قدرنا مش صدفة

الحلقة الثالثة

لم يكن الماضى بدونك سهلا ،فبدونك اصبحت الحياة كابوسا لا ينتهى ،وكم اتمنى ان ينتهى هذا الكابوس عاجلا وليس اجلا،فقد اصبحت امنيتى فى كل يوم هى ان يجمعنا القدر مرة اخرى.
☆☆☆☆☆☆☆☆
فى شركة السامى للمعمار.....
نور:اهلا ياشادى تشرب ايه؟
شادى:ولا حاجة انا جاى اخطف من وقتك شوية وامشى على طول دا اذا مكنش عندك مانع.
نور:لا طبعا تشرف فى اى وقت اتفضل.
شادى:اولا مبروك على مجلس الإدارة.
نور:انت كمان عرفت ؟
شادى:الشركة كلها عرفت على العموم مبروك محدش يستحقها قدك  .
نور:الله يبارك فيك ميرسى على المجاملة اللطيفة دى .
شادى:دى مش مجاملة انتى بجد مهندسة شاطرة جدا ومديرة على كفاءة عالية اوى .
نور:متشكرة على كلامك وتشجيعك دا .
شادى:انا بقى لو مفيش مانع عايز اعزمك على الغدا بمناسبة المنصب الجديد .
نور:معلش ياشادى النهاردة مش هينفع خالص نتغدى سوا عندى شغل كتير وعندى معاد مع صاحبتى فمش هينفع معلش .
شادى:طب عشا واعتبريه عشاء عمل ؟
نور:انت عارف انا مش بسهر برا البيت .
شادى:خلاص يبقى نتغدى بكرا سوى ومش هقبل اى اعذار المرة دى .
نور:اوكيه مفيش مانع.
شادى:اسيبك بقى تكملى شغلك واستئذن انا علشان معطلكيش اكتر من كدا .
☆☆☆☆☆☆☆☆
هل سبق لك وسمعت يوما ذلك المثل الشعبى القديم "يخلق من الشبه اربعين " مؤكد سمعته يوما ما ولكن هل سبق لك ورايت ذلك فى الواقع؟..........
☆☆☆☆☆☆☆☆☆☆
امام مستشفى الدمنهورى .....
معتز:انتى كويسة يا أنسة؟
لترفع سارة رأسها وتنظر له لينصدم معتز عندما راى وجهها واصبح وجهه شاحبا كالذى رأى شبحا،ليذهب فى بحر من التساؤلات والحيرة كيف ومتى وماذا واين ولماذا ؟
لم ينتبه لصوت تلك الواقعة امامه وهى تحدثه لم ينتبه لشئ فقد ظل شاردا.
سارة:مش تاخد بالك يعنى لو مكنش ربنا ستر دلوقتى كان زمانى فى خبر كان .
واثناء ذلك انهت علا محادثتها فى الهاتف لتلتفت خلفها وتجد سارة واقعة امام سيارة لتتحرك نحوها مسرعة دافعة معتز بعيدا لينتبه معتز لما حوله .
علا: سارة!! حصلك ايه انتى كويسة طمنينى عليك؟
سارة:انا كويسة متقلقيش انا وقعت من الخضة بس .
معتز:انا اسف جدا على اللى حصل ومستعد لاى تعويض .
سارة:محصلش حاجة بس ياريت بلاش تجرى بسرعة فى ناس ماشية على الارض انت مش ماشى فى الدنيا لوحدك.
علا:الحمدالله انك كويسة يلا بينا ندخل احنا اتاخرنا اوى .
وتحركت سارة من امام معتز وظل هو على حالة جموده وشروده.
☆☆☆☆☆☆☆☆
فى قصر مروان النجار....
مروان:الاكل حلو اوى ياحنون تسلم ايدك.
حنان:بالهنا والشفا ياحبيبى كل واتغذى دا انت ياحبيبى بتتعب اوى .
مروان:اكل العيش بقى ياحنون .
حنان:لا مش اكل العيش خالص دى دماغك اللى مش راضى تلينها لو على اكل العيش انت عندك شركة تديرها وهتبقى افضل ماهى عليه وتبقى فى امان واطمن عليك .
مروان:طب ماهى ملك بتفهم احسن منى فى المجال دا ومع ذلك هى مش بتشتغل معاكى .
حنان:انا بصراحة تعبت منكم انتوا الاتنين انتوا غاوين تتعبونى معاكم انا عايزاكم تستلموا الادارة وارتاح .
مروان:محدش يقدر يدير (ام اتش) للادوية غيرك انتى وبس .
حنان:طب وانتوا ليه لا؟
مروان:ببساطة علشان احنا بنحب شغلنا ،صحيح ملك فين الايام دى ؟
حنان:فى فرنسا بتحضر مؤتمر هناك وبعدين هتيجى تكمل اختراعها هنا فى مصر .
مروان:انا معرفش ايه اختراعها بس انا فخور بيها اوى .
حنان:ربنا يوفقكم يارب وينجيكم.
☆☆☆☆☆☆☆
عند ليلى ....
ليلى:ازاى يعنى تقلل المادة الفعالة انا مش موافقة على الكلام دا ولو محطتش النسبة المطلوبة انا هبلغ عنك .
الصيدلى :بس يادكتور كدا....
ليلى:مبسش ازاى تقلل المادة الفعالة دا اسمه غش وانا لايمكن اسمح بكدا ابدا .
الصيدلى:تحت امرك يافندم بس اى عجز انا مش مسئول عنه .
ليلى:انا مش بتهدد انا مستعدة اتحمل المسئولية بالكامل .
الصيدلى:تمام يادكتور تحت امرك .
ليلى :اتفضل كمل شغلك.
ذهبت ليلى لمكتبها لتجد صديقتها تتصل بها .
ليلى :صبا اخبارك عاملة ايه ؟
صبا:امنيحة الحمدالله وانتى اشلونك شو احوالك؟
ليلى:بخير الحمدالله فينك كدا ؟
صبا :بالعيادة وانتى وينك؟
ليلى:انا فى الشركة .
صبا :فينا نتقابل بدى احكى معك ؟
ليلى:انا على العموم قدامى ربع ساعة واخلص وانتى ؟
صبا:انا ما عندى شى وراح اتقابل مع رفقتى ع الساعة تلاتة فينى قابلك بعد شى نص ساعة شو رايك ؟
ليلى:موافقة ابعتى لى اللوكيشن وانا اجيلك على هناك .
صبا:اتفقنا راح ابعتلك اللوكيشن بمسدج.
☆☆☆☆☆☆☆☆
فى مستشفى الدمنهورى ....
تحديدا امام المشفى وقف معتز يتتطلع على سارة حتى اختفت عن نظره ولكنه لم يتحرك فقد ذهب فى عالم اخر من الزكريات ،هل من الممكن ان تكون هى ؟ولكن كيف فهى رحلت الى الابد ؟ولكن هلى يعقل ان تكون تشبهها فقط،ولكن كيف يمكن ان تكون بنفس الملامح يا الهى الصوت نفسه،والوجه نفسه ،تلك الشفاه وذلك الانف وحتى بحر العسل فى عينيها يحيطه من الخارج غابة كثيفة من الرموش ،انها تمتلك حتى الاسم ذاته (سارة)،ياألله هل اتوهم هل ارها فى كل من تقابله عينى ،ولكن انا لم ارى صورتها بها فقط ،انا لا اراها فى كل من اقابل فقط تلك الفتاه ،ما اصعبها من لعبة يلعبها معى القدر ،ليستفق على صوت مساعده .
على:معتز باشا الناس مستنينك جوا .
معتز:تماما يلا بينا .
دخل معتز المشفى ليفتتح جزء جديد منها ويشرف على الباقى .
اخذ معتز يتجول بين طرقات المشفى مع مديرها يشرح لمعتز كل ما يحدث بالمشفى ولكن معتز مشتت فهو اخذ لتوه صعقة لا يتحملها اى عقل بشرى .
لينتبه على صوت صراخ وجدال كبير .
☆☆☆☆☆☆☆
فى شركة السامى للمعمار......
نور :هدى تعالى لمكتبى عايزاكى .
هدى:حاضر يافندم.
دخلت هدى المكتب بكل هدوء قائلة:اوامرك يافندم .
نور:الورق دا اتمضى تقدرى تاخديه .
هدى:تمام .
نور:سامى بيه فى مكتبه ؟
هدى:ايوة يافندم .
نور :طيب عملتى ايه فى ترتيبات الحفلة ؟
هدى:اتصلت بالاوتيل وهما شغلين فى الترتيبات.
نور:كويس اوى ،انا هقوم اروح لسامى بيه فى مكتبه.
توجهت نور لمكتب والدها ودخلت بعد ان اذن لها بالدخول .
نور:فى موضوع مهم مينفعش يتاجل ولازم ناخد قرار .
سامى:وانا معاكى اتفضلى موضوع ايه انا سامعك .
نور:اوتيل فرنسا هنبعت مين ؟
سامى:اولا انتى كدا كدا هتسافرى قبل اى حد .
نور:انا اسافر لوحدى من غيرك ؟
سامى:اه هتسافرى لوحدك انتى كبرتى ومباقتيش صغيرة ثانيا انتى دلوقتى رئيس مجلس الادارة يعنى تاخدى قرارات وتعرضيها عليا وانا اقول رائى واديكى موافقتى .
نور:انت مش سهل ،شيلتنى كل حاجة وفضيت انت دماغك .
سامى:انا شغلت دماغى ياما زمان والدور عليكى بقى تكملى المشوار وانا واثق انك قدها.
نور:طب اسمع اقتراحى وقولى رائيك .
سامى:كلى أذان صاغية .
نور:مش احنا عندنا فريق على اعلى مستوى كفاءة بيدرب المهندسين الجداد؟
سامى:مظبوط .
نور:وعندنا برضو دفعة جديدة من نخبة المهندسين تحت التدريب مش كدا ؟
سامى:فعلا .
نور:احنا نبعت الفريق دا مع المهندسين اللى تحت التدريب منها نستفيد من كفاءة الفريق بتاعنا وكمان يبقى تدريب عملى للمهندسين الجداد ودا هيديهم خبرة اكبر ويوفر علينا وقت وفى نفس الوقت منعطلش اى شغل موجود هنا فى مصر والوطن العربى .
بعد ان انهت نور كلامها وقف سامى من على مقعده مقدما لها التحية .
سامى :انتى عبقرية ايه الذكاء دا ؟
نور:يعنى موافق ؟
سامى:طبعا انا لو لفيت الكوكب كله مش هلاقى حل اذكى من دا ،روحى جهزى وربنا معاكى .
نور:طب طالما كدا استئذن بقى اقوم اكمل شغلى ،واه صحيح انا مش هقدر اتغدى معاك النهاردة فأنت زى الشاطر هتروح تتغدى وتاخد الدواى وعلى فكرة انا هعرف طنشت ولا لا.
سامى:حاضر يانور هانم طلباتك اوامر .
☆☆☆☆☆☆☆
فى احد المراكز التجارية......
التقت صبا مع ليلى وجلستا تتحدثان معا.
ليلى:وحشتينى ووحشتنى قعدتك .
صبا:وانا كمان اشتقت لك شو اخبارك وشو عم بتسوى هالايام ؟
ليلى:مفيش حاجة مهمة اوى العادى وانتى ؟
صبا:عم حضر بحث جديد .
ليلى:بجد دا خبر حلو اوى ربنا يوفقك ،لو احتاجتى اى حاجة وانا اقدر اساعدك فيها قولى لى على طول .
صبا:ايه ماهاد اللى عم اعملوا بس بدى اعرف بالاول امتى فرحك ؟
ليلى:هانت قرب اول الشقة تخلص هنحدد الفرح على طول .
صبا:ربى يسعدك انتى وهو .
ليلى:ويسعدك وافرح بيكى يارب، قولى لى بقى محتاجانى فى ايه ؟
صبا:بصى هدول اسماء مجموعة ادوية بدى منك تقولى لى شنو المادة الفعالة فيهم واذا ليهم بدايل وشو بيصير اذا صار اى غلط بالجرعة المحددة .
ليلى:بس كدا عنيا انتى تؤمرى أمر.
☆☆☆☆☆☆☆
فى مستشفى الدمنهورى.....
جذب انتباه معتز صوت جلبة فى المشفى ليتبع الصوت ولكن عندما وقف وجد احد المرضى كبار السن فى حالة من الهياج وقد حاول طاقم الاطباء والممرضين تهدئته والسيطرة عليه ولكن دون جدوى لينطق احد الاطباء :نادوا ل سارة بسرعة.
لتنتبه كل حواسه عندما سمع اسمها ،وبعد بضع ثوانى حضرت سارة .
احد الاطباء:سارة حاولى تعملى حاجة محدش بيسطر فى المواقف دى غيرك .
سارة:لو سمحت يادكتور انا عايزاكم تبعدوا خالص علشان اعرف احتوى الموقف .
وبالفعل ابتعد الجميع عن المريض وبدات سارة تتقرب منه وتتطمئنه بطريقتها الفريدة ليبدا المريض يستجيب لها ويهدأ بالتدريج ،كل هذا تحت عيون المعتز المثبتة عليها فقط ،لياتى مساعده ويحاول محادثته.
على:معتز باشا ....
ليشير له معتز بكف يده ليصمت على ويتابع معتز الموقف بتركيز ،اقتربت سارة من المريض وقد استسلم لها كليا والعجيب انه تناول دوائه من يدها دون مقاومة .
ومن ثم انصرفت تتابع باقى عملها.
معتز لمدير المشفى:اسمها ايه البنت دى وبتشتغل ايه؟
مدير المشفى:اسمها سارة ياباشا وهى اشطر واحدة فى فريق التمريض فى المستشفى .
معتز:هى شاطرة فعلا ،انا عايز اتكلم معاها.
مدير المشفى :طبعا يافندم اتفضل .
☆☆☆☆☆☆☆
فى قصر مروان النجار.....
حنان تتحدث مع ابنتها على الهاتف .
حنان:انتى عاملة ايه ؟
ملك:انا كويسة ياماما متقلقيش انتى عاملة ايه؟
حنان:انا كويسة ولما اطمنت عليكى بقيت كويسة جدا .
مروان :بتكلمى مين ياحنون ؟
حنان:دى ملك يامارو.
مروان:هاتى عايز اكلمها .
اخذ مروان الهاتف من حنان ..قائلا:ملوكة اللى مشيت من غير ما تودعنى حتى .
ملك: غصب عنى مكنش عندى وقت حقك عليا .
مروان:ولا يهمك اهم حاجة انك كويسة وبخير ومبسوطة .
ملك:متحرمش منك يامارو.
مروان:خلصى بقى وارجعى على طول علشان انا بتوحشنى شقاوتك .
ملك:عولم وينفذ ياباشا انت تؤمر يامارو ياقمر انت .
☆☆☆☆☆☆
فى احد المراكز التجارية....
ليلى:ها فى حاجة تانية تحبى تعرفيها .
صبا:لا بيكفى تعبتك معايا.
ليلى: متقوليش كدا اللى انتى عايزاه قولى عليه وملكيش دعوة .
صبا:ربى مايحرمنى منك ابدا .
وهنا وصلت رسالة لهاتف ليلى لتمسك هاتفها وتكتشف انها من فادى .
_حياتى انتى فين ؟
لترد ليلى:مع صبا فى المول .
ليصلها رد فادى:كويس خليكى عندك انا جاى لك .
ليلى:تمام مستنياك.
والتفت لصبا :فادى هيعدى ياخدنى نروح نشترى شوية حاجات ونروح .
صبا:مافى مشكلة كان بدى اعرفك على رفيقتى بس مافى مشكلة بتتعوض شى مرة غير .
ليلى:اكيد لو مكتوب لنا نتقابل هنتقابل .
صبا:مؤكد حبيبتى ،وهلا فادى وصل روحى معه لا ضيعى وقت .
ليلى:اوكيه باى
صبا :باى.
☆☆☆☆☆☆☆
فى شركة السامى للمعمار....
نور:هدى كلمتى شركة الدمنهورى ؟
هدى:ايوة كلمتهم.
نور:وقالوا لك ايه ؟
هدى:حددت معاهم معاد بكرا الساعة ١٢ .
نور :كويس شوفى لى معاد اول طيارة لفرنسا امتى ؟
هدى تبحث على شاشة التابلت وتقول:بكرا الساعة ٧ .
نور:احجزى لى عليها واعايزة اجتماع دلوقتى حالا مع training team.
هدى:حاضر ،تؤمرى باى حاجة تانية ؟
نور:لا بس اعملى اللى قولت لك عليهم ضرورى.
هدى:حاضر عن إذنك  .
نور:اتفضلى .
☆☆☆☆☆☆☆
فى مستشفى الدمنهورى...
اقترب معتز ومعه مدير المشفى من سارة لينادى عليها مدير المشفى لتلتفت لهم سارة.
سارة :صباح الخير يادكتور وجدى .
وجدى:صباح الخير اعرفك دكتور معتز الدمنهورى صاحب المستشفى .
لتنصعق سارة، يا الهى ما الذى يحدث لن يمرر ماحدث معه دون ان يرد الصاع صاعين ،لتبتلع ريقها فى خوف قائلة :اهلا وسهلا يادكتور نورت المستشفى .
معتز:انا شوفت اللى عملتيه وحبيت احيكى عليها برافو عليكى قدرتى تحلى الموقف بدون خساير .
سارة:متشكرة جدا يافندم كلامك شهادة كبيرة .
معتز :اللى زيك مكسب كبير فى المستشفى .
مد يده مصافحا يدها قائلا:فرصة سعيدة انسة سارة .
سارة مصافحة اياه :انا اسعد يافندم .
ليستدير مستعدا لذهاب ولكن يتوقف ويلتفت مرة اخرى ليقول لها :صحيح المرة الجاية ابقى خدى بالك وانتى بتعدى الشارع علشان مش كل مرة ربنا هيسترها واللى بيسوق هيفرمل بسرعة .
وقبل ان تنطق ابتسم وغادر وتركها تحاول الكلام ولكن دون جدوى .
وقف معتز مع على امام سيارته .
معتز:انا عايز كل حاجة عن البنت دى فى اسرع وقت .
على :تحت امرك .
معتز:وعايز معاد مع شركة السامى بأسرع وقت.
على :حضرتك عندك معاد مع نور سامى بكرا الساعة ١٢ .
معتز:كويس اوى ،خلينا نتحرك .
☆☆☆☆☆☆☆
فى وزارة الداخلية.....
دخل يزيد مكتبه ليجلس ويطلب قهوته ويبدا فى قراءة ملف القضية الموضوع أمامه.
ليدخل صديقه أحمد.
احمد:يزيد باشا اخبارك ايه؟
يزيد:انا كويس اخبارك انت ايه يابطل ؟حمدالله على السلامة .
احمد:الله يسلمك الحمدالله انا بخير.
يزيد :الداخلية كلها مالهاش سيرة غيرك يابطل واللى عملته امبارح .
احمد:اسكت يايزيد انا اتكتب لى عمر جديد انا قولت خلاص انا هموت .
يزيد:وايه اللى حصل ؟
احمد:تعرف مروان النجار ؟
يزيد:ومين ميعرفش مروان النجار دا اشهر ظابط هنا فى الداخلية .
احمد:انا مكنتش اعرفه لحد امبارح .
يزيد:يبقى اكيد كان معاكم فى عمليه امبارح .
احمد:بصراحة انا اتفاجئت بيه .
يزيد:مروان طول عمره كدا وشكله مش ناوى يجبها البر .
احمد:ربنا يهديه ،المهم اخبار قضية القتل اللى معاك ايه ؟
يزيد:والله كل يوم فى جديد اخر حاجة ان الجانى بيتعالج عند دكتور نفسى .
احمد:ابعت هاته يمكن فى حل .
يزيد:بعت وبكرا هيجى .
☆☆☆☆☆☆☆
فى شركة السامى للمعمار.......
دخلت نور قاعة الاجتماعات بابتسامتها البسيطة قائلة :مساء الخير .
ليرد الجميع:مساء الخير .
نور:طبعا كلكم بتسألوا انا ليه جمعتكم انا هجاوبكم على اسئلتكم ومش هسيبكم فى الحيرة دى كتير ،طبعا كلكم عارفين ان شركتنا متعاقدة مع فرنسا على انشاء اوتيل على احدث طراز وافخم تصميم وطبعا لازم فريق من عندنا من اشطر المهندسين يروحوا هناك ،وبما ان انتوا أكفأ فريق هنا انتوا مرشحين للسفر والشركة متحملة كل تكاليف سفركم واقامتكم .
احد الموجودين:طب لو فى حد عن ظروف تمنعه من السفر ؟
نور:لو فى بديل ليك من المهندسين اللى موجودين فى الشركة حابب يسافر بدالك مفيش مشكلة ،حد عنده اى سؤال ؟
ليرد شخص اخر:احنا المفروض نسافر امتى ؟
نور:انا هسبقكم بكرا وانتوا هتيجوا بعد بكرا .
☆☆☆☆☆☆
فى سيارة معتز ....
على: مش هتسوق ياباشا ؟
معتز:لا ياعلى سوق انت انا مش مركز .
على:اوامرك ياباشا .
ارجع معتز راسه للخلف واغمض عينه وتذكر حواره مع معشوقته صباح اليوم قبل انا يغادر ،يقف معتز كعادته يتاكد من كامل اناقته امام المرآة ليظهر من خلفه طيفها ،فهى تاتى له كل صباح لتطل عليه بهيئتها الملائكية .
معتز:صباح الخير ياملاكى .
طيف سارة:صباح الخير ياحبيبى كل سنة وانت طيب هتجيب لى ورد معاك وانت جى النهاردة مش كدا؟
معتز:مع ان النهاردة عيدميلادى انا بس حاضر هجبلك احلى ورد واجى .
سارة:عارفة ان النهاردة عيدميلادك واحب أكد لك ان النهاردة هيكون فى مفاجاة كبيرة ليك ودلوقتى يلا روح شغلك ومتتاخرش عليا .
ليفتح معتز عينه ويقول لعلى :على اطلع على المقابر واقف عند اقرب محل ورد يقبلك .
على:حاضر ياباشا.
ليعود معتز مرة اخرى لتفكيره ،انها تشبهها كثيرا هل عادت زوجته مرة اخرى للحياة ولكن فى شخصية اخرى ؟هل يعقل ان يخلق الله اثنين لهما الشكل ذاته والاسم ذاته وطيبة القلب ذاتها ؟ ماتلك اللعبة الجديدة والى اين ستؤدى بنا؟مالذى يريده منى القدر هذه المرة فلايمكن ان تكون هذه مجرد صدفة عابرة ؟
#قدرنا_مش_صدفة
☆☆☆☆☆☆☆
بقلمى
متيمة الكتب
ندى بسيونى