يوميات مرام و سعيد

الحلقة ١١

الحلقة ١١

كانت (مرام )تشاهد الحلقة الأخيرة من مسلسلها التركي(حب أعمى)، تبكى بحرقة على وفاة البطل حين رن هاتفها..نظرت إلى شاشته فوجدت رقم صديقتها (أمل) ،أمسكت منديلا ومسحت به دموعها تجيب هاتفها بصوت متهدج:
-ألو..

قالت(أمل) بقلق:
-(مرام)انتِ بتعيطى؟مالك ياقلبى؟

شهقت (مرام)قائلة:
-(كمال) مات يا(أمل)..ماااات.

قالت(أمل)فى جزع:
-(كمال) مين يا(مرام)؟

قالت(مرام):
-(كمال) يا(أمل) ، بطل المسلسل.

زفرت (أمل)بإرتياح ثم قالت بغيظ:
- (كمال) إيه دلوقتى؟وحب أعمى إيه؟خضتينى يا(مرام) ، وأنا اللى قلت إنك قريتى الخبر زيي..أو حد نعرفه مات من المصيبة دى؟

عقدت(مرام)حاجبيها قائلة:
-خبر إيه ومصيبة إيه بس ؟

قالت(أمل):
-النيلة الكورونا.

قالت (مرام) بحيرة:
-مالها المكرونة..إتحرقت ؟؟عادى يا(أمل)هي أول مرة يعنى؟ اعملى ياستى غيرها..مش قضية ..أكيد عادل لسة مجاش.

قالت(أمل)بغيظ:
-مكرونة إيه بس؟ركزى يا(مرام)واقفلى التلفزيون اللى آكل عقلك ده..أنا بتكلم عن فيروس الكورونا..انتى مش عايشة فى الدنيا دى ولا إيه؟

أغلقت (مرام)التلفاز قائلة:
-احمم..لأ عايشة طبعا..وسمعت عنه وعن اللى عمله فى الصين ،ربنا معاهم بقى،اللى مطمنى ان وزارة الصحة قالت ان مصر خالية من المرض ده وان مفيش حالات فيها.

قالت (أمل)بمرارة:
-بقى فيه ياأختى ..بقى فيه.

انتفضت (مرام)واقفة تقول بجزع:
-يعنى ايه..مصر بقى فيها كورونا يا(أمل)؟

قالت(أمل):
-أيوة..والدنيا مقلوبة على النت..إدخلى وشوفى.

لتغلق (مرام)الهاتف بسرعة..وتفتح تطبيق (الفيس بوك)..تتسع عيونها بصدمة.

*****************

كان (سعيد)يعانى ألما فى رأسه وحلقه يشعر بأنه على وشك أن يصاب بنزلة برد..يحتاج فقط للدلوف إلى المنزل ليبدل ملابسه ويحصل على قسط جيد من النوم،ما إن دلف من باب المنزل حتى فوجئ برذاذ -يحمل رائحة الديتول التى يمقتها-يصيبه فى وجهه وملابسه وقبل أن يفيق من صدمته، تعوذ بالله من الشيطان الرجيم..وهو يرى كائن يقف أمامه يغطيه أكياس البلاستيك بأكمله،كاد أن يتراجع للخلف هلعاًحين سمع صوت زوجته يأتى من هذا الكائن قائلة:
-حمد الله ع السلامة ياسعيد.

قال فى دهشة:
-مرام؟!!

هز هذا الكائن رأسه..ليقترب منه قائلا:
-انتِ جوة؟!

قالت:
-آه ياسعيد..مالك بس؟

قال(سعيد) فى حنق:
-عاملة فى نفسك كدة ليه يامرام؟