قدرنا مش صدفة

الحلقة الرابعة

مؤكد سنتقابل من جديد ،مؤكد سينتهى كل هذا العذاب،مؤكد ستشرق شمسك على غابة احزانى يوما ما ،قلبى يحدثنى بذلك ،وقلبى لا يكذب ابدا .
☆☆☆☆☆☆☆☆
فى شركة السامى للمعمار.....
انهت نور الاجتماع وتوجهت عائدة لمكتبها .
فى داخل المكتب ....
نور:فى اى اجتماعات تانى ياهدى ؟
هدى:لا يافندم مفيش .
نور:طب كويس انا اصلا عندى معاد مهم دلوقتى .
هدى:اقولهم يجهزوا لحضرتك العربية ؟
نور:اه ياريت على ما الم حاجتى .
هدى:تمام يافندم تؤمرى باى حاجة تانية ؟
نور:اه ظبطى كل  مواعيد بكرة بقى مش عايزة لخبطة .
هدى:حاضر عن إذنك.
خرجت هدى من مكتب نور تاركة إيها تجمع اشيائها لترحل الى لموعدها المهم .
☆☆☆☆☆☆☆☆
مرت الساعات اخذت معها الايام تجر خلفها الشهور لتصبح سنوات ولكن حبك فى قلبى لم يختفى طيلة تلك السنوات.....
☆☆☆☆☆
فى مقابر عائلة الدمنهورى.....
وصل معتز لقبر محبوبته حاملا ازهارها المفضلة وقد قرر الجلوس معها بمفرده لفترة طويلة ليأمر مساعده بالمغادرة.
معتز:روح انت ياعلى مع الحراسة وانا هخلص واروح لوحدى .
على:بس ياباشا خلى الحراسة معاك على الاقل .
معتز:لا مش محتاج الحراسة خليهم يروحوا .
على:طب خلى اتنين بس معاك ياباشا.
معتز:خايف عليا من ايه ياعلى ؟
على:ياباشا انت من اهم رجال الاعمال دلوقتى ،وكتير نفسهم يأذوك ياباشا.
ضحك معتز قائلا:مفيش ميت بيموت ياعلى ،روح وخد الحراسة معاك وسيب لى العرابية بتاعتى .
على:اوامرك ياباشا .
ذهب على تاركا معتز فى المقابر وحيدا .
توجه معتز الى قبر زوجته الراحلة حاملا زهورها المفضلة ،ثم جثا على ركبته واضعا مافى يده امام قبرها.
معتز:وحشتينى اوى ياسارة الدنيا من غيرك وحشة اوى ،عارفة على خايف عليا اتقتل او اموت ،ميعرفش انى موت يوم ما انتى موتى وسبتينى ،انا عايزك تسامحينى انا شوفت واحدة شبهك النهاردة وقلبى وقف من الخضة عارفة للحظة فكرت انك رجعتى تانى للحياة .
☆☆☆☆☆☆
امام منزل ليلى.....
فادى:يعنى انتى مصممة تقفلى اليوم على حاجة تافهة ومش مستهلة ؟
ليلى:تافهة ومش مستهلة انت شايف كدا؟
فادى:اه ياليلى تافهة المفروض يكون دماغك اكبر من كدا.
ليلى:يعنى انا اللى غلطانة ودماغى صغيرة وتافهة وبكبر المواضيع تمام عن إذنك؟
فادى:انتى رايحة فين احنا لسه مخلصناش كلامنا .
ليلى:كلامنا خلص يافادى انت شايف انى انا اللى غلطانة ومكبرة الموضوع خلاص انا معنديش كلام اقوله يا فادى بيه.
فادى:ليلى اعقلى محصلش حاجة لكل دا .
ليلى:خد بالك انت بتغلط فيا اكتر وانا مبقاش عندى استعداد اسمع اهانات اكتر من كدا .
فادى:ليلى انتى فاهمة غلط حاولى تسمعينى.
ليلى:والله لما ادخل اقيس فستان واطلع الاقى خطيبى المحترم فى حضن واحدة تانية المفروض اقف لحد ما تخلصوا لحظات الشوق اللى بينكم ،احمد ربنا انى لسه فيا عقل وبتكلم معاك اصلا،انا اصلا مش عارفة ايه اللى مخلينى لسه قاعدة وبتناقش معاك .
فتحت ليلى باب السيارة ومن ثم غادرت تاركها فادى ينادى عليها لتدخل لمنزلها غير منصته له ليضرب بيده مقود السيارة .
☆☆☆☆☆☆☆☆
فى فرنسا......
ملك:صباح الخير دكتور مازن .
مازن:صباح الخير يا دكتورة يارب تكونى مبسوطة معانا .
ملك:طبعا اكيد .
مازن:الحمدالله، بس قولى لى ايه الجمال دا كله ورايحة فين كدا على الصبح .
ملك:مرسى لزوقك يادكتور مازن .
مازن:بايخة اوى يادكتور مازن خليها مازن على طول هتبقى احلى .
ملك :اصله مينفعش حضرتك .....
مازن مقاطعا اياها:مش عايز اسمع تبريرات وقولى لى بقى رايحة فين بالجمال دا كله.
احمرت وجنتها قائلة :حبيت اطلع اتمشى شوية واشترى شوية حاجات.
مازن:طب ممكن اجى معاكى لو مش هضايقك ؟
ملك:اه طبعا ممكن تيجى تشرفنى طبعا .
مازن:شيلى بقى الرسميات دى ،وتعالى نخرج قبل ما حد يشبط فينا.
خرجت مللك برفقة مازن خارج الفندق.
☆☆☆☆☆☆
عودة الى ارض الوطن..
فى مصر...
توجهت نور الى وجهتها مبتعدة عن الشركة .
بعد قليل وصلت لمركز تسوق وتوجهت لداخل المقهى ،لتلتقى بأعز اصدقائها .
نور :انا اسفة عارفة انى اتأخرت بس غصب عنى والله.
صبا:مافى شى من هاد نور .
نور:بتعملى ايه؟
صبا: ولا شى كنت نطراكى لحتى تجى،شو اخبارك واخبار الشغل ؟
نور:كويسة بس انا فى وضع لا احسد عليه .
صبا:ليش شو اللى صار ؟
نور:استلمت منصب رئيس مجلس ادارة المجموعة .
صبا:عن جد كتير فرحت لك مبرووك .
نور:الله يبارك فيكى بس انا مش عارفة دا صح ولا لأ انا اخدت المنصب دا بعد تفكير كبير .
صبا:هيدى خطوة منيحة ،انتى عم تتقدمى كتير فى مراحل تعافيكى .
نور:لا والاكبر انى هسافر بكرا فرنسا ولوحدى .
صبا:دى كلها حاجات كويسة مش مبسوطة ليه؟
نور:نفسى تتكلمى معايا مصرى على طول.
صبا:ما انتى عارفة المصرى بتاعى مو منيح .
نور:اه يا تعبى اللى راح على الارض اومال بتتعاملى مع المرضى بتوعك ازاى ؟
صبا:المرضى تبعى هما اللى بيتكلموا وانا بسمع ولو هتكلم بيبقى شوية جمل صغيرة .
نور:بس انتى لما بتتكلمى مصرى محدش يقدر يقول عليكى غير انك مصرية ابا عن جدا .
صبا:بجد ،طب اركنى كل دا على جنب وكلمينى عنك بقى ليه مش مبسوطة بكل الانجازات دى ؟
نور:معرفش خايفة حاسة ان قلبى مقبوض معرفش حاسة ان فرحتى ناقصة حاسة ان فى  فراغ فى حياتى زى ما يكون نصى ضايع روحى مش مرتاحة
☆☆☆☆☆☆☆☆
فى مقابر عائلة الدمنهورى...
"اول يوم لينا فى السنة الجديدة انا متحمسة انى اروح مش علشان الدراسة ولا المنهج ولا علشان اخلص لا علشان اشوف اللى خطف قلبى من اول يوم من اول لحظة حبيبى معتز الدمنهورى مستنيه اشوفه حتى لو من بعيد ،رغم كل اللى بيتقال عنه وكل البنات اللى بشفهم معاه بس برضو مقدرتش انساه ولاقدرت اخلى قلبى يكرهه،ياااه لو بس يحس بيا ويحس باللى فى قلبى ليه انا عارفة انه حلم بعيد بس نفسى يكون قلب معتز الدمنهورى يدق ليا انا وبس دا مش بس حلم بعيد دا المستحيل بس هفضل استنى حتى لو لاخر عمرى".
اغلق معتز مذكرات زوجته الراحلة قائلا :انا عارفة انك مش بتحبى اقرا مذكراتك قدامك علشان بتتكثفى بس انا بحب اقرا كلامك وانا معاكى بعيد عن كل الدنيا ،وحشتينى اوى ياملاكى وحشتينى ووحشنى كلامك وابتسامتك وضحكتك وهزارك ولمضتك وحشتينى اوى يااه لو ترجعى لى تانى .
☆☆☆☆☆☆☆☆☆
فى منزل عائلة الشريف......
دخلت ليلى الى المنزل كعادتها مبتسمة محاولة محو اى اثار لما حدث بينها وبين فادى من جدال منذ قليل .
ليلى :السلام عليكم يا اهل البيت .
الام: وعليكم السلام ورحمة الله وبركاته  روحى غيرى هدومك وتعالى ساعدينى نحضر الاكل زمان اخوكى جاى.
ليلى :حاضر ياست الكل هغير بسرعة واجى .
تحركت ليلى نحو غرفتها لتبدل ثيابها وبعدما انتهت وقعت عينها امام المرآة لترى عيونها مشتعلة بحمرة شديدة .
ليلى لنفسها:يانهار احمر ماما لو شافت عينى كدا مش هتسبنى غير لما اقعد احكى لها كل اللى حصل فالاحسن اروح اغسلها بسرعة قبل ما ماما تاخد بالها وتقعد تقررنى .
☆☆☆☆☆☆☆
ياالهى اعد لى تلك الروح الضائعة فانا لم يعد باستطاعتى المضى قدما بدونها ........
****************
فى فيلا النجار.....
صاح هاتف مروان باتصال .....
ليجيب مروان:ياااه ياراجل لسه فاكر ان ليك صاحب تسال عليه ؟
الطرف الاخر:...............
مروان:لا ولايهمك طمنى عليك عامل ايه ؟
الطرف الاخر:.............
مروان:لا معنديش حاجة النهاردة ما انت عارف انى فى اجازة .
الطرف الاخر:...................
مروان:تمام كمان نص ساعة واكون عندك .
الطرف الاخر:............
مروان:ايوة ياسيدى عارف المول دا هجيلك على الكافية اللى هناك مش هتاخر .
انهى مروان مكالمته مع صديقه ليذهب الى غرفته ولكن حنان استوقفته.
حنان:مارو انا نازلة عندى ميتنج مهم .
مروان:طب استنى انا خارج هوصلك معايا فى الطريق .
حنان:لا ياحبيبى انا يادوب الحق وبعدين متخافش انا معايا السواق .
مروان:طب خدى بالك من نفسك وانتى زى القمر كدا واه خدى الحراسة معاكى انا مش معينهم وبدفع لهم كل شهر علشان يقعدوا يشربوا شاى.
حنان:حاضر يامروان باشا اى اوامر تانية ؟
مروان:ولا اوامر ولا حاجة بس هو انا مينفعش يبقى عندى قمر كدا وماخفش عليه .
حنان:بكاش طول عمرك بس هعديها علشان متاخرة .
☆☆☆☆☆☆☆☆☆
فى فرنسا ......
ملك :متشكرة اوى يادكتور مازن تعبتك معايا النهاردة.
مازن:انا قايلك مليون مرة بلاش يادكتور دى وبعدين ياستى مين قالك انى تعبان بالعكس انا مبسوط اوى.
ملك :بجد مبسوط ؟
مازن:انا اول مرة احس انى فرحان كدا .
ملك:طب وايه اللى فرحك اوى كدا.
مازن:انا فرحان لانى خرجت واتمشيت واتكلمت معاكى حاسس انى مرتاح كدا ومبسوط  انتى شخصية نادرة اوى وجميلة وروحك اجمل واجمل .
ملك بخجل :مرسيى اوى يامازن على المجاملة اللطيفة دى .
مازن :بس انا مش بجاملك دى حقيقة ،بس يارب تكونى اتبسطى فى الخروجة دى ومكونش بوظتلك اليوم.
ملك:لا ابدا والله انا كمان اتبسطت فى الخروجة دى.
مازن:خلاص طالما اتبسطى ،كل لما تعوزى تخروجى كلمينى وانا هخرج معاكى ،متفقين ؟
ملك :متفقين.
☆☆☆☆☆☆☆☆
فى المول.......
عند نور وصبا......
صبا:حبيبتى انتى عيدميلادك بكرا مش كدا؟
نور:اه تصدقى نسيت خالص .
صبا:العمر كله الك حبيبتى هيدى هدية صغيرة الك .
نور:انا متشكرة اوى ياصبا بس انتى عرفتى ازاى ان عيد ميلادى بكرا.
صبا:نور انتى رفقتى قبل ماكون دكتورتك النفسية فاكيد هعرف .
ابتسمت نور ثم شردت وظهرت علامات الحزن على وجهها وتلألأت الدموع فى زمردتيها .
لاحظت صبا التغيرات التى ظهرت على وجه نور فحاولت تهدأتها لتقول:نور بعرف ان اللى صار معاك مانو سهل ولا شى بسيط بعرف انو من يوم ما صار اللى صار وانتى ضايعة بس هاد مانو اخر الدنيا انتى لساتك صغيرة وراح تكون عندك حيات اكتير حلوة متلك .
نور:انا جايز خسرت ناس بحبهم بس ربنا عوضنى بيكى ربنا مايحرمنى منك انتى خففتى عنى كتير وساعدتينى كتير اوى .
صبا:بالا ماتقولى هيك هاد واجب الرفقة .
☆☆☆☆☆☆☆☆
عند معتز .......
انتهى معتز من جلسته مع زوجته الراحلة للأبد وخرج مودعا فؤاده المدفون اسفل الثرى على واعد بالعودة مرة اخرى،توجه معتز لخارج المدافن ليستقل سيارته ولكنه وجد صديقه ومساعده (على) .
معتز:انت لسه هنا مروحتش ياعلى ؟
على:مقدرش اسيبك لوحدك ياباشا .
معتز:برضو ياعلى ؟
على :على الاقل اوصلك ياباشا .
معتز: طب يلا بينا من هنا ،بس بلاش باشا اللى انت على طول تقولها دى .
على:اتعودت عليها اعمل ايه ؟
معتز:قولى معتز عادى زى ما بقولك على وبطل كلمة باشا دى انت مش فى الداخلية هنا.
على:وانا مش عايز افتكر الداخلية ولا ايامها.
معتز:بس انت لسه بتحن لها من جواك وبتكابر .
على:محدش بينسى ماضيه فى يوم وليلة .
معتز:عندك حق محدش بينسى بالسهل ،بس نصيحة ارجع شغلك تانى انت محتاج له اكتر ماهو محتاجلك .
على:مبقاش ينفع خلاص يامعتز .
معتز:مين قال انت لسه الصقر اللى يقدر يحل اكبر واصعب القضايا.
على :كان زمان كفاية اللى حصل انا خسرت كتير ومش مستعد اخسر اكتر من كدا .
معتز:طب بالعقل كدا انت لسه قايل انت خسرت كتير ومش مستعد تخسر اكتر من كدا انت عندك ايه لسه علشان تخسره ،مفيش حاجة يبقى ترجع لشغلك اللى بتحبه .
على:لا يا معتز ولا بقيت عايز ارجع الشغل ولا بقيت بحبه انا خلاص قفلت الصفحة دى من حياتى وبعدين انا عايز اركز فى الشركة وفى الشغل .
معتز:على راحتك انا بس صعبان عليا انك سيبت الحاجة اللى بتحبها وبتعمل الحاجة اللى عمرك ماحبتها وكل دا ليه علشان عايش فى الماضى .
على :لو كان نسيان الماضى سهل ،مكنتش زمانك عايش فى الماضى انت كمان .
☆☆☆☆☆☆☆☆☆
فى المول .....
مروان :ايوة يابنى خلاص وصلت اهو ،انت قاعد فين خلاص لمحتك انا جايلك اهو ياباشا.
تحرك مروان نحو صديقه .
مروان:والله ليك وحشه يايزيد .
يزيد :وانت كمان يامروان والله ،اخبارك ايه ؟
مروان:انا الحمدالله بخير لسه عايش ،طمنى عنك انت اخبارك ايه ؟
يزيد :تمام الحمدالله .
مروان:انا سامع انك ماسك قضية جامدة اوى ايه الحكاية ؟
يزيد :ولا حكاية ولا حاجة قضية واحد قتل مراته وادينا بنحقق معاه واخر حاجة وصلنالها انه كان بيتعالج عند طبيب نفسى واستدعيناه وهيجى بكرا ونحقق معاه يمكن نوصل لحاجة.
مروان:ربنا معاك ياصاحبى ويجعل حلها على ايدك .
يزيد :سيبك منى قولى بقى انت مش ناوى تعقل شوية وتهدى لزومه ايه جو الرعب اللى مخلينا كلنا عايشينه ؟
مروان:انت حاولت تكلمنى كام مرة قبل كدا انا اقتنعت وعقلت وهديت ؟طبعا لا يبقى ريح دماغك انا كدا تمام اوى ومبسوط ،وبعدين فادى كلمنى ومكنش ينفع اسيبه وانا موريش حاجة وهو ف خطر .
يزيد :مقولتش تسيبه ولا عندى اعتراض على دا انا كل قصدى بلاش تهورك الزايد دا وتحاول تعقل الامور كدا براحة .
مروان :سبتلك العقل كله ياخويا ،اقولك قول الكلام دا لفادى هيسمع منك اما انا ما اوعدكش .
يزيد:مفيش فايدة فيك ،اصبر دا فادى بيتصل على السيرة اما نشوف فى اى .
☆☆☆☆☆☆☆☆☆
فى مستشفى الدمنهورى......
كانت سارة تعمل بجد وعلى وجهها دوما ابتسامة مطمئنة لكل المرضى ،وبينما تعمل سارة اتت علا صديقتها .
علا :سارة انا خلاص فصلت مش قادرة تعالى ننزل ناكل .
سارة:استنى بس خمس دقايق هخلص اللى فى ايدى وانزل معاكى .
علا:طب بتعملى ايه طيب اساعدك فيه وننجز ؟
سارة:ولا حاجة بكتب التذاكر خلاص مابقيش كتير .
علا:طب باقى حاجة غير التذاكر ؟
سارة:لا كله تمام ،هخلص بس كام تذكرة اللى باقين دول وانزل معاكى .
علا:دكتور مدحت جاى على هنا .
سارة:مايجى اعمله ايه ؟
علا:بطلى اسلوب التتطنيش بتاعك دا علشان متندميش .
سارة:لا متخافيش مش هندم .
مدحت:ايه يانرس سارة منزلتيش ليه انتى ونرس علا علشان تاكلوا ؟
علا:سارة لسه باقى لها شوية شغل هتخلصهم وننزل يكون اللى تحت طلعوا يستلموا مكانا.
مدحت:لو تحبى يانرس سارة انا ممكن ابعت حد او اتصل عليهم يطلعوا لكم بسرعة.
سارة:متشكرة جدا يا دكتور مش مستهلة باقى اخر تذكرة هخلصها وهما هيكونوا وصلوا.
مدحت:اوكيه على راحتك لو عوزتى حاجة انتى عارفة مكتبى انا تحت امرك فى اى وقت.
سارة:متشكرة جدا يادكتور مدحت على زوق حضرتك.
ليذهب مدحت وتبقى سارة مع علا .
علا:اموت واعرف بتصدى الراجل ليه؟
سارة:هقولك تحت يلا بينا انا خلصت وهما جم خلاص تعالى ننزل واقولك .
☆☆☆☆☆☆☆☆☆
فى فرنسا.
صعدت ملك لغرفتها لترتاح وهى فى قمة سعادتها ،فقد اقتربت كثيرا من مازن حب عمرها كما كانت تعتقد ،وفى المساء هبطت للاسفل ،لتتمشى قليلا وقد اخذها الحنين الى والداتها تريد ان تنهى هذا المؤتمر لتعود الى وطنها ،واذا بها سابحة فى افكارها لتجد صوتا يقطع خلوتها قائلا :القمر سرحان فى اى؟
ملك :مازن خضتنى ،انت هنا من امتى ؟
مازن:بصراحة بقالى ربع ساعة واقف وانتى نا اخدتيش بالك .
ملك :ولما انت هنا بقالك ربع ساعة متكلمتش ليه ؟
مازن:عايزة الصراحة ؟
ملك:طبعا .
مازن:كنت ببص عليكى وانتى سرحانة كان شكلك حلو اوى .
اشتعلت وجنة ملك بحمرة الخجل .
مازن :وعارفة ايه الاحلى ،شكلك وانتى مكسوفة بتبقى زى القمر.
ملك:طب ممكن بقى تبطل تعاكسنى علشان بتكثف .
مازن:انا معرفش مقولش الحقيقة بس هحاول ،قولى لى بقى كنتى سرحانة فى اى؟
ملك:كنت بفكر فى ماما وحشتنى .
&&&&&&&&&&&
فى المول ....
مروان :خير مالو فادى عايز اى ؟
يزيد :مفيش بيقول جاى على هنا .
مروان:طب هو فين ؟
يزيد:بيركن وجاى .
مروان:كويس اوى والله زمان وهنتجمع زى الاول.
دخل فادى عليهم يسحب كرسيا ليجلس عليه بعصبية قائلا:بص بقى يا مروان شوف لك حل فى المعجبات بتوعك علشان زهقت.
يزيد:فى اى يافادى بس مالك متعصب كدا ليه ؟
فادى :بسبب البيه .
مروان:وانا عملت لك اى ؟
فادى:الباشا بيتطنش لكل البنات اللى بيجروا وراه وطبعا مفيش صاحب يوصلوله من خلاله غيرى  .
يزيد:بس كل دا ميخلكش تتعصب كدا .
فادى:كنت هنا مع ليلى من شوية كانت مع صاحبتها وكنت جاى أروحها وجات بنت من مُعجبات البَاشا وأخدت رَاحتها على الاخر وبتسلم بالأحضان وشافتنا ليلى وفكرت انى بخونها وقلبت الليلة عليا .
مروان ضاحكا :ومين البنت دى ؟
فادى :يابرودك ياخى ،انا مولع وانت بتضحك .
مروان:بحاول اخفف عنك الحق عليا .
فادى:اه الحق عليك انت السبب فى كل اللى حصل اصلا.
مروان:وانا مالى انا اللى قولت لك احضن البنت .
فادى:انا محضنتهاش هى اللى حضنتنى .
مروان:كمان، ماهو علشان انت مغفل ،بقى بزمتك واحدة تيجى لحد عندك وتحضنك وانت متحضنهاش تبقى غبى .
فادى:رد عليه يايزيد علشان انا هطق .
يزيد:اهدوا بقى انتوا الاتنين وخلونا نركز فى اللى حصل وخلينا نلاقى حل .
فادى:والنبى انا واقع فى عرضك وطولك عايز حل ليلى مش راضيه تسمعنى حتى .
يزيد :طب انا هحلهالك .
فادى:بجد !طب إزاى ؟
يزيد:سيبها عليا ،انا هطلع اعمل تليفون وأجى .
خرج يزيد وترك مروان مع فادى .
¶¶¶¶¶¶¶¶¶¶¶¶¶¶¶
فى المول ايضا .....
نور :طب بقى مقولتليش بتعملى اى الايام دى ؟
صبا:عم حضر بحث چديد ،وعم بدرس هالايام.
نور:بجد!دى حاجة حلوة اوى ،ربنا يوفقك يارب وتنجحى فى رسالتك يارب .
صبا:تؤبرنى عيونك حياتى .
نور:لا لا انا بضعف قدام كلامك الحلو دا .
صبا:بقولك اى متضحكيش عليا ،قولى لى عاملة اى مع شادى ؟
نور:مش مرتاحة له لسه .
قطع كلامهم الجرسون قائلا:حضرتك دكتورة صبا ؟
صبا:ايوة انا فى حاجة ؟
الجرسون:فى حد عايز حضرتك فى الصالة اللى برا .
صبا:طب انا جاية اشوف مين متشكرة اوى .
نور:مين دا ياصبا .
صبا:ما بعرف راح شوف واجى اذا بدك فيكى تروحى وانا بخلص وبروح انا كمان .
نور :لا انا هستناكى ،بس كنت عايزة اروح التواليت علشان اظبط الحجاب .
صبا:مافى مشكلة روحى واللى راح ترجع لهون بكير تدق للتانية .
نور:اوك
خرجت صبا متوجهة للصالة الخارجية لترى من ينتظرها خرجت واذا بها ترى من ينتظرها لتتجمد كل خلية بها ويبهت وجهها من الصدمة وكان صاعقة هبطت من السماء على رأسها حاولت التحدث ولكن دون جدوى وفى النهاية تشجعت لتنطق :هاد انت ،شو بدك ؟؟؟؟
الى اللقاء فى الحلقة القادمة .....
قدرنا مش صدفة
بقلمى
ندى بسيونى .