​ရှေး​ရေစက်​ကြောင့် ဆုံစည်းကြရာဝယ်...[Completed]

Chapter [1]

(Unicode)

ဇူလိုင်မိုးက အငြိုးတကြီးနှင့် သည်းသည်းမဲမဲ ရွာသွန်း​နေ၏။​ ​

ကျောင်းကော်ရစ်တာမှာရပ်​နေတဲ့ ​ကောင်းမြတ်သာက D2 တံဆိပ်ပါမိုးကာအင်္ကျီကို ချွတ်ပြီး ထီး၊မိုးကာ စသည်ဖြင့်ဟိုဟိုဒီဒီပစ္စည်း​တွေထားဖို့လုပ်​ပေးထားသည့်နေရာမှာ ချိတ်ဆွဲထားလိုက်​​လေသည်။

"Morning ​ကောင်း​ကောင်း။ ဒီ​နေ့ ​နောက်ကျတယ်​နော်"

"ဟုတ်တယ်​​နွေ။ မိုးစဲသွားမလားလို့ ​စောင့်​နေရင်းနဲ့နောက်ကျသွားတာ"

​နွေမိုး​ဆောင်း၏ အ​မေးကို သူပြန်​ဖြေလိုက်ပြီးယောကျာ်း​လေးခုံတန်း တတိယ​မြောက်ခုံ​၏ ပြတင်း​ပေါက်နှင့်နီးသည့်နေရာမှာဝင်ထိုင်လိုက်​​လေသည်။ ကောင်းမြတ်သာဆိုတဲ့ သူ့ကို​ သူငယ်ချင်းများသာမက ဆရာ၊ဆရာမများကပါ ​ကောင်း​ကောင်းဟုပင်​ခေါ်ကြ​၏။

​ကျောင်းတက်​ခေါင်း​လောင်းထိုးပြီး များမကြာမီမှာပဲ အတန်းပိုင်ဆရာမဝင်လာခဲ့​လေသည်။ ဆရာမ​နောက်မှာလည်း ​ကျောင်းသားသစ်ဖြစ်ဟန်တူသည့်ကောင်​လေးတစ်​ယောက်ပါလာခဲ့၏။

"Good Morning Teacher"

"Morning class,အားလုံးပဲ ထိုင်လို့ရပါပြီ။ ဒီ​နေ့ အတန်းထဲကို ​ကျောင်းသားအသစ်​ပါလာတယ်။ကဲ သား ကိုယ့်ကိုကိုယ် မိတ်ဆက်​ပေးပါအုံး"

"ကိုယ့် နာမည်က ခန့်ခိုင်မြဲ"

​ကျောင်းသားသစ်၏နှုတ်ဆက်စကားက တုံးတိတိ။
ထူထဲထဲမျက်ခုံးနှစ်ဖက်ကလည်း ထိစပ်လုမတတ်။အကြည့်​​က စူးရဲရဲ။ ဘယ်သူ့ကိုမှ ဂရုမစိုက်ဘူးဆိုတဲ့အကြည့်မျိုး။နှာ​ခေါင်းက ခပ်ချွန်ချွန်။ မျက်နှာကျပုံလှ​ပေမဲ့ နှုတ်ခမ်းထူထူ​တွေကို တင်းတင်း​စေ့ထား​တော့ မျက်နှာကတည်တင်း​နေ​​တော့၏။ သာမန်ကိုးတန်း​ကျောင်းသားတစ်​ယောက်မှာရှိသင့်သည့် အရပ်ထက်ပိုပြီးရှည်လျား​နေတဲ့ သူ့ကို ​ကောင်းမြတ်သာစိတ်ထဲ​က​နေ "လူ​ချောတစ်​ယောက်ပဲ" ဟု မှတ်ချက်ပြုမိလိုက်​လေသည်။

"ဒါပဲလားသား။ ဟုတ်ပါပြီ က​လေး​တွေ​နောက်ကျ​နေတဲ့ သူငယ်ချင်းကို ကူညီ​ပေးလိုက်ကြအုံး​နော်"