဲ့အနှစ်နှစ် အလလထိန်းသိမ်းခဲ့ရတဲ့ first kissလေးကို ဒင်းက... ဒင်းက အဖျားတိုင်းကြည့်တာတဲ့... ဘယ်လောက်တောင် ကျက်သရေတုံးသလဲ... ဘယ်လောက်တောင် မခံချင်စရာကောင်းလိုက်သလဲ... တစ်ယောက်တည်း ကိုယ့်အတွေးနဲ့ကိုယ် ကြည်နူးခဲ့မိသမျှ ဒင်းက အဖျားတိုင်းသွားတာပါတဲ့... အခြေအမြစ်မရှိတဲ့ပေါက်ကရစကား... ဝိုင် သူ့ကိုပဲထသတ်ရမလား... တစ်ခုခုကိုမျှော်လင့်နေခဲ့မိတဲ့ ကိုယ့်ကိုယ်ကိုပဲရှက်ရမလားမသိတော့၍ ကိုယ်ချင်းထပ်တော့ဖြစ်နေတဲ့ရိုင်းကိုတွန်းကာ ထိုင်နေရာမှချက်ချင်းထရပ်လိုက်သည်...